ఎయిడ్స్‌కు టూ డ్రగ్ థెరపీ… కాకినాడ డాక్టర్ చెప్పిందే చలామణీకొచ్చింది…

Yanamadala Murali Krishna…..   గుంపులోని వారికన్నా మెరుగ్గా వున్నా కష్టమే… కొంతకాలం క్రితం ఫార్మా కంపెనీల ప్రయోజనాల మేరకు వైద్య చికిత్స విధానం నడుస్తున్నదా అని ఒకరు ప్రశ్నించారు. నేను అవును అని చెప్పా. అక్కడున్న వాళ్లలో కొందరు అవుననీ, కొందరు కాదనీ చెప్పారు. చివరిగా ప్రశ్న అడిగిన వారు పేషంట్ కోలుకోవడం తప్ప మరేదీ వైద్యులకు ఎక్కువ కాదని, డాక్టర్స్ యొక్క ప్రిస్క్రిప్షన్స్ ని తుచ్చమైన బుల్లి బుల్లి గిఫ్ట్స్ ప్రభావితం చెయ్యలేవని చెప్పారు.

ప్రశ్నించిన వారి ఉద్దేశం ఏమంటే, ఒక రకం మందుని ఫార్మా రంగం ప్రమోట్ చేసినంత మాత్రాన ఆ కంపెనీ బ్రాండ్ నే సూచించడం జరగదు అని. ప్రశ్నించిన వారి పరిధిలో అది నిజమేమో. నేను అన్నది మాత్రం… అందుబాటులో వున్న ఔషధాల స్థానంలో, పరిశోధనతో కొత్త ఔషధాన్ని ప్రవేశపెట్టిన ఫార్మా దిగ్గజాల ప్రభావం కొత్త ట్రీట్మెంట్ నిర్దేశాలుగా వస్తాయి. పాత మందులు గొప్పవి అయినా వాటిని పక్కన పెట్టేస్తారు. ఇలాంటి విషయాలలో మన భారతీయ వైద్యులకు ఏ అవగాహనా ఉండదు.

ఇక్కడ ఏ ఫార్మా కంపెనీ కూడా ఒక్క కొత్త మందునూ సొంతంగా పరిశోధించి తయారు చెయ్యలేదు. నిజానికి ఎయిడ్స్ చికిత్సలో గత మూడు నాలుగేళ్లుగా ఒక కొత్త మందును… గతంలో వున్న చక్కగా పనిచేసే మందుల స్థానంలో మొదలు పెట్టాలి అని అంటున్నారు. కొత్త మందు నిస్సందేహంగా మెరుగైనది. అయినంత మాత్రాన అందరికీ అదే మందు మొదలు పెట్టడం సరి కాదు. తరువాత నాకు అర్ధం అయ్యింది, ప్రశ్న అడిగిన వాళ్లకు ఈ విషయాలు తెలీదు కదా. జ్ఞానవిస్తృతి వల్ల నేను ఇలా తిక్కలోడిలా అగుపడతాను.