దటీజ్ రాజనాల..! వేషం దొరికితే చాలు, దర్శకులకే క్లాసులు…

వీరాభిమన్యు సినిమాలో రావికొండలరావుగారు ద్రోణాచార్యుడి వేషం వేశారు …

రాజనాల దుర్యోధనుడు వేశారు.

ఓ సన్నివేశంలో గురువు ద్రోణుడి కాళ్లు శిష్యుడు దుర్యోధనుడు కడగాలి …

అప్పుడు రాజనాల నేరుగా రావి కొండలరావుగారి దగ్గరకు వచ్చి …

ఏమయ్యా కొండల్రావూ … చివరకి నీ కాళ్లు కడగాల్సిన పరిస్థితి వచ్చింది అనేశారట.

కొండలరావుగారు ఏమీ మాట్లాడకుండా అలా ఉండిపోయారట.

అసలు ఈ సీనును డూపుతో మేనేజ్ చేస్తే ఎలా ఉంటుందనే ప్రతిపాదన యూనిట్ వాళ్లతో చేశారట రాజనాల …

విషయం దర్శకుడు వి. మధుసూదనరావుగారి దగ్గరకు పోయింది.

అదేంటి సీను లో రైటర్ ఏం రాశాడు … కాళ్లు కడిగి ఈ నీరు నెత్తిన జల్లుకోమని కదా …. అలాగే సీను ఉంటుంది.

అందులో ఏ మార్పూ ఉండదు… ఒక వేళ ఆయనకి ఇబ్బంది అయితే …. ఇంకో దుర్యోధనుడ్ని చూసుకుందాం … అనేశారట..

దీంతో … రాజనాలగారు దారిలోకి వచ్చేసి సీను చేసేశారట …

మరి అంతటి రాజనాలగారున్నూ …

తర్వాత రోజుల్లో వేషాలు లేక ఉన్నదంతా అనేక విధాల కరిగిపోగా …

రకరకాల ఇబ్బందులతో … ఉన్న రోజుల్లో …

అదే రావి కొండలరావు గారి దగ్గరకు వచ్చి …

ఏవైనా వేషాలుంటే చెప్పండీ చాలా దారుణంగా ఉంది పరిస్థితి అని గోల చేస్తుంటే …

…..

ఓ సినిమాలో ముసలి తల్లిదండ్రుల పాత్రలకు రావికొండలరావుగారినీ , రాధాకుమారిగారినీ బుక్ చేశారట.

రాజనాల బాధ విని .. అందులో ఆ భర్త పాత్ర రాజనాలకు ఇవ్వండని తను ఆ సినిమా నుంచీ తప్పుకున్నారట … కొండల్రావు గారు.

వేషం దొరికిన తర్వాత రాజనాల లోని ఒరిజినల్ బయటకు వచ్చేశాడట పాపం ..

సీన్ ఎలా తీయాలి అని దర్శకుడికి క్లాసు చెప్పడం లాంటి కార్యక్రమాలు మొదలెట్టేశాడట ..

దీంతో ఆ చిత్ర నిర్మాత దర్శకులు కొండలరావుగారికి ఫోన్ చేసి ఏమిటి మాస్టారూ మీరు ఈయన్ని తగిలించారూ అని తలపట్టుకున్నారట…

మీరు మాట్లాడండీ అంటే … అబ్బే ఆయన పెద్ద నటుడు … ఆయనకి నేనెలా చెప్తానూ … ఈ రెండ్రోజులూ అలా భరించేయడమే అన్నారట ఈయన.

ఇలా ఉంటుందయ్యా వరస అని ముగించారు కొండలరావుగారు …

ఆ రాజనాలకు తొలిసారి అవకాశం ఇచ్చిన హెచ్.ఎమ్ .రెడ్డిగారు తీయించిన మేకప్ స్టిల్ … ఇక్కడ తగిలిస్తున్నాను …