మధుబాలగా సాయి పల్లవి..? ఆమె జీవితం నిజంగానే ఓ సినిమా కథ! 

.

ఇటీవల మీడియాలో, సోషల్ మీడియాలో ఓ ఆసక్తికరమైన వార్త చక్కర్లు కొడుతోంది. Sai Pallavi త్వరలో ఒక బయోపిక్‌లో నటించబోతుందట. అది కూడా బాలీవుడ్ లెజెండరీ నటి Madhubala జీవితంపై తీసే సినిమా అని ప్రచారం. ఇదే సమయంలో మరో వార్త కూడా వినిపిస్తోంది. ప్రముఖ కర్నాటక సంగీత గాయని M. S. Subbulakshmi జీవితంపై తెరకెక్కే బయోపిక్‌లో కూడా సాయిపల్లవి నటించవచ్చని అంటున్నారు.

ఆమె చేతిలో ఇప్పటికే భారీ ప్రాజెక్టులు ఉన్నాయి. Kalki 2898 AD సీక్వెల్, Dhanushతో సినిమా, అలాగే భారీ బడ్జెట్‌తో తెరకెక్కుతున్న Ramayana. ఈ బిజీ షెడ్యూల్‌లో కొత్త బయోపిక్స్ సాధ్యమా అన్న సందేహం కూడా ఉంది.

కానీ మరో ప్రశ్న ఇంకా ఆసక్తికరం. అసలు మధుబాల జీవితంలో ఓ బయోపిక్ తీసేంత డ్రామా ఉందా..? 

సినిమా కథలా వినిపించే ఐదు పెద్ద ఎపిసోడ్లు ఆమె జీవితంలో నిజంగానే ఉన్నాయి. పేదరికం నుంచి స్టార్‌డమ్ వరకు… మధుబాల అసలు పేరు ముంతాజ్ జహాన్. ఢిల్లీలో పుట్టిన ఆమె కుటుంబం చాలా పేద. అందుకే చిన్న వయసులోనే సినిమాల్లోకి రావాల్సి వచ్చింది.

బాలనటిగా ప్రారంభమైన కెరీర్… కొన్ని సంవత్సరాల్లోనే ఆమెను బాలీవుడ్‌లో అగ్రతారగా మార్చింది. 1949లో వచ్చిన Mahal సినిమా ఆమె జీవితాన్ని పూర్తిగా మార్చింది. ఆ ఒక్క సినిమాతో మధుబాల దేశవ్యాప్తంగా స్టార్ అయిపోయింది.

బాలీవుడ్‌లో అత్యంత విషాద ప్రేమకథ … మధుబాల జీవితంలో అత్యంత నాటకీయమైన భాగం ఆమె ప్రేమకథ. ప్రముఖ నటుడు Dilip Kumarతో ఆమె ప్రేమలో పడింది. ఇద్దరూ పెళ్లి చేసుకుంటారని కూడా అప్పట్లో వార్తలు వచ్చాయి. కానీ కుటుంబ వివాదాలు, కోర్టు కేసులు… చివరికి ఈ ప్రేమకథను చీల్చేశాయి. బాలీవుడ్ చరిత్రలో ఇప్పటికీ అత్యంత విషాదకరమైన ప్రేమకథల్లో ఒకటిగా దీనిని చెబుతారు.

మహాసినిమా… కానీ వ్యక్తిగత బాధ … 1960లో వచ్చిన Mughal-e-Azam భారతీయ సినీ చరిత్రలో క్లాసిక్‌గా నిలిచింది. ఈ సినిమాలో అనార్కలి పాత్రలో మధుబాల నటన ఇప్పటికీ గుర్తుండిపోతుంది. కానీ ఈ సినిమా షూటింగ్ జరుగుతున్న సమయంలోనే ఆమె తీవ్రమైన ఆరోగ్య సమస్యలతో బాధపడుతోంది. అయినా షూటింగ్ ఆపలేదు.

ప్రేమ కాదు… చివరికి వేరే పెళ్లి … తర్వాత ఆమె గాయకుడు-నటుడు Kishore Kumarను వివాహం చేసుకుంది. కానీ ఆరోగ్యం క్షీణించడంతో ఆమె సినిమా కెరీర్ కూడా దాదాపు ముగిసిపోయింది. మధుబాల చిన్నప్పటి నుంచే గుండె సంబంధిత వ్యాధితో బాధపడేది. చివరికి 1969లో కేవలం 36 ఏళ్ల వయసులోనే ఆమె మరణించింది. అందం, ఖ్యాతి, ప్రేమ, విషాదం… అన్నీ కలిసిన ఒక జీవితం అక్కడితో ముగిసింది.

మధుబాల జీవితంలో ఉన్నంత డ్రామా… ఆమె నటించిన సినిమాల్లో కూడా ఉండదు అని చాలామంది చెబుతారు. బాలీవుడ్‌లో ఆమెను అప్పట్లో “అందానికి ప్రతీక”గా చూశారు. కానీ ఆమె నిజ జీవితంలో మాత్రం…

ప్రేమలో విఫలం,

తీవ్రమైన అనారోగ్యం,

చిన్న వయసులోనే మరణం,

అన్నీ ఎదుర్కొంది….

అందుకే సినీ చరిత్రకారులు ఒక మాట చెబుతారు. “మధుబాల జీవితం ఒక సినిమా అయితే… అది ఖచ్చితంగా విషాదాంతంతో ముగిసే క్లాసిక్ అయి ఉండేది.” ఇదే కారణంగా ఆమెపై బయోపిక్ తీయాలనే ఆలోచన దశాబ్దాలుగా వస్తూనే ఉంది.

కానీ ఆసక్తికరమైన విషయం ఏమిటంటే… అంతటి డ్రామా ఉన్న జీవితం మీద ఇప్పటివరకు పూర్తి స్థాయి పెద్ద బయోపిక్ మాత్రం తెరకెక్కలేదు. బహుశా… ఒకరోజు నిజంగానే ఆ కథ తెరపైకి వస్తే… అది భారతీయ సినీ చరిత్రలో అత్యంత భావోద్వేగభరితమైన బయోపిక్‌లలో ఒకటిగా నిలిచే అవకాశముంది… అఫ్‌కోర్స్, క్రియేటివ్ ఫ్రీడం తీసుకుని కథను రక్తికట్టించగల దర్శకుడు దొరికితేనే..!!