నిజమా స్మితా… సినిమా సెలబ్రిటీలు నిజాలు చెబుతారా..? చెప్పారా..?

ఎక్కడో ఓ మీమ్… సోనీ లివ్ ప్లాట్‌ఫామ్ కోసం సింగర్-యాక్టర్ స్మిత ‘నిజం విత్ స్మిత’ అని ఓ టాక్ షో చేస్తోంది… కాదు, చేసింది… అప్పుడెప్పుడో షూటింగ్ పూర్తయింది… తాజాగా ఇప్పుడు ప్రసారం ప్రారంభించారు… సో, పెద్దగా వర్తమాన అంశాలపై ఫోకస్ పెద్దగా ఉండకపోవచ్చు… అయితే పవన్ కల్యాణ్‌ను ఈమధ్య ఓ రాజకీయ నాయకుడిగా విపరీతంగా ప్రమోట్ చేస్తున్నాడు కదా అన్నయ్య చిరంజీవి…

పవన్ ఎప్పుడో ఓసారి ఏదో ఒక పెద్ద హోదాలోకి ఎదుగుతాడు, తన ఆవేశం, జనం పట్ల తన కన్‌సర్న్ చూసి, నక్సలైట్లలోకి పోతాడు అనుకున్నాం అని ఏదో చెప్పినట్టున్నాడు… ‘థాంక్ గాడ్, ఇంకా నక్సలిజం బతికే ఉంది’ అంటూ ఆ మీమ్ వ్యంగ్యాన్ని దట్టించింది… నిజమే అనిపించింది…

ఈ నిజం విత్ స్మిత ఫస్ట్ ఎపిసోడ్ ఆయనతోనే స్టార్ట్… సుమ అడ్డాలో కూడా మొన్నీమధ్య కనిపించాడు, అదీ ఇలాంటి టాక్ షోయే… కాకపోతే కాస్త కపిల్ శర్మ కామెడీ షోలాగా ఉంటుంది… ఆలీ, రానా, మంచు లక్ష్మి, సమంత చాలామంది టాక్ షోలు చేశారు రకరకాల పేర్లతో… బోలెడు యూట్యూబ్ చానెళ్లు కూడా చేస్తున్నాయి… టాక్ షో పెద్ద విశేషమేమీ కాదు…

పైగా సినిమావాళ్లు నిజం ఎప్పుడూ చెప్పరు… అందుకే నిజం విత్ స్మిత అనే టైటిల్ కాస్త నవ్వొచ్చేలా ఉంది… అంతులేని హిపోక్రసీ సినిమా సెలబ్రిటీల సొత్తు… అంతటి బాలకృష్ణే అన్‌స్టాపబుల్ అని ఎంత మొహమాటపెట్టినా సరే, వచ్చిన గెస్టులెవరూ నోరు విప్పడం లేదు, విప్పరు… ఇవేమీ ‘అదాలత్’ టైపు షోలు కావు కదా… పైగా స్మిత అడిగితే చెబుతారా..? కానీ..?

ఈ టాక్ షో గురించి మరేదో టాక్ షోలో ఆర్ ఇంటర్వ్యూలో మాట్లాడుతూ… ‘‘కోవిడ్ కి ముందు ఈ టాక్ షో చేయాలని అనుకున్నాము. అయితే ఆ తరువాత ఏర్పడిన పరిస్థితుల వలన ఆలస్యమవుతూ వచ్చింది. ఈ సీజన్ కి సంబంధించిన షూటింగు క్రితం ఏడాదిలోనే చేయడం జరిగింది” అని చెప్పింది ఆమె… అన్నింటికన్నా నవ్వొచ్చింది ఏమిటంటే…

“ఈ టాక్ షోలో ఎవరినేం అడిగితే ఏమనుకుంటారోనని నేను భయపడలేదు. వారు కూడా ఫలానా ప్రశ్నలు ఉండకూడదని చెప్పలేదు. షూటింగు తరువాత కొన్ని ప్రశ్నలు తీసేయమని కూడా ఎవరూ అనలేదు. ఈ టాక్ షో చాలా సీరియస్ గా ఉంటుందేమోనని అనుకున్నాను. కానీ నవ్వుతూ సరదాగానే సాగింది” అని చెప్పారు. షో పేరు నిజం విత్ స్మిత… చివరకు ఆ స్మితే నిజం చెప్పలేదు చూశారా..?

‘‘టాపిక్స్ ను బట్టి ఈ టాక్ షోకి ఆహ్వానించాం… తెలుగు సినిమాల్లో ‘నెపోటిజం’ గురించిన టాపిక్ కోసమే రానా.. నానిలను ఆహ్వానించాం… ఒకరు బలమైన సినిమా నేపథ్యం నుంచి వచ్చినవారు… మరొకరు ఎలాంటి నేపథ్యం లేని వారు. వారిద్దరూ మంచి ఫ్రెండ్స్. అందువల్లనే వారిని పిలిచాం” అన్నదామె… ఆ తరువాత ఎపిసోడ్స్ లో చంద్రబాబునాయుడు .. రాధిక .. సాయిపల్లవి .. అనిల్ రావిపూడి .. అల్లరి నరేశ్ .. దేవ కట్టా .. సందీప్ రెడ్డి .. అడివి శేష్ తదితరులు కనిపించనున్నారనీ చెప్పింది… కానీ వాళ్లను ఏయే అంశాల కోసం పిలిచారో మాత్రం చెప్పలేదు… చాన్నాళ్లుగా సాయిపల్లవి అసలు పత్తాజాడ లేదు, నరమానవుడికి దొరకడం లేదు… స్మిత టాక్‌షోకు భలే వచ్చిందే అనుకున్నాం… ఓహో, ఇది పాత షూటింగు బాపతు కార్యక్రమమా..?!