.
అంతరిక్షమైనా.. ఆకాశమైనా.. భగవన్నామ స్మరణే! అంటే సైన్స్‌తోపాటు గాడ్, ఫెయిత్… శాస్త్రంతోపాటు విశ్వాసం…
మనిషి భూమిని దాటాడు. ఆకాశాన్ని దాటాడు. చంద్రుడి చుట్టూ తిరిగాడు. అణువును ఛేదించాడు. విశ్వ రహస్యాలను ఛేదించేందుకు రాకెట్లను పంపిస్తున్నాడు. కానీ… ప్రాణం పోయే క్షణం వచ్చినప్పుడు మాత్రం దేవుడే గుర్తొస్తున్నాడా?
Ads
తాజాగా విమాన కాక్‌పిట్‌లో ప్రాణాపాయంలో చిక్కుకున్న భారతీయ పైలట్ స్మిత్ మచ్చర్ నోట హనుమాన్ చాలీసా వచ్చింది. ఒలింపిక్స్‌లో పతకం కోసం పోరాడుతున్న మను భాకర్‌కు భగవద్గీత గుర్తొచ్చింది. అంతరిక్షానికి వెళ్లిన సునీతా విలియమ్స్ గణపతిని, గీతను వెంట తీసుకెళ్లారు. అంతరిక్షంలోకి రాకెట్లు పంపించే ఇస్రో శాస్త్రవేత్తలు కూడా ప్రయోగాలకు ముందు తిరుమల శ్రీవారిని దర్శించుకుంటారు.
ఇక ప్రపంచంలో తొలి అణుబాంబు పేలుడు చూసిన ఓపెన్‌హైమర్‌కు గీతలోని విశ్వరూప దర్శనమే గుర్తొచ్చింది. చంద్రుడి చుట్టూ తిరుగుతున్న అపోలో-8 వ్యోమగాములు బైబిల్ చదివారు. శాస్త్రం మనిషిని ఎంత దూరం తీసుకెళ్లినా… కొన్ని క్షణాల్లో మనిషి చూపు మాత్రం మళ్లీ తనకంటే పెద్ద శక్తి వైపే తిరుగుతోంది.
30 వేల అడుగుల ఎత్తులో… హనుమాన్ చాలీసా! తాజాగా కెప్టెన్ స్మిత్ మచ్చర్ చెప్పిన మాట ఈ కథకు సరిగ్గా సరిపోతుంది. విమానంలో కో-పైలట్ దాడి చేశాడు. తీవ్రంగా గాయపడ్డారు. విమానం వేగంగా కిందికి పడిపోతోంది. అయినా ప్రయాణికుల ప్రాణాలను కాపాడాలంటే కాక్‌పిట్ తలుపు తెరవాల్సిందేనని నిర్ణయించుకున్నారు.
ఆ ప్రాణాంతక పరిస్థితుల్లో తాను హనుమాన్ చాలీసా జపిస్తూ ఉన్నానని మచ్చర్ ప్రధాని మోదీతో చెప్పాడు. గాయాలతో ఉన్నప్పటికీ కాక్‌పిట్ తలుపు తెరవడంతో ప్రయాణికులు, సిబ్బంది లోపలికి చేరి దాడి చేసిన వ్యక్తిని అదుపులోకి తీసుకోవడానికి అవకాశం కలిగింది.
విమానం కిందికి పడుతోంది… శరీరంపై గాయాలు… ముందు ప్రాణాపాయం… ఆ క్షణంలో ఆయనకు గుర్తొచ్చింది హనుమాన్!
అది విశ్వాసమా? మానసిక ధైర్యమా? రెండూ కలిసిన అనుభూతా? అది ఆయన వ్యక్తిగత అనుభవం. కానీ ఆ క్షణంలో తనకు బలం ఇచ్చింది హనుమాన్ చాలీసా అని ఆయన స్వయంగా చెప్పడం మాత్రం ఈ కథలో ప్రత్యేకమైన విషయం.
పిస్టల్ చేతిలో… మనసులో గీత! మను భాకర్ కథ కూడా అంతే ఆసక్తికరం. పారిస్ ఒలింపిక్స్‌లో పిస్టల్ చేతిలో ఉంది. ప్రపంచ స్థాయి పోటీ. ఒక్క చిన్న పొరపాటు పతకాన్ని దూరం చేయొచ్చు. అలాంటి ఒత్తిడిలో భగవద్గీత తనకు ఎంతో ఉపయోగపడిందని మను స్వయంగా చెప్పారు. ముఖ్యంగా ఫలితంపై కాకుండా కర్తవ్యంపై దృష్టి పెట్టాలన్న గీతా భావన తనకు ఉపయోగపడిందని ఆమె వివరించారు.
అంటే గీత ఆమెకు పతకం గెలిపించిందని కాదు. పతకం గెలుస్తానా లేదా అన్న టెన్షన్ నుంచి బయటపడి… తన పని తాను చేయడానికి గీత తోడైంది.
రాకెట్‌పై శాస్త్రం… ముందు శ్రీవారి ఆశీర్వాదం! ఇక భారత అంతరిక్ష పరిశోధనా సంస్థ ఇస్రోను చూడండి. రాకెట్‌లో ఒక్కో బోల్ట్ నుంచి ఇంధనం వరకు లెక్కలు. వాతావరణ పరిస్థితులు, కక్ష్య, వేగం, గురుత్వాకర్షణ… ప్రతిదీ శాస్త్రమే.
అయినా పెద్ద ప్రయోగానికి ముందు ఇస్రో శాస్త్రవేత్తలు తిరుమల శ్రీవారిని దర్శించుకోవడం కొత్త విషయం కాదు. 2026 సెప్టెంబరులోనే ఇస్రో చైర్మన్ వి. నారాయణన్ నేతృత్వంలోని బృందం GSLV-F17 రాకెట్, EOS-05 ఉపగ్రహ నమూనాలను తీసుకెళ్లి తిరుమలలో ప్రార్థనలు చేసింది. రాకెట్ నమూనాలను స్వామివారి పాదాల వద్ద ఉంచి ఆశీర్వాదాలు కోరారు.
చంద్రయాన్-3కు ముందు కూడా ఇస్రో శాస్త్రవేత్తలు ఇదే విధంగా తిరుమలలో పూజలు చేశారు. ఇలాంటి ప్రార్థనలు ఇస్రోలో చాలాకాలంగా కొనసాగుతున్న సంప్రదాయంగా వార్తా నివేదికలు పేర్కొంటున్నాయి.
రాకెట్‌ను పైకి పంపేది శాస్త్రం… ఆ రాకెట్ విజయవంతంగా వెళ్లాలని కోరుకునే మనసు మాత్రం దేవుడి ముందు నిలుస్తోంది!
అంతరిక్షంలోనూ గణపతే! ఇక సునీతా విలియమ్స్. భూమికి వందల కిలోమీటర్ల ఎత్తులో అంతరిక్ష కేంద్రంలో ఉండే ఆమె వెంట అత్యాధునిక పరికరాలే ఉంటాయని అనుకుంటాం. కానీ ఆమె వెంట గణపతి, భగవద్గీత కూడా వెళ్లాయి.
2026లో ఇచ్చిన ఇంటర్వ్యూలో సునీతా విలియమ్స్ గణపతి తన ఇంట్లో ఎప్పటినుంచో ఉన్నాడని, అందుకే అంతరిక్షానికీ తనతో రావాల్సిందేనని చెప్పారు. గీత కూడా తనకు ఆధ్యాత్మికంగా ఎంతో ముఖ్యమని వివరించారు. రాకెట్ ఆమెను భూమికి దూరం తీసుకెళ్లింది… గణపతి మాత్రం ఆమెను తన మూలాలకు దగ్గరగా ఉంచాడు.
అంతరిక్షంలో యోగా చేసిన రాకేశ్ శర్మ… 1984లో అంతరిక్షంలోకి వెళ్లిన తొలి భారతీయుడు రాకేశ్ శర్మకూ భారతీయ ఆధ్యాత్మికతతో ముడిపడిన అధ్యాయం ఉంది. అంతరిక్షంలో ఆయన యోగా సాధన చేశారు. భూమి మీద యోగా ఒక సాధన. భూమికి వందల కిలోమీటర్ల ఎత్తులో, అనంతమైన విశ్వం మధ్య యోగా చేస్తే? అది శరీరాన్ని మాత్రమే కాదు… మనసును కూడా లోపలికి చూసే ప్రయాణమే కావచ్చు.
అణుబాంబు వెలుగులో… కృష్ణుడు! ఇక ఓపెన్‌హైమర్ కథ. 1945 జూలై 16. న్యూ మెక్సికో ఎడారి. ప్రపంచంలోని తొలి అణుబాంబు పరీక్ష—ట్రినిటీ. మానవుడు సృష్టించిన అపార విధ్వంస శక్తి కళ్లముందు ప్రత్యక్షమైంది. ఆ క్షణాన్ని తరువాత గుర్తుచేసుకున్న ఓపెన్‌హైమర్‌కు భగవద్గీతలోని విశ్వరూప దర్శనం గుర్తొచ్చింది.
“Now I am become Death, the destroyer of worlds.” గీతలోని భావాన్ని తన అనుభూతికి అనుగుణంగా ఓపెన్‌హైమర్ చెప్పిన ప్రసిద్ధ వ్యాఖ్యానమిది. ఆయన స్వయంగా ఆ గీతా సందర్భాన్ని గుర్తుచేసుకున్నట్లు రికార్డుల్లో ఉంది. ఒకవైపు కృష్ణుడి విశ్వరూపం. మరోవైపు మానవుడు సృష్టించిన అణుశక్తి.
విశ్వరూపాన్ని చదివిన శాస్త్రవేత్త… విశ్వరూపంలాంటి విధ్వంసాన్ని కళ్లారా చూసినప్పుడు మళ్లీ అదే గీతను గుర్తుచేసుకున్నాడు.
చంద్రుడి చుట్టూ తిరుగుతూ… బైబిల్ చదివారు! ఇది కేవలం భారతీయ ఆధ్యాత్మికత కథ కాదు. 1968 డిసెంబర్ 24. అపోలో-8 చంద్రుడి చుట్టూ పరిభ్రమిస్తోంది. ఫ్రాంక్ బోర్మన్, జేమ్స్ లవెల్, విలియం అండర్స్ భూమికి ప్రసారం చేస్తూ బైబిల్‌లోని ‘జెనెసిస్’ ప్రారంభ వాక్యాలను చదివారు. చివర్లో భూమిపై ఉన్న ప్రజలకు దేవుని ఆశీస్సులు కోరుతూ సందేశం ఇచ్చారు. నాసా అధికారిక చరిత్రలో ఈ ఘటన నమోదైంది.
చంద్రుడి దగ్గరకు వెళ్లిన మనిషి కూడా… తనతోపాటు తన విశ్వాసాన్ని తీసుకెళ్లాడు. శాస్త్రం సమాధానాలు ఇస్తుంది… కానీ కొన్ని ప్రశ్నలు మిగులుస్తుంది! మనిషి తన శాస్త్రాన్ని నమ్మి ఆకాశాన్ని జయిస్తాడు.
అదే ఆకాశం ముందు నిలబడినప్పుడు… తనకంటే పెద్దదేదో ఉందని ఆలోచిస్తాడు.
అందుకే కావచ్చు… అంతరిక్షమైనా… ఆకాశమైనా…
అణుజ్వాలలైనా… ప్రాణాపాయమైన విమానమైనా…
శాస్త్రం ఎంత ముందుకు వెళ్లినా…
మనిషి మనసు మాత్రం కొన్ని క్షణాల్లో భగవంతుడి వైపే తిరుగుతుంది!
Share this Article