.
Subramanyam Dogiparthi …….. ఎస్ పి భయంకర్ ఒక పేరు కాదు . ఎస్ పి పాత్ర ANR , భయంకర్ పాత్ర కృష్ణంరాజు . ఇదేదో భయంకర్ అనే ఎస్పీ సినిమా అనుకొని కన్ఫ్యూజ్ అయ్యారు ఆరోజుల్లో .
సినిమా రంగంలో సుదీర్ఘ అనుభవం కల వి బి రాజేంద్రప్రసాద్ స్వంత సినిమా . ఆయనే దర్శకుడు . పైగా మళయాళంలో హిట్టయిన పోస్టుమార్టం సినిమాకు రీమేక్ మన తెలుగు సినిమా .
Ads
ఈ మళయాళం సినిమా ఎంత హిట్టయిందంటే తమిళంలో వెల్లాయ్ రోజా (1983) గా , కన్నడంలో ధర్మాత్మాగా (1988) , హిందీలో తహకీకాత్ (1993) టైటిలుతో తీసారు . అంతటి సినిమాను అంతటి నిర్మాత కం దర్శకుడు అంతగా సక్సెస్ చేయలేకపోయారు .
ఓ ఊళ్ళో చర్చి ఫాదర్ మాటంటే చాలా గౌరవం . ఆ ఊళ్ళోనే భయంకర్ అనే ఆవేశపరుడు ఉంటాడు . తన చెల్లెలు గర్భవతి అవటానికి చర్చి ఫాదరే కారణమని భావించి ఫాదర్ని గాయపరుస్తాడు . భయంకర్ చెల్లెల్ని ఆ ఊళ్ళోనే ఉండే ఒక ధనవంతుడు తన కొడుకుని ప్రేమిస్తుందని హత్య చేస్తాడు . ఆ తర్వాత చర్చి ఫాదర్ని , కొడుకుని కూడా చంపేస్తాడు .
చర్చి ఫాదర్ తమ్ముడు ఎస్పీ . ఈ కేసుని పరిశోధించి అసలు హంతకుడిని పట్టుకోవటానికి ప్రయత్నిస్తాడు . ఆ పెనుగులాటలో విలన్ చనిపోతాడు . భయంకర్ విడుదలయి ప్రియురాలు విజయశాంతిని పెళ్లి చేసుకుంటాడు . ఇదీ కధ టూకీగా .
విశాఖపట్నం చుట్టుపక్కల ఔట్ డోర్ షూటింగ్ చేసారు . అక్కినేని ద్విపాత్రాభినయం చేసారు . ఫాదర్ , ఎస్పీ పాత్రలను పోషించారు . ఫాదర్ కాక ముందు పూర్వాశ్రమంలో శ్రీదేవి ప్రియురాలిగా ఓ పాటలో తళుక్కుమంటుంది .
కోట శ్రీనివాసరావు ఆకు రౌడీగా ఓ చిన్న పాత్రలో కనిపిస్తాడు . ఇతర ప్రధాన పాత్రల్లో సురేష్ ,గీత , హేమసుందర్ , గొల్లపూడి , పి యల్ నారాయణ , జీవా , రాళ్ళపల్లి , డబ్బింగ్ జానకి , రమాప్రభ , సంయుక్త , సిల్క్ స్మిత , ప్రభృతులు నటించారు .
మాటల్ని పాటల్ని ఆచార్య ఆత్రేయ వ్రాసారు . ఆత్రేయ డైలాగులకూ ఏమొచ్చెలే అనే డైలాగ్ కూడా ఉంటుంది కృష్ణంరాజుకు . తన మీద తనే జోక్ వ్రాసుకున్నారు ఆత్రేయ . పాటలు బాగుంటాయి . హైలైట్ సిల్క్ స్మిత కస్సుకస్సుమంటోంది వయసు పాటే . స్మిత , కృష్ణంరాజుల మీద ఉంటుంది . అక్కినేని , శ్రీదేవిల మీద కానీ కానీ కానీ రాతిరి కానీ అంటూ సాగే డ్యూయెట్ అందంగా చిత్రీకరించారు .
అన్ని డ్యూయెట్లనీ అందంగా చిత్రీకరించారు రాజేంద్రప్రసాద్ . ఆజా దేఖో మజా అంటూ సాగే ఓ ఖవాలీ పాట అక్కినేని , గొల్లపూడిల మీద ఉంటుంది . గొల్లపూడి పాత్ర కాస్త అతిగా ఉంటుంది . వస్తూ వస్తూ ఏం తెచ్చావ్ అంటూ సాగే పాట సురేష్ , గీతల మీద కూడా బాగుంటుంది . ఒక్కసారి చూసుకుంటా అంటూ సాగే డ్యూయెట్ కృష్ణంరాజు , విజయశాంతిల మీద హుషారుగా ఉంటుంది .
సినిమా యూట్యూబులో ఉంది . ఇంతకుముందు చూడని అక్కినేని , కృష్ణంరాజు అభిమానులు చూడవచ్చు . కృష్ణంరాజు బాగా నటించారు . గ్లామర్ స్పేసుని ఒక్క పాటలో కనిపించే అతిలోకసుందరి , కాసేపు కనిపించే సిల్క్ స్మిత సినిమా అంతా కనిపించే విజయశాంతి బాగానే ఫిల్ చేసారు . రమాప్రభ పాత్ర కూడా బాగుంటుంది . మొత్తం మీద చూడబులే . #తెలుగుసినిమాలసింహావలోకనం #తెలుగుసినిమాలు #సినిమాకబుర్లు
Share this Article