అఫ్ఘన్ మహిళ వెన్నులో చలి..! తాలిబన్ విపత్తులో ఫస్ట్ బాధితురాలు తనే..!!

యుద్ధమే కాదు… ఏ విపత్తు వచ్చినా ముందుగా బలయ్యేది స్త్రీలు, పిల్లలు… ప్రకృతి విపత్తు కావచ్చు, మనిషి సృష్టించిన విపత్తు కావచ్చు… ఆకలి, అత్యాచారం, పీడన, మరణం, వలస, భయం, కన్నీళ్లు, కడుపుకోత… స్త్రీకే ఎక్కువ కష్టం… ఇప్పుడు అప్ఘన్ మహిళ గడగడా వణికిపోతోంది… మళ్లీ మేం చీకటియుగంలోకి ప్రయాణించాల్సిందేనా..? ఇదీ భయం… ఇదీ వణుకు… తాలిబన్ల పాలన వచ్చేసినట్టే… అంటే అఫ్ఘన్‌ను ఆ పాతరాతి యుగంలోకి నడిపించబోతున్నట్టే… ఆల్ రెడీ అఫ్ఘన్ మహిళలకు కష్టాలు ప్రారంభమైన వార్తలు వచ్చేస్తున్నయ్… ప్రపంచం ఇకపై నిశ్శబ్దంగా… అవును, నిశ్శబ్దంగా ఓ పాశవిక పాలనను చూడబోతోంది… రాజకీయాలు, రాజ్యాల మధ్య ఆధిపత్య పోరాటాలు అంతిమంగా ఇదుగో, ఇలాంటి ఫలితాల్నే ఇస్తయ్… ఇస్తున్నయ్… ఇస్తూనే ఉంటయ్… మరి దీనికి పరిష్కారం..? ఇప్పట్లో కనిపించడం లేదు… కారణాలు బోలెడు… సగటు అప్ఘన్ ఆడపిల్లల భవిష్యత్తు ఏమిటో కాలమే చెప్పాలి…

ఎస్, అప్ఘన్‌లో తాలిబన్ల రాజ్యం రావడం ఇండియాకు ఖచ్చితంగా నష్టదాయకమే… అది మనకు మిత్రరాజ్యంగా ఉండటమే మనకు వ్యూహాత్మకంగా చాలా మేలు… అందుకే అక్కడ హిందూ, సిక్కు, బౌద్ధ సమూహాలపై ఎన్ని దాడులు జరుగుతున్నా… ఎంతమంది అక్కడ ఉండలేక వలస వచ్చేస్తున్నా… మనం ఆ దేశానికి స్నేహహస్తాన్నే అందించాం, వేల కోట్లను ఖర్చుచేశాం… అదంతా అఫ్ఘన్ గుట్టల్లో పారబోసినట్టే… మనం కట్టించి ఇచ్చిన నీటి ప్రాజెక్టును కూడా ధ్వంసం చేయబోతున్నారు తాలిబన్లు… అది వారి మానసిక ధోరణికి అద్దం పట్టే చర్య… బుద్ధ విగ్రహాలను ఎలా పేల్చేశారో అప్పట్లో చూశాం కదా… ఇప్పుడూ అంతే… అంతర్జాతీయ రాజకీయాల కోణంలో ఇండియాకు తాలిబన్ల ప్రాబల్యం దుశ్శకునమే… పాకిస్థాన్ అనే ఓ రౌడీ ఎలిమెంట్ బ్రోకరిజానికి తోడు రష్యా, అమెరికా, చైనా ఆడబోయే, ఆడుతున్న డర్టీ పొలిటికల్ గేమ్ ఇండియాకు చిక్కులు తెచ్చిపెట్టబోతోంది… ఎందుకంటే, ఇస్లామిక్ ఉగ్రవాదానికి ఫస్ట్ టార్గెట్ ఇండియాయే కాబట్టి… తాలిబన్లు ఆ టెర్రరిజంలో ఆరితేరిన ఘటాలు కాబట్టి… అయితే… ఎలాగూ ఇండియాకు తప్పదు… పాకిస్థాన్, చైనాలతో నిత్యసమరమే కదా… దానికి ఓ కొత్త బెడద అదనం… కానీ ఇప్పుడు ప్రపంచం చూస్తున్నది సగటు అప్ఘన్ బాలిక వైపు… తాలిబన్ కోరలకు చిక్కబోయే యువతుల వైపు…