చప్పట్లు, శాలువాలు, దండలు, అవార్డులు దక్కాల్సింది రాధికకు కూడా..!!

.

Subramanyam Dogiparthi ……. నెత్తురు వస్తేనే విప్లవం కాదు ; నెత్తురు , అరుపులు లేకుండా కూడా నిశ్శబ్ద విప్లవాలను తీసుకుని రావచ్చు . అలాంటి నిశ్శబ్ద విప్లవ వీరుడు విశ్వనాథ్ . మొగోడికో నీతి ఆడదానికో నీతా అని నిర్మలమ్మ పాత్ర చేత నిలేయిస్తాడు విశ్వనాథ్ . భార్య చనిపోయాక మూడు నెలలకే రెండో పెళ్లి చేసుకున్న నువ్వటరా ప్రశ్నించేదని అల్లుడు సుత్తి వీరభద్రరావుని వాయిస్తుంది .

సినిమా ఫోకస్ ఈ విధవా వివాహం మీద కాకపోయినా అంతర్లీనంగా ఈ విప్లవ భావాన్ని జొప్పించారు విశ్వనాథ్ . సినిమా ఫోకస్ వయసు పెరిగినా బుధ్ధి పెరగని ఒక అమాయకుడిని , స్వాతిముత్యాన్ని ఓ నిస్సహాయ విధవ అనూహ్య పరిస్థితుల్లో భార్య అయి ఎలా ప్రయోజకుడిని చేసుకుంటుంది అనే అంశం మీదనే . మా తరం వాళ్ళకు అక్కినేని , సావిత్రిలు నటించిన అర్ధాంగి సినిమా గుర్తుకొస్తుంది . కధానాయికలు అర్ధాంగులు కావటంలో చాలా వ్యత్యాసం ఉంది .

• 1986 మార్చి 13 న విడుదలయిన ఈ స్వాతిముత్యం సినిమా అనగానే ఎక్కువ మందికి కమల్ హాసన్ , విశ్వనాధులే గుర్తుకొస్తారు . వారిద్దరికీ అవార్డులు కూడా వచ్చాయి . అంతే ధీటుగా , బహుశా ఇంకా గొప్పగా రాధిక నటించింది . ఆమెకు అవార్డు ఎందుకు రాలేదో నాకెప్పుడూ ఆశ్చర్యమే . ఏ ఎమోషనైనా భలే పలికించగలదు ఆమె .

ఈ సినిమాలో మరో మంచి పాత్ర దీపది . ఆల్మోస్ట్ అన్ని సినిమాల్లో గ్లామరస్ రబ్బర్ బొమ్మగా చూపబడే దీపకు చాకలి పాత్రను ఇచ్చి , ఆ పాత్రలో దీప చేత గొప్ప నటనని రాబట్టారు విశ్వనాథ్ .

నిర్మలమ్మ . మన మహానటీమణుల్లో ఒకరు ఆమె . ఆర్ద్రత , కరుణ , ప్రశ్నించే పాత్రల్లో ఆమెకు ఆమే సాటి . ఈ సినిమాలో కూడా గొప్ప నటనని అందించారు . ఇతర ప్రధాన పాత్రల్లో శరత్ బాబు , మేజర్ సుందరరాజన్ , సుత్తి వీరభద్రరావు , డబ్బింగ్ జానకి , వరలక్ష్మి , అనిత , వై విజయ , గొల్లపూడి మారుతీరావు , ఆలీ , సోమయాజులు , పొట్టి ప్రసాద్ నటించారు .

ఈ సినిమాలో మరో ముఖ్య పాత్ర రాధిక సినిమాలో కనిపించని మొదటి భర్త కొడుకు . పేరు కార్తీక్ . ప్రముఖ నటుడు కాంతారావు మనమడు . అల్లు అర్జున్ కూడా మనమళ్ళలో ఒకడిగా తళుక్కుమంటాడు . కార్తీక్ కమల్ హాసన్ దోస్తుగా చాలా బాగా నటించాడు .

ఈ సినిమా ఘన విజయానికి , ఓ శ్రవణ కావ్యంగా మిగిలిపోవటానికి కారణం ఇళయరాజా సంగీతం , సి నారాయణరెడ్డి, ఆత్రేయ, సిరివెన్నెల సీతారామ శాస్త్రుల పాటల సృష్టి , బాలసుబ్రమణ్యం సుశీలమ్మ జానకమ్మ శైలజల తీయటి గాత్రం .

రామా కనవేమిరా శ్రీరఘురామ కనవేమిరా హరికధను ఆత్రేయ ఎంత గొప్పగా వ్రాసారు !! సినిమాకు ఆయువుపట్టు కూడా ఈ పాట . సీతారాముల కళ్యాణం , ధనాల్న మంగళసూత్రాన్ని లాగేసుకుని కమల్ హాసన్ రాధిక మెడలో కట్టేసే సన్నివేశాలే సినిమాను మలుపు తిప్పుతాయి .

ప్రతీ పాట మధురమే . అయినా ఇళయరాజాకు అవార్డు ఎందుకు రాలేదో ఆశ్చర్యంతో పాటు బాధ కూడా కలుగుతుంది . లాలీ లాలీ లాలీ లాలీ వటపత్ర సాయికి వరహాల లాలీ రాజీవ నేత్రునికి రతనాల లాలీ పాటను నారాయణరెడ్డి గారు ఎంత బాగా వ్రాసారో !! ఆయన వ్రాసిందే మరో సుందర మధుర గీతం మనసు పలికె మౌనగీతం . విశ్వనాథ్ అద్భుతంగా చిత్రీకరించారు .

నాకు బాగా ఇష్టమైన మరో పాట దీప , కమల్ హాసన్ల మీద సాగే పాట . ఆత్రేయ వ్రాసిన తాళి బొట్టు తెస్తానని తాళ్ళరేవుకెళ్ళిండు మామ . కమల్ హాసన్ని ఆ ఉరి జనమంతా పసిపిల్లవాడిగా ఎలా చూస్తారో దీప అతని చేత వీపు రుద్దించుకునే సీన్ తెలియచేస్తుంది . ఇంతటి శృంగార రసభరిత , సున్నితమైన సీన్లను సినిమాలో దూర్చటం విశ్వనాధుకి బాగా తెలుసు . ఈ సీన్ చూడగానే సాగర సంగమం సినిమాలో జయప్రద స్నాన సన్నివేశం గుర్తుకొస్తుంది రస హృదయులకు .

సువ్వీ సువ్వీ సువ్వాలమ్మ సీతాలమ్మా , చిన్నారి పొన్నారి కిట్టయ్యా నిన్నెవరు కొట్టారయ్యా పాటలు చాలా శ్రావ్యంగా ఉంటాయి . ముఖ్యంగా చిన్నారి పొన్నారి కిట్టయ్యా పాట చిత్రీకరించబడిన దేవాలయం అద్భుతంగా ఉంటుంది . ఎక్కడిదో ఈ దేవాలయం తెలియదు . ఈ సినిమాలో ఉన్న మరో పాట ధర్మం శరణం గఛ్ఛామి దానం శరణం గఛ్ఛామి అని దానాన్ని కూడా తగిలించారు ఆత్రేయ . తోటపల్లి సాయినాధ్ , ఆకెళ్ళ వెంకట సూర్యనారాయణ చక్కటి సంభాషణలను అందించారు .

సినిమాకు కనకంతో పాటు , ప్రశంసలు , పురస్కారాలు కూడా వర్షించాయి . జాతీయ స్థాయిలో ఉత్తమ తెలుగు చిత్రంగా ఎంపికయింది . ఉత్తమ చిత్రంగా ఏడిద నాగేశ్వరరావుకు , ఉత్తమ నటుడిగా కమల్ హాసనుకి , ఉత్తమ దర్శకునిగా విశ్వనాధుడికి నంది అవార్డులు వచ్చాయి . విశ్వనాధుడికి ఉత్తమ దర్శకునిగా ఫిలిం ఫేర్ అవార్డు కూడా వచ్చింది . ఆస్కార్ అవార్డుకి పంపబడింది కానీ ఎంట్రీ రాలేదు . ఇదీ ఘనమే . ఎన్నో ఫిలిం ఫెస్టివల్సులో ప్రదర్శించబడింది .

ఈశ్వర్ అనే టైటిలుతో విశ్వనాధే హిందీలోకి రీమేక్ చేసారు . కన్నడంలోకి రీమేక్ చేయబడిన సినిమాలో సుదీప్ , మీనా నటించారు . తమిళంలోకి డబ్ చేయబడింది . శంకరాభరణం తీయబడిన పట్టిసీమ ప్రాంతంలో , తొర్రేడు , రాజమండ్రి ప్రాంతాలలో షూటింగ్ చేయబడింది .

ఇంత అందమైన నిశ్శబ్ద విప్లవ సంగీత భరిత చిత్రాన్ని చూడని తెలుగు ప్రేక్షకుడు మా తరంలో ఉండరేమో ! ఈతరంలో ఎవరయినా ఒకరూ అరా ఉంటే అర్జెంటుగా చూసేయండి . బిపి ఉంటే తగ్గుతుంది . మనసు తెలియని అందాల సంగీత లోకాల్లో విహరిస్తుంది . యూట్యూబులో ఉంది . An unmissable musical super hit movie . #తెలుగు_సినిమాల_సింహావలోకనం #సినిమా_స్కూల్ #సినిమా_కబుర్లు #తెలుగు_సినిమాలు