నంబిని నట్టేట ముంచిన ‘ఆ శక్తి’ ఎవరు..? ఆ కుట్రను ఎవరు ఛేదించాలి..?!

ఈ కేసు పెట్టడానికి నెల ముందు… మాల్దీవులకు చెందిన మరియం, రషీదా అనే మహిళల్ని వీసా ఎక్స్‌పైర్డ్ అనే ఆరోపణలతో పోలీసులు అదుపులోకి తీసుకున్నారు… కొన్ని వారాల తరువాత మాల్దీవుల కేపిటల్ మాలే నుంచి ఫౌజియాను కూడా అరెస్టు చేశారు… వాళ్లు ఈ నంబిని ట్రాపులో పడేసి, మన రాకెట్ టెక్నాలజీని తీసుకుని, పాకిస్థాన్‌కు అమ్మేసుకున్నారు అనేది ఆరోపణ… సహజంగానే ఆయన్ని కోర్టులో ప్రవేశపెట్టగానే జడ్జి రిమాండ్‌కు పంపించేశాడు… రాకెట్ టెక్నాలజీని శత్రుదేశానికి అమ్మడం అనేది మామూలు కేసు కాదు కదా… జస్ట్, ఆ లోకల్ పోలీసులే కేసు పెట్టేశారు… అసలు ఎంత లోతుగా దర్యాప్తు చేయాలి..?

తరువాత జైలు నుంచి కస్టడీకి తీసుకుని, మంచానికి కట్టేసి కొట్టేవాళ్లు… రోజుల తరబడీ చిత్రహింసలు పెట్టేవాళ్లు, లై డిటెక్టర్ టెస్టులు… నంబి చెప్పింది అసలు వాళ్ల బుర్రలకు ఎక్కితే కదా… అదేమిటీ అంటే..? ‘‘ఏ టెక్నాలజీని నేను పాకిస్థాన్‌కు అమ్మాను అంటున్నారో అది అసలు మనం డెవలప్ చేయనేలేదు… ఇంకా ట్రయల్స్ జరుగుతూనే ఉన్నయ్… నిజానికి ఆ టెక్నాలజీని కాగితాలపై ఎక్స్‌ప్లెయిన్ చేయలేం, మరి నేను అమ్మింది ఏమిటి..?’’ చాలా స్ట్రెయిట్ ప్రశ్న… మరి ఇస్రో ముఖ్యులు ఎందుకు ఈ కేసులో ఇన్వాల్వ్ కాలేదో తెలియదు… 50 రోజులు గడిచాక సీబీఐ కేసు టేకప్ చేసింది… వాళ్లకు విషయం అర్థమైంది… తరువాత కొన్నాళ్లకు ఆయనకు బెయిల్ వచ్చింది…

ఈలోపు ఆయన భార్య మానసిక ఆరోగ్యం దెబ్బతిన్నది… ఈయనకు జరిగిన నష్టం అంతా ఇంతా కాదు… 1996 లోనే సీబీఐ ఈయనతోపాటు మిగతా వారిని కూడా నిర్దోషులుగా పేర్కొంది… అంతేకాదు, ఇస్రో కూడా అంతర్గత దర్యాప్తు జరిపింది… క్రయోజనిక్ టెక్నాలజీకి సంబంధించిన ఇంజన్ డ్రాయింగులు నంబి దగ్గర లేవని తేల్చారు… కథ ఇక్కడ ముగియలేదు… సీబీఐ నివేదికను వ్యతిరేకించిన కేరళ సర్కారు సుప్రీం దాకా వెళ్లింది… 1998లో కేరళ ప్రభుత్వం చేసిన అప్పీళ్లను కొట్టేసింది సుప్రీం… ఇక్కడ మరో కథ మొదలైంది…

తనను అక్రమంగా కేసులో ఇరికించారు, అనేకరకాలుగా నష్టపరిచారు అని నంబి కేసు వేశాడు… 50 లక్షలు కక్కండి అని కేరళ ప్రభుత్వాన్ని సుప్రీం ఆదేశించింది… వేధింపులు, మానసిక ఒత్తిడి, పరువు నష్టం తదితర అంశాలకు సంబంధించి 1.30 కోట్లు అదనంగా ఇవ్వాలని చెప్పింది… ఏళ్లు గడుస్తూనే ఉన్నయ్… అసలు నన్ను ఈ తప్పుడు కేసులో ఇరికించిన వారెవరు..? వాళ్ల ఉద్దేశం ఏమిటి..? అసలు కుట్రదారులు ఎవరు..? అది కదా తేలాల్సింది అంటాడు ముసలాయన… నిజమే కదా…

2018లో సుప్రీంకోర్టు అసలు కేరళ పోలీసుల పాత్రపై దర్యాప్తు జరపాలని ఆదేశించింది… తన అనుభవాల్ని పేర్కొంటూ Ready to Fire, How India and I survived ISRO spy case రెండు పుస్తకాలు రాశాడు… కేంద్రం తనకు 2019లో పద్మభూషణ్ కూడా ఇచ్చింది… ఈయన బయోపిక్ రాకెట్రీ వచ్చింది, హిట్టయింది, ఈకేసు దేశవ్యాప్తంగా చర్చనీయాంశమైంది… సుప్రీం ఆదేశించినా సరే, తప్పుడు కేసులు పెట్టిన పోలీసులపై దర్యాప్తు లేదు, ఆ కేసుల వెనుక కుట్రల్ని తవ్విందీ లేదు… అదుగో ఇప్పుడు ఏకంగా సీబీఐ డైరెక్టర్‌నే ఆదేశించింది సుప్రీం… ఈ కథ ఇలా అనంతంగా సాగుతూనే ఉంది… ఇప్పుడు చెప్పండి… వంద మంది దోషులు తప్పించుకున్నా పర్లేదు, ఒక్క నిర్దోషి కూడా శిక్షింపబడకూడదు అనేది కదా మన మౌలిక న్యాయసూత్రం… మరి నంబిలాగే తప్పుడు కేసులకు ‘‘శిక్షలు అనుభవిస్తున్న’’ వాళ్ల మాటేమిటి..? ఇలా దేశంలో ఎందరు..? వేలు…!! అవునూ… చైనా ప్లస్ సీపీఎం ప్లస్ కేరళ సర్కార్ కోణంలో ఈ కేసును NIA దర్యాప్తు చేస్తే ఎలా ఉంటుంది యువరానర్…?!