మరో సీతా కల్యాణం . సీతా కల్యాణానికి కొనసాగింపే ఈ సీతారామ వనవాసం . బాపు గారి సినిమాకు పేరు , అవార్డులన్నా వచ్చాయి . కమలాకర కామేశ్వరరావు గారి ఈ సినిమాకు పేరు ఏమయినా వచ్చిందేమో కాని , డబ్బులు, అవార్డులు మాత్రం రాలేదు . సినిమా అంత నాసిదేమీ కాదు . అయినా నిర్మాత పింజల సుబ్బారావుకు ధన ప్రాప్తి ఉన్నట్లుగా లేదు .
రెండు సినిమాలలోనూ శ్రీరాముడిగా రవి నటించారు . సీతా కల్యాణం సినిమా ద్వారా తమకు ఆయన నచ్చలేదని ప్రేక్షకులు చెప్పాక కూడా ఈ సినిమాలో పింజల తీసుకోవటం హాశ్చర్యమే . సీతాకల్యాణంలో శ్రీరాముడి పాత్రకు డైలాగ్స్ లేవు , ఈ సినిమాలో ఉన్నాయి . రవి కాకుండా ఏ శోభన్ బాబు వంటి నటుడినో పెట్టుకుని ఉంటే ఆడేదేమో !
ఈ సినిమాలో దర్శకుడు చాలా ప్రయోగాలే చేసారు . కైకగా విజయలలిత , లక్ష్మణుడిగా ప్రసాద్ బాబు వంటివి . సినిమాలో నాగరాజు , జమున ఎలాగూ ఉన్నారు . పాత్రలని మారిస్తే సరిపోయేది . దీనికన్నా నాకు అసలు నచ్చని సీన్ ఏమిటంటే సీతారామ కల్యాణం తర్వాత తొలి రేయి సీన్ . శ్రీరాముడికి లవ్ సీన్లు , ఫస్ట్ నైట్ సీన్లు ప్రేక్షకులకు నచ్చవు .
Ads
జనం దృష్టిలో రాముడు విష్ణువుని మించిన దేవుడు . కృష్ణుడు కొంటెవాడు . ఆయనకు ఎలాంటి సీన్లు ఉన్నా అల్లరి కృష్ణుడు కాబట్టి ఓకే . దీని గురించి ఇంతకన్నా ఎక్కువ మాట్లాడటం సరికాదు .
ఈ సినిమాలో గొప్పగా చెప్పుకోవలసింది సత్యనారాయణ రావణుడిగా అద్భుతంగా కనిపించారు . యస్వీఆర్ తర్వాత యస్వీఆర్ అంతటి వాడు . జయప్రద సీతగా చాలా అందంగా , బాగా నటించింది . మహానుభావుడు గుమ్మడి ఎన్ని సినిమాల్లో దశరధుడిగా నటించాడో ! ఈ సినిమాతో సహా .
కౌసల్యగా అంజలీదేవి , సుమిత్రగా ఝాన్సీ , మండోదరిగా బి సరోజాదేవి , శబరిగా జమున , అనసూయగా పండరీబాయి నటించారు . రామాయణం మీద ఎన్ని సినిమాలు వచ్చాయో లెక్కే లేదు . బాహుబలి , RRR , కల్కి వంటి సినిమాల రోజుల్లో కూడా ఆదిపురుషుడు సినిమా వచ్చింది కదా !
జాగ్రత్తగా తీస్తే ఇంకా ఇంకా చూసేందుకు జనం సిధ్ధంగానే ఉన్నారు . హిందీలో జానకిరాముడు అని ఓ మెగా సీరియల్ వచ్చింది . తెలుగులో కూడా ప్రసారం అయింది . ఎంత సూపర్ హిట్టయిందో !
1977 లో వచ్చిన ఈ సీతారామ వనవాసం సినిమాకు సంగీత దర్శకుడు కె వి మహదేవన్ . పాటలు థియేటర్లో శ్రావ్యంగా ఉంటాయి . చిల్లర భావనారాయణ కధను , మాటల్ని వ్రాసారు . జయప్రద అభిమానులు చూడవచ్చు . యూట్యూబులో ఉంది . #తెలుగుసినిమాలసింహావలోకనం #తెలుగుసినిమాలు….. (దోగిపర్తి సుబ్రహ్మణ్యం)
పింజల సుబ్బారావు అంతకు ముందు జానపదాలు తీసి నాలుగు డబ్బులు సంపాదించి తర్వాత ఇట్లాంటి పౌరాణిక సినిమాలు తీసి పూర్తిగా నష్టాల పాలై చిత్ర పరిశ్రమకు కూడా దూరమైపోయారు, సినిమాయలో దెబ్బ తిన్న మంచి హిట్లు ఇచ్చిన నిర్మాత, ఈ సినిమాతో పూర్తి గా దెబ్బ తిన్నాడు… ఓ పాఠకుడి వివరణ…)
Share this Article