ఫాఫం ఆది సాయికుమార్… ఓ శాపగ్రస్తుడు… తీస్‌మార్‌ఖాన్ తన తప్పిదమే…

ఇది ఖచ్చితంగా ఆది తప్పే… ఆది అంటే పినిశెట్టి ఆది కాదు… సాయికుమార్ కొడుకు ఆది… పుడిపెద్ది ఆది… పీజే శర్మ మనమడు… నటుడు, డబ్బింగ్ ఆర్టిస్ట్ రవిశంకర్ తనకు బాబాయ్… మంచి నటనకు, మంచి వాయిస్ ఓవర్‌కు పెట్టింది పేరైన ఆ కుటుంబంలో ఆది ఓ హిట్ కోసం తన్నుకుంటున్నాడు పదకొండేళ్లుగా… తను ఏదో తక్కువ చేస్తాడని కాదు… తన మ్యాగ్జిమం ఇస్తాడు… కానీ ఓ శాపగ్రస్తుడు…

తీసిన సినిమాలన్నీ ఫట్… మరీ కొన్నాళ్లుగా ఇంకా ఎక్కువ… ఇలాంటి సమయాల్లో ఏ సినిమా ఎంపిక చేసుకోవాలనే అంశంలో జాగ్రత్త అవసరం… పెద్ద పెద్ద హీరోలే మాస్, రొటీన్ ఫార్ములా, రుద్దుడు, బిల్డప్ స్టోరీలు తీస్తే మట్టిగొట్టుకుపోతున్నయ్… జనం ఈడ్చి తంతున్నారు… ఏదో ఓ పిచ్చి కమర్షియల్ వాసనలతో ఓ సినిమా తీసి వదిలితే జనం చూస్తారనేది ఓ మూర్ఖమైన భ్రమ… మరీ ప్రస్తుతం ప్రేక్షకుడి టేస్ట్ మారిపోయిన నేపథ్యంలో, థియేటర్లంటేనే మొహం చాటేస్తున్న రోజుల్లో తను ఎన్నుకున్న కథేమిటి..?

నిఖిల్ వంటి చిన్న హీరోలు సైతం కొత్త కథలతో దేశమంతా దుమ్మురేపుతుంటే, ఇంకా ఆది సాయికుమార్ ఏ రోజుల్లో ఉండిపోయాడు..? అవకాశాల్లేని నటిలాగా మరీ ఈ తీస్‌మార్‌ఖాన్ సినిమా బరితెగించినట్టుగా ఉంది… ఆ పాటలు చూస్తుంటే మరీ వెగటుగా ఉన్నయ్… అసలే పాయల్ రాజ్‌పుత్ హీరోయిన్… ఒక పాటలోనైతే వ్యాంపుకన్నా అధ్వాన్నంగా కనిపించింది… ఆ డైరెక్టర్, ఆ నిర్మాతల టేస్టు సరే… కనీసం తనను నటుడిగా మరింత దిగజారుస్తుందనే సోయి ఆదికైనా ఉండాలిగా… పైన ఫోటో చూస్తే అర్థమవుతోందిగా… (ఇలాంటి గలీజు ఫోటోను పెట్టాల్సి వచ్చినందుకు క్షమించండి)…

ఓ స్టూడెంట్, పోలీస్ కావాలనుకుంటాడు… ఓ సిస్టర్ సెంటిమెంట్… పోలీస్ అవుతాడు… కానీ సిస్టర్, బావ హత్యలతో కథ మలుపు తిరుగుతుంది… సినిమా కథ కాస్తా ఈ సెంటిమెంట్ నుంచి మరో దారిలోకి వెళ్తుంది… ఎటు పోతుందో, ఎక్కడ ఆగి, శుభం కార్డు పడుతుందో దర్శకుడికైనా ఐడియా ఉందానేది డౌటే… ఇంకా ఈ సినిమా గురించి పెద్దగా చెప్పుకోవడం స్పేస్ వేస్టు… ఫాఫం ఆది అని జాలిపడటం తప్పితే ఇంకేమీ లేదు… లేదు… ఏమండీ సాయికుమార్… నీ గైడెన్స్ కూడా లేదా నీ కొడుక్కి..?!