అంతటి గండరగండడు కూడా ఆ డైలాగ్ దగ్గర ఇరుక్కుపోయాడు!

.

సంపూర్ణ రామాయణంలో, రావణపాత్రకు యస్వీయార్ అంగీకరించడమే ఓ విశేషం. రాజమాత పాత్ర కావాలని అడిగిన జమున కైక పాత్రకు ఒప్పుకోవడం, కేవలం ట్రిక్ ఫోటోగ్రఫీకి మాత్రం రవికాంత్ నగాయిచ్ గారు ఒప్పుకోవడం, మూడూ రాముడిచ్చిన వరాలుగా భావించారు, బాపు రమణలు.

* * *
యస్వీయార్ గారి గురించి అందరూ భయపెట్టారు, బాపు రమణలను. ఏమనీ ! ‘ఆయన సురాహార దీక్షలో పడితే, ఇంతే సంగతులు. ఒకవేళ దీక్ష విరమించినా పదిరోజులు పాత్రలో మమేకం, మరో పదిరోజులు మైకమే. ‘ అని.
కానీ అలా ఏం జరగలేదు, వీరి విషయంలో మాత్రం. వారి బాల్యమిత్రుడిలా పసివాడిలాగా వారితో కలిసిపోయారు ఎస్ వీ యార్. అంతేకాదు ఉదయం ఆరుగంటలకే వచ్చి, పనికి వుసిగోల్పేవారు.

ఆ రోజుల్లో శోభనుబాబుకి నలభై, ప్రతినాయకుడు రంగారావుకు అరవై వేలు ఇచ్చారు పారితోషికం.

యస్వీయార్ గారు తన సంభాషణలను అలవోకగా, సునాయాసంగా చెప్పసాగారు. సెట్లో అందరూ చప్పట్లు కొట్టేవాళ్ళు. ఒకసారి ఒక భారీ డైలాగు చెప్పి, అందరి మన్ననలూ అందుకుని, టీ తాగుతూ సిగరెట్టు పొగ విలాసంగా వదులుతూ… ‘ అదిరా సంగతి.. అదిరా ఎస్వీయార్ అంటే ! ఈ సో కాల్డ్ స్టార్స్ లో ఎవడైనా యెంత గొప్పవాడైనా ఈ రంగారావులా మరిచి పోకుండా, మాట తప్పకుండా చెప్పమన౦డిరా… ఛాలెంజ్. చెప్పలేరు. వాళ్లంతా నాముందు బలాదూర్ ! ‘ అనేసారు, ‘ అహంకారంగారావు ‘ పాత్రలో.

* * *
ఈ మాటలు వింటున్న బాపు రమణలకు, యూనిట్లో వారికీ భయంవేసింది. పైవాడు కూడా గమనించినట్లు వున్నాడు, ఆ పలుకులు.
ఇంకో టేకులో పైవాడు పాఠం చెప్పేసాడు. ‘ మహావీరా ! మంత్రవిద్యా విశారదా మారీచా ! నీకేల ఈ ముని మ్రుచ్చువృత్తి ? ‘ అదీ రంగారావు గారు చెప్పవలసిన డైలాగు. అది ఇబ్బంది పెట్టింది ఆయనను. మంత్ర విద్యా విశారదా దగ్గర ఇరుక్కుపోయారు. ప్రతిసారీ, ఆయన ‘ విధ్యా విశారథా ‘ అంటుండేవాడు. బాపు ఆయన దగ్గరకు వెళ్లి మెల్లగా, ‘ వత్తులు లేవు సర్ ‘ అనేవారు.

‘ వాట్ ! వత్తుల్లేకుండా డైలాగు ఏమిటీ ? సరిగా చూడండి, రావణుడు బ్రాహ్మణుడు కదా ! ‘
‘ అయినా సరే ! వత్తులు లేవు సర్ ‘ రమణ గారు. ఈసారి ఒక చోట వత్తు తీసి రెండోచోట అలానే వుంచి చెప్పారు. బాపు గారు మాత్రం అంతకుముందే అందరినీ హేళన చేసాడనే పంతం కొద్దీ, మళ్ళీ చెప్పమన్నారు. ఎంతకీ కుదరడం లేదు. టెన్షన్ పెరిగిపోతున్నది.

‘ సర్లెండి.’ అని బాపూ గారు సరిపెట్టుకుంటున్నట్లుగా అనేసరికి, ఈసారి రంగారావు గారికి పంతంవచ్చి, లేచి చిరాగ్గా మేకప్ రూమ్ లోకి వెళ్లారు.
సాయంకాలం అయింది. బయటకు రావడంలేదు.

* * *
‘ టిఫిన్ తెప్పించనా ! ‘ రమణ గారు.
‘ తిన్నానుగా తట్టెడు. టిఫినొద్దు. దమ్ములాగనీ ‘ అని ఘాటుగా దమ్ములాగారు. ‘ పొగరు తగదు. అహం దెబ్బకొట్టింది. రమణా సారీ ! ‘ అన్నారు ఎస్వీయార్. ‘ ఎస్ సర్ ! రాముడికి కోపం వచ్చింది, రావణాసురుడి మీద. ‘ రమణ గారు.
ఏమనలేక నవ్వేశారు ఎస్వీయార్. ‘ సరే టిఫిన్ తెప్పించు. అది తినివస్తే, టేకులు తినడం ఉండదేమో ! ‘ అన్నారు ఎస్వీయార్….. (ఇంకోతి కొమ్మచ్చిలోనిదే ఈ ఎపిసోడ్)…