అక్కరకు రాని ఆ ఫైటర్లే నేడు ఆకాశరక్షకులు… రష్యాకు బోధపడిన తత్వం…

గత ఫిబ్రవరి 23 న రష్యా మొదలుపెట్టిన స్పెషల్ ఆపరేషన్ మొదటి వారంలో ఉక్రెయిన్ గగనతలాన్ని తన అధీనంలోకి తీసుకోగలిగింది కానీ అది కొద్ది వారాల పాటు మాత్రమే ! సోవియట్ కాలం నాటి ఎయిర్ డిఫెన్స్ ని ఉపయోగించి ఉక్రెయిన్ రష్యన్ ఎయిర్ ఫోర్స్ మీద తీవ్ర ఒత్తిడి తేగలిగింది. వెస్ట్రన్ మీడియా అంచనా ప్రకారం హెలికాప్టర్లు, ఫైటర్ జెట్స్, ఇంధనం రవాణా చేసే విమానాల ని కలుపుకొని మొత్తం 360 వరకు నష్టపోయింది రష్యా!

రష్యాని తక్కువ చూపు చూసే వెస్ట్రన్ మీడియా లెక్కలు పక్కన పెడితే ఇప్పటి వరకు రష్యా కోల్పోయిన ఫైటర్ జెట్స్ సంఖ్య 160 కి పైగానే ఉంటాయి. వీటిలో Su-27 ల సంఖ్య ఎక్కువ అలాగే Su-30,Su-35 లు కూడా నష్టపోయింది. మొదటి నుండి సోవియట్ లేదా రష్యన్ ఎటాక్ హెలీకాప్టర్ లు పిట్టలలాగా కూల్చివేయబడుతూనే ఉన్నాయి. సోవియట్- ఆఫ్ఘన్ వార్ సమయంలో అమెరికా ముజాహిదీన్ లకి ఇచ్చిన స్టింగర్ మిసైళ్లు వలన తన హెలీకాప్టర్ లని పెద్ద సంఖ్యలో కోల్పోయింది అప్పటి సోవియట్ ఎయిర్ ఫోర్స్. ఇప్పటి ఉక్రెయిన్ స్పెషల్ ఆపరేషన్ లో కూడా రష్యా పెద్ద సంఖ్యలో ఎటాక్ హెలీకాప్టర్లని కోల్పోయింది.

కేవలం తన పక్కనే ఉన్న ఒకప్పటి తమ దేశంలో భాగం అయిన ఉక్రెయిన్ తో చేస్తున్న యుద్ధంలో రష్యా భారీగానే నష్టపోయింది ఇప్పటివరకు. ఇరు వైపులా వాడబడుతున్న ఆయుధాలు ఒకే తరహావి అంటే సోవియట్ జమానావి. తరిగిపోతున్న తన ఆయుధ సంపత్తిని తిరిగి ఉత్పత్తి చేయడానికి చాలా సమయం పడుతుంది ఏ దేశానికి అయినా ! అందులోనూ తీవ్ర ఆంక్షల మధ్య తనకి కావాల్సిన ముఖ్యమయిన ఎలెక్ట్రానిక్స్ కాంపోనెంట్స్ ని విదేశాలనుండి సమకూర్చుకోవడానికి ఇబ్బందులు ఎదురవుతున్న వేళ క్రూయిజ్ మిస్సైల్స్, జెట్ ఫైటర్స్ ని తయారు చేసుకోవడానికి చాలా సమయం పడుతుంది రష్యాకి.

కష్టాలు ఎదురయినప్పుడు వచ్చే ఆలోచనలు మరే దశలోనూ రావు ! అలాంటి ఆలోచనే రష్యాకి వచ్చింది ఇప్పుడు ! అదే మిగ్-31 ఫాక్స్ హౌన్డ్ ! Mig-31 Foxhound! మిగ్ 31 ఫాక్స్ హౌన్డ్ పేరుని నాటో దేశాలు పెట్టాయి. నాటో దేశాలు రష్యన్ కి సంబంధించి ప్రతి ఆయుధానికి ఒక పేరు పెడతాయి ఎందుకంటే నాటో దేశాలు అన్నిటికీ ఒకే పేరుతో రష్యన్ ఆయుధాన్ని గుర్తించడానికి. ఇంతకీ Mig-31 Foxhound ప్రత్యేకతలు ఏమిటీ ?

Mig-31 Foxhound గురించి చెప్పుకునే ముందు ఈ విమానానికి తండ్రి అయిన Mig-25 ఫాక్స్బాట్ [Mig-25 Foxbot] గురించి తెలుసుకోవాల్సి ఉంటుంది. Mig-25 మరియు Mig -35 లు రెండూ హై స్పీడ్,హై ఆల్టీట్యూడ్ సూపర్ సానిక్ జెట్ ఫైటర్స్ మరియు గూఢచార విమానాలు. కోల్డ్ వార్ సమయంలో అమెరికాకి చెందిన B-70 వాల్ కీర్ బాంబర్ మాక్ 3 [American B-70 Valkyrie Mach 3 Bomber] ని ఎదుర్కోవడానికి మికీయాన్ మిగ్ కార్పొరేషన్ Mig -25 ని అప్పటి సోవియట్ యూనియన్ నిర్మించింది.

Mig -25 ఫాక్స్ బాట్ ని సాంప్రదాయ విరుద్ధంగా అల్యూమినియం బాడీకి బదులుగా హై గ్రెడ్ స్టైన్లెస్ స్టీల్ [Stainless Steel] తో నిర్మించింది మిగ్ కార్పొరేషన్. రెండు సీట్లతో రెండు టర్బో ఫాన్ ఇంజిన్లు కలిగిన Mig -25 80 వేల అడుగుల ఎత్తులో ఎగురుతూ భూమి మీద ఉండే టార్గెట్ లని ఫోటో తీయగలదు. అదీ శబ్ద వేగానికి మూడున్నర రెట్ల [3,494 km/h] వేగంతో అంటే మాక్ 3.4 వేగంతో ప్రయాణిస్తూనే ఫోటోలు తీయగలదు. 80 వేల అడుగుల ఎత్తులో శబ్ద వేగానికి మూడున్నర రెట్ల వేగంతో ప్రయాణం చేస్తున్నప్పుడు ఆకాశంలో సానిక్ బూమ్ వలన ఏర్పడే శబ్దం భూమి మీద ఉండే ప్రజలకి భయాందోళనలని కలుగచేస్తుంది అదే సమయంలో భూమి మీద ఉండే రాడార్లు గుర్తించే సమయం ఇవ్వదు.

మొదటిసారిగా 1964 లో ఆకాశంలోకి ఎగిరిన Mig-25 ని తరువాత అన్ని పరీక్షలు పూర్తి చేసుకొని 1970 లో సోవియట్ ఎయిర్ ఫోర్స్ లోకి చేరింది. 1980 లో అప్పటి సోవియట్ యూనియన్ భారత్ కి ఆఫర్ చేసింది Mig-25 లని. భారత్ మొత్తం 20 Mig-25 లని కొని వాటిని బరేలీ ఎయిర్ బేస్ లో మోహరించింది కానీ ఎవరికీ ఈ విషయం తెలీదు. మనదేశపు Mig-25 స్క్వాడ్రన్ లకి ‘గరుడ’ అనే పేరు పెట్టారు. 1997 లో పాకిస్థాన్ లోని మిలటరీ బేస్ లని ఫోటోలు తీయడానికి గాను రెండు Mig -25 లని పంపించారు. పాకిస్థాన్ రాజధాని ఇస్లామాబాద్ మీద ఎగురుతూ అక్కడి మిలటరీ స్థావరాలని ఫోటోలు తీసే సమయంలో ఏర్పడిన ‘సానిక్ బూమ్ ‘ వలన ఏర్పడిన శబ్దంతో ఇస్లామాబాద్ ఒక్కసారిగా ఉలిక్కి పడ్డది. ప్రజలు ఇళ్ళలో నుండి బయటికి వచ్చి ఆకాశం వైపు చూడడం మొదలుపెట్టారు ఇక పాక్ సైన్యం తమ భూభాగం మీద వచ్చిన పెద్ద శబ్దం ఏమిటో కనుక్కోమని ఎయిర్ ఫోర్స్ కి చెందిన ఇంటర్ సెప్టర్ జెట్ లని పంపించింది కానీ అప్పటికే ఫోటోలు తీసుకొని గరుడలు రెండూ వెనక్కి వచ్చేశాయి మన దేశానికి.

చాలా రోజుల తర్జన భర్జన ల తరువాత తమ భూభాగం మీదకి వచ్చినవి భారత్ కి చెందిన గరుడ స్క్వాడ్రన్ కి చెందిన Mig -25 లు అని తెలుసుకొన్నది పాకిస్థాన్ !

సోవియట్ తో ఆయుధాల పోటీలో ఎప్పుడూ ముందు ఉండాలని చూసే అమెరికా కి Mig -25 ల విషయంలో తప్పు అంచనావేసింది. Mig -25 లు వేగంగా వెళ్ళి దాడి చేయగలిగే మరో ఫైటర్ జెట్ గా అంచనా వేసింది. అప్పటికే Mig -25 కి పోటీగా తన F-15 లాంగ్ రేంజ్ ఎయిర్ సుపీరియారిటీ ఫైటర్ జెట్ ప్రోగ్రామ్ ని అభివృద్ధి చేస్తున్నది కానీ Mig -25 లు తమకి పోటీకి రాలేవు అని భ్రమ పడ్డది. కానీ 1976 లో సోవియట్ కి చెందిన Mig -25 ఒకటి జపాన్ లోని సముద్ర తీర ఎయిర్ బేస్ లో లాండ్ అయ్యింది అకస్మాత్తుగా ! వచ్చిన Mig -25 ఎక్కడి నుండి ఎలా వచ్చిందో జపాన్ గుర్తించలేకపోయింది. లాండ్ అయిన కొద్ది సేపటికే మళ్ళీ టేక్ ఆఫ్ తీసుకొని వేగంగా వెళ్ళిపోయింది Mig -25 . అప్పటికి కానీ ఆమెరికన్లకి తెలిసిరాలేదు Mig -25 మామూలు జెట్ ఫైటర్ కాదని.

తరువాతి కాలంలో శాటిలైట్ లు విరివిగా వాడకంలోకి రావడంతో Mig -25 ల ఉపయోగం లేకుండా పోయింది. 2006 లో మన దేశం వీటిని సర్వీస్ నుండి రిటైర్ చేసింది [డి కమిషన్ ]. కానీ రష్యా మాత్రం ఇంకా Mig-25 లని ఉపయోగస్తున్నది. ప్రస్తుతం రష్యా వద్ద 25 Mig-25 లు ఆపరేషన్ లో ఉన్నాయి!

Mig-31 ఫాక్స్ హౌన్డ్ ! Mig-25 లని వాడిన తరువాత వాటి అనుకూలతలు- ప్రతికూలతలని [Pros & Cons ] బేరీజు వేసుకుని మిగ్ కార్పొరేషన్ మరో కొత్త మోడల్ కి శ్రీ కారం చుట్టింది అదే Mig -31. నాటో దేశాలు దీనికి పెట్టిన కోడ్ నేమ్ ఫాక్స్ హౌన్డ్ !

Mig -31 లని ఎక్కువగా స్టైన్ లెస్ స్టీల్ అల్లాయ్ ని వాడకుండా దాని స్థానంలో లైట్ మెటల్ అల్లాయ్ ఉపయోగించి డిజైన్ చేసింది. Mig -25 లో స్టీల్ అల్లాయ్ 80% గా ఉండగా దానిని 38% కి కుదించి దాని స్థానంలో లైట్ మెటల్ అల్లాయ్, టైటానియం అల్లాయ్ మరియు కాంపొజిట్ పదార్ధాలని వాడి వీలున్నంత వరకు బరువు తగ్గించింది.

అప్పటికి లేటెస్ట్ అయిన ఏవియానిక్స్ తో పాటు అవసరం అయితే ఎటాక్ చేయడానికి వీలుగా మిస్సైల్ వ్యవస్థ తో పాటు మొదటి సారిగా మిసైల్ అప్రోచింగ్ రాడార్ వార్నింగ్ వ్యవస్థని అమర్చింది. అలాగే తక్కువ ఎత్తులో ఎగురుతూ మాక్ 3 వేగాన్ని అందుకోగల విధంగా డిజైన్ చేసింది. Mig -25 లు కనీసం 40 వేల అడుగుల ఎత్తుకి వెళ్ళిన తరువాతే మాక్ 3 వేగాన్ని అందుకోగలదు- బరువు ఎక్కువగా ఉండడం చేత ఈ సమస్య ఏర్పడింది అదే Mig -31 బరువు తగ్గించగలిగిన తరువాత తక్కువ ఎత్తులో ఎగురుతూ కూడా మాక్ 3 వేగాన్ని అందుకోగలదు.

సుదూరం వెళ్ళగలిగి ఫోటోలు తీసుకొని అవసరం అయితే తనని తాను రక్షించుకుంటూ శత్రు విమానాలని కూల్చివేయగల మిసైల్ వ్యవస్థని Mig -31లో అమర్చారు.

2 వేల కిలోమీటర్ల దూరం ప్రయాణించి టార్గెట్ లని కొట్టగల క్రూయిజ్ మిసైళ్లు వచ్చాక Mig -31ల అవసరం లేకుండా పోయింది. ఇక ఫోటోలు తీయడానికి శాటిలైట్ వ్యవస్థ అభివృద్ధి చెందాక Mig -31ల అవసరం లేకుండా పోయింది. ప్రస్తుతం సుదూర ప్రాంతాలకి వెళ్ళి బాంబింగ్ చేయగల బాంబర్ల పాత్ర కూడా పెద్దగా అవసరం ఉండడం లేదు ఎందుకంటే వాటి బదులు షార్ట్ రేంజ్ బాలిస్టిక్ మిసైల్ ని వాడుతున్నారు.

ఉక్రెయిన్ ఎయిర్ ఫోర్స్ ని ధ్వంసం చేసిన Mig -31…  తన వద్ద ఉన్న క్రూయిజ్ మిసైళ్లు, బాలిస్టిక్ మిసైళ్లు దాదాపుగా 60% స్టాక్ అయిపోయాక రష్యాకి కొత్త ఆలోచన వచ్చింది. Mig -31తో పెట్రోలింగ్ చేయడం ! Mig -31 లు 80 వేల అడుగుల ఎత్తులో ఎగురుతూ ఆకాశంలో పెట్రోలింగ్ నిర్వహించగలదు. ప్రస్తుతం 80 వేల అడుగుల ఎత్తులో ఎగిరే జెట్ ఫైటర్స్ ని కూల్చగల ఎలాంటి ఎయిర్ డిఫెన్స్ వ్యవస్థ లేదు. కాబట్టి రష్యా తన అధీనంలో ఉన్న క్రిమియా నుండి ఖేరోశాన్ వరకు పెట్రోలింగ్ చేస్తూ వస్తున్నది. ఇది సురక్షితమయిన పని.

Mig -31 లు ఎక్కువ ఎత్తులో ఎగురుతూ కింద 30 వేల అడుగుల ఎత్తులో ప్రయాణించే ప్రతి ఫైటర్ జెట్ ని కనిపెట్టగలదు అదే సమయంలో ఎయిర్ to ఎయిర్ మిసైల్ తో వాటిని కూల్చివేయగలదు. గత నెల రోజుల కాలంలో ఉక్రెయిన్ కి చెందిన 4 Mig -29s లు, 6 Su-25 లు, ఒక Su-24, ఒక Su-27 లని Mig -31 లు కూల్చివేశాయి.

అడ్వాంటేజ్ Mig -31… జాస్లన్ Pesa రాడార్ [Zaslon PESA radar] ని కలిగి ఉంది Mig-31. PESA [Passive Electronically Scanned Array ] రాడార్ తక్కువ ఎత్తులో ఎగిరే టార్గెట్ లని బాగా గుర్తించగల సామర్ధ్యం ఉంది. రేంజ్ వచ్చేసి 400 km…. విమ్పెల్ R-37M [Vympel R-37M air-to-air missile] ఎయిర్ to ఎయిర్ మిస్సైల్ మరో అడ్వాంటేజ్ ! R-37M ఎయిర్ to ఎయిర్ మిసైల్ ని ఈ మధ్యనే అభివృద్ధి చేసింది రష్యా. దీని రేంజ్ వచ్చేసి 300 km పైగా ఉంటుంది.

ఉక్రెయిన్ ఎయిర్ డిఫెన్స్ సిస్టమ్ కి అందనంత ఎత్తులో ఎగురుతూ అంటే కనీసం 60 వేల అడుగుల ఎత్తులో ఎగురుతూ కింద ఉక్రెయిన్ జెట్ లని R-37M మిసైళ్ళతో కూల్చుతున్నాయి Mig-31 లు. ఇక్కడ ఎక్కువ ఎత్తు తో పాటు ఎక్కువ దూరం నుండి శత్రు విమానాలని పసిగట్టగల రాడార్, అలాగే 300 km దూరం ప్రయాణించి శత్రు విమానాలని కూల్చగల R-37M లాంగ్ రేంజ్ ఎయిర్ to ఎయిర్ మిసైళ్లు రష్యాకి అడ్వాంటేజ్ అవుతున్నాయి. ఇదొక కొత్త టెక్నిక్ !

Mig -31 లు ఎక్కువ ఎత్తులో ఎగురుతూ లాంగ్ రేంజ్ R-37M ని ప్రయోగించడం వలన మిసైల్ తన నిజ రేంజ్ కంటే ఎక్కువ దూరం వెళ్లగలుగుతాయి భూమ్యాకర్షణ శక్తి వలన. ఎత్తు, వేగం వలన ఉక్రెయిన్ విమానాలు R-37M నుండి తప్పించుకునే సమయం లేక దొరికిపోతున్నాయి.

ఇక Mig -31 తో Kh-47M2 Kinzhal Daggar హైపర్ సానిక్ మిసైళ్ళ ని ప్రయోగించి చాలా ఖచ్ఛితమయిన గురితో టార్గెట్లని ధ్వంసం చేస్తున్నది రష్యా. ఇక్కడ కూడా అత్యంత ఎత్తు నుండి హైపర్ సానిక్ మిసైళ్ళ ని ప్రయోగించడం వలన మాక్ 12 వేగంతో అవి ప్రయాణించి టార్గెట్లని ధ్వంసం చేస్తున్నాయి కానీ ఉక్రెయిన్ వీటిని ఆపలేకపోతున్నది లేదా జర్మనీ ఇచ్చిన ఎయిర్ డిఫెన్స్ సిస్టమ్ వీటిని టార్గెట్ చేయలేకపోతున్నది.

ప్రస్తుతం రష్యా తాను ఉక్రెయిన్ లో ఆక్రమించుకున్న ప్రాంతం మీద పెట్రోలింగ్ చేస్తున్నది స్వేచ్ఛగా ! MIg -31 లు కేవలం రష్యా దగ్గర మాత్రమే ఉన్నాయి ఇప్పుడు. Mig-31 లాంటి సూపర్ సానిక్ జెట్ ఫైటర్ వేరే ఏ దేశం దగ్గరా లేవు కాబట్టి ఈ విషయంలో ప్రస్తుతం రష్యాదే పై చేయిగా ఉంది. నాటో దగ్గర ఉన్న ఎలాంటి ఎయిర్ డిఫెన్స్ సిస్టమ్ కూడా Mig-31 ని కూల్చివేయలేవు !

So! ఇక పనికిరావు లేదా అవసరం రాదు అనుకున్న Mig-31 లు అకస్మాత్తుగా గగనతల రక్షకుల అవతారం ఎత్తాయి! ఉక్రెయిన్ తన ఎయిర్ ఫోర్స్ ని గ్రౌండ్ మీదనే ఉంచేట్లుగా చేయగలిగింది Mig-31 ! ఉక్రెయిన్ కి అధునాతన F-16 లు ఇస్తే ఎలా ఉంటుంది ? అనే ఆలోచన నాటో కి రాకుండా చేయగలిగింది Mig-31. ఇప్పటి వరకు వివిధ దేశాల మీద దాడి చేసి యుద్ధము చేసిన అనుభవం నాటో దేశాలకే ఉంది. ఇప్పుడు రష్యాకి కూడా ఆ అనుభవం ఉంది. ఎందుకంటే రష్యా ప్రస్తుతం ఉక్రెయిన్ తో పాటు నాటో తో కూడా సగం యుద్ధం చేస్తున్నట్లుగా భావించాలి….