Subramanyam Dogiparthi….. మరదలా మరదలా తమ్ముని పెళ్ళామా ఏమమ్మా వైనమేమమ్మా , వదినమ్మ వదినమ్మ అన్నయ్య పెళ్ళామా ఏమమ్మా వైనమేంటమ్మా . సి నారాయణరెడ్డి పాట ఆరోజుల్లో వదినామరదళ్ళ సరసం , ప్రేమాభిమానాలను అద్భుతంగా చూపించారు దర్శకులు NTR . బహుశా అలాంటి సున్నితమైన , ఆహ్లాదకరమైన సరసం ఇప్పటి తరం వదినామరదళ్ళకు తెలియదేమో ! ఇప్పటి తరం ఆడపిల్లలు యూట్యూబులో ఈ పాటను తప్పక ఆస్వాదించాలి . సావిత్రి , కృష్ణకుమారిల హావభావాలు కూడా నిజమైన వదినామరదళ్ళ లాగానే ఉంటాయి .
కొసరాజు వ్రాసిన మరో నృత్యగీతం ఎందుకీ తొందర అనే మేజువాణి పాట . పల్లెటూళ్ళల్లో పెళ్ళి ముందు మేజువాణిని ఏర్పాటు చేస్తారు . నేను కూడా చూడలేదు . మా వయసులో ఉన్న వారు కూడా చాలామంది చూసి ఉండరు . మేజువాణి ఎలా ఉంటుందో తప్పక చూడవలసిందే . NTR స్వీయ దర్శకత్వంలో నిర్మించబడిన ఈ వరకట్నం సినిమాలో ఇలా చాలా విశేషాలు ఉన్నాయి . మరో విశేషం సైసై జోడెడ్ల బండి అనే రాజనాల పాట . పాట మధ్యలో రావి కొండలరావు మహాప్రభో అనటం బాగుంటుంది . పద్మనాభం , చంద్రకళల మీద రెండు పాటలు . మల్లెపూల పందిట్లోన చందమామ , గిలకల మంచం ఉంది పాటలు ఈ జంట మీద బాగుంటాయి .
పుట్టలోన నాగన్నా లేచి రావయ్యా పాట ఇప్పటికీ ఆడవాళ్లు నాగులచవితి నాడు పాడుతూనే ఉంటారు . మరో హిట్ పాట ఇదేనా మన సంప్రదాయమిదేనా . అలాగే రేలంగి మీద పాట . ఎవరు చేసిన ఖర్మ వారనుభవించకా ఎప్పుడయినా తప్పదన్నా . ఏదో సమయంలో అందరమూ ఇప్పటికీ పాడుకోక తప్పని పాట , పాడుకుంటున్న పాట . మొన్ననే నా సతీమణికి ఈ పాట వినిపించాను . NTR , కృష్ణకుమారిల పాటలు కూడా ఎంతో శ్రావ్యంగా ఉంటాయి . ఒక పాటలో వారిద్దరూ ఇంకా ఎక్కువ అందంగా కనిపించే రాజకుమారుడు , రాజకుమారి దుస్తుల్లో ప్రేక్షకులను అలరిస్తారు .
Ads
పాత్రల పరంగా అగ్రతాంబూలం సావిత్రిదే . ఆ తర్వాత నాగభూషణం , అల్లు రామలింగయ్యలది . దీన్సిగ తరగ అనే నాగభూషణం ఊతపదం బాగా పేలింది . నిర్మాత , దర్శకుడు , హీరో అయినప్పటికీ తన పాత్రను కావాలని ఎలివేట్ చేసుకోకుండా కధానుసారం ఇతర పాత్రలను ఎలివేట్ చేసారు NTR .
హేమలత , రేలంగి , సూర్యకాంతం , సత్యనారాయణ , చంద్రకళ , పద్మనాభం , మిక్కిలినేని ఇతర పాత్రల్లో నటించారు . వరకట్నం , కన్యాశుల్కం వంటి సాంఘిక దురాచారాల మీద ఎన్నో సినిమాలు వచ్చినప్పటికీ ఈ సినిమాలో NTR మార్కు ప్రస్ఫుటంగా కనిపిస్తుంది . ఆయన పంచెకట్టు కూడా ఈ సినిమాలో ప్రత్యేకంగా ఉంటుంది .
తాడేపల్లిగూడెం , తణుకు ప్రాంతాలలో ఔట్ డోర్ షూటింగ్ చేసారు . కమర్షియల్ గా NTR లెవెల్లో సక్సెస్ కాకపోయినా , వంద రోజులు ఆడటమే కాకుండా జనం మెప్పు పొందింది . జాతీయ స్థాయిలో ఉత్తమ చిత్రంగా ఎంపికయింది . మా నరసరావుపేటలో వెంకటేశ్వర పిక్చర్ పేలసులో రెండు మూడు సార్లు చూసి ఉంటా . యూట్యూబులో ఉంది . ఈతరం యువతీయువకులు ఆనాటి సాంప్రదాయాలు , గ్రామాల్లో పంతాలు పట్టింపులు , కామందుల బదులు పాలేర్లు కొట్టుకోవటం , మేజువాణి , వదినామరదళ్ళ సరసాలు – ఆప్యాయతలు తెలుసుకోవాలంటే ఈ సినిమా తప్పక చూడవలసిందే . ఆదివారమే కదా ! చూసేయండి .
Share this Article