ఓహో… ఆ చెఫ్ తుమ్మ సంజయ్‌ను కూడా షోలోకి పట్టుకొచ్చారుగా…

తుమ్మ సంజయ్… ఒక పక్కా తెలంగాణ మాస్టర్ చెఫ్… కొన్నాళ్లు అమెరికాలో రెస్టారెంట్ నడిపి, ఇండియాకు వచ్చి, భార్య రాగిణితో సహా బోలెడు ఫుడ్ వీడియోల్ని యూట్యూబ్‌లో అప్‌లోడ్ చేసేవాడు…

ఇప్పుడు కోట్ల వ్యూస్ సంపాదిస్తున్న పిల్లిబిత్తిరి యూట్యూబర్లకన్నా ఎన్నో ఏళ్ల ముందే ఫుడ్ వీడియోలను ప్రేక్షకుల్లోకి తీసుకువెళ్లాడు… మాస్టర్ చెఫ్ షో జడ్జి, పలు టీవీ ఫుడ్ షోలకూ జడ్జి… హైదరాబాద్‌కు దగ్గరలో ఉన్న ఆలేరు వాళ్ల నేటివ్… ఒక కొడుకు, తను కూడా ఫుడ్ మాస్టరే… సొంత ఫామ్ డెవలప్ చేసుకుంటూ ఈనడుమ ఫుడ్ వీడియోలు తగ్గించినట్టున్నాడు సంజయ్…

అప్పట్లో ఓ వీడియోలో… ఏదో పండుగ సందర్భాన్ని పురస్కరించుకుని ఓ ఫుడ్ వీడియో పెడుతూ భార్యతో సహా బీర్ తాగుతున్న వీడియో సంచలనం రేకెత్తించింది… తప్పులేదు, యాక్సెప్టబుల్… ఇదంతా ఎందుకు చెప్పుకోవడం అంటే…? స్టార్ మాటీవీలో ఓ షో వస్తోంది…

దాని పేరు కిరాక్ బాయ్స్, ఖిలాడీ గరల్స్… పేరులోనే ఉంది కదా… అది పక్కా బిగ్‌బాస్ తరహా షో… తరహా ఏమిటి..? అంతా వాళ్లే… హోస్ట్ శ్రీముఖితో సహా…! కాకపోతే రెండు గ్రూపులకు ఇద్దరు టీమ్ లీడర్స్… అసలే అనసూయ, పైగా శేఖర్ మాస్టర్… ఇంకేముంది..? రచ్చ… శ్రీముఖి హైపిచ్ అరుపులు సరేసరి…

తాజా ప్రోమో చూస్తే ఒకరకంగా అసహ్యం… అది అనసూయ డ్రెస్సు, హెయిర్ స్టయిల్ దగ్గర నుంచి మొదలు… శ్రీముఖిదీ ఓ పిచ్చి డ్రెస్సు… మొత్తం బిగ్‌బాస్ సందడే… మళ్లీ ఆ షో చూస్తున్నట్టుంది… కాకపోతే తుమ్మ సంజయ్‌ను కూడా తీసుకొచ్చారు… అసలే యాక్టివ్ కదా… వచ్చీ రాగానే ఎవరినో హత్తుకుంటున్నట్టు కనిపిస్తున్నాడు, రాగిణే కదా మాస్టారూ… పర్లేదు…

అసలే విష్ణుప్రియ, పైగా తోడుగా రీతూ… చేతుల్లో ఆ ములక్కాడలు ఏమిటో, ఆ సొరకాయలు ఏమిటో… ఓ రేంజులో నడిపిస్తున్నారు షోను… పోనీ, ఇదేమైనా కొత్తరకం షోనా..? కానే కాదు… అచ్చం బిగ్‌బాస్ హౌజులో ఉన్నట్టే ఉంది… అదే అర్జున్, అదే ప్రియాంక, తేజు, ప్రియాంక, శోభాశెట్టి ఎట్సెట్రా… బిగ్‌బాస్ షో మళ్లీ చూస్తున్నట్టుంది…

సరే, ఉండనివ్వండి, పర్లేదు… కానీ ఎంటర్‌టెయిన్‌మెంట్ పేరిట కాస్త బూతు జత చేస్తే… ఇక ఈటీవీ జబర్దస్త్‌కూ దీనికీ తేడా ఏమున్నట్టు..? ఆ గీత కాస్త పట్టించుకొండి… అంతే…!!