ష్… నిశ్శబ్దం..! అనుష్క ఇమేజీకి గట్టి దెబ్బేపడింది… చెప్పుకునేట్టు లేదు..!!

అనుష్క శెట్టి… తెలుగు టాప్ స్టార్… ఆమే రేంజ్ నంబర్ వన్… ఎహె, తెలుగు ఏమిటి..? బాహుబలి తరువాత పాన్ ఇండియా స్టార్ ఆమె… తమిళం, మళయాళం, కన్నడ… వాట్ నాట్..? కానీ కేవలం ఆమె మొహాన్ని చూడటానికి… లేదా కష్టపడింది కదా, బక్కపడిందా లేదా చూడటానికి ప్రేక్షకుడు థియేటర్‌కు రాడు… ఓటీటీలో ఆ సినిమాను క్లిక్ చేయడు… టీవీ ముందు కూర్చోడు… సినిమాలో కథోకాకరకాయో కాస్త నచ్చాలి… అంతే కదా… అవును, అంతే… తాజా టీవీ రేటింగ్స్ చూస్తే అర్థమయ్యేదీ అదే… అనుష్క ఇమేజీకి బలమైన దెబ్బ తగిలింది… ఎంత దారుణం అంటే..? మరీ చెప్పుకోవడానికి కూడా సిగ్గుపడే రేటింగ్స్… ఓవరాల్‌గా 3.9… హైదరాబాద్ కేటగిరీలో 2.4 రేటింగ్స్… ఈ ప్రసారహక్కుల్ని కొన్న జీటీవీ వాడికి మాడు పగిలిపోయింది… బహుశా ఈ షాక్ ఏ సినిమా విషయంలోనైనా తగల్లేదేమో…

నిజానికి అప్పుడెప్పుడో సంవత్సరం క్రితం విడుదల కావాల్సిన సినిమా… అంతా రెడీ అయ్యాక ఎందుకోగానీ రెండుమూడు నెలలు వాయిదా అనుకున్నారు… తీరా విడుదలకు రెడీ అయ్యేసరికి కరోనా కమ్మేసింది… థియేటర్లు క్లోజ్… ఇక అనివార్యంగా అమెజాన్ ప్రైమ్‌లో విడుదల చేశారు… ఒకేసారి తమిళంలో, తెలుగులో రిలీజ్… తరువాత మళయాళంలో డబ్ చేశారు… కొన్నాళ్లకు కన్నడంలో కూడా చూపించారు… అప్పటికే అనుష్క సినిమా లేక చాలా రోజులు, ఆమధ్యలో బాగా బరువు పెరిగి… తగ్గించుకోవడానికి నానా కష్టాలూ పడింది… ఈ స్థితిలో నిశ్శబ్దం అనే హీరోయిన్ సెంట్రిక్ సినిమా చేస్తున్నదంటే జనంలో కాస్త ఆసక్తి పెరిగింది… మరి అరుంధతి దగ్గరన్నుంచి భాగమతి దాకా అనుష్క హీరోయిన్ సెంట్రిక్ సినిమాలు కాస్తో కూస్తో హిట్టయినవే కదా…

అలా నిశ్శబ్దానికి కూడా మంచి రీసౌండ్ హిట్ వస్తుందని ఆశపడ్డారు నిర్మాతలు… మాధవన్, అంజలి, అవసరాల శ్రీనివాస్, మరెవరో ఇంగ్లిష్ నటుడు… హాలీవుడ్ స్థాయిలో మంచి నిర్మాణవిలువలు… అన్నీ బాగానే కుదిరాయి… హీరోయిన్‌కు మాటలు రావు… మొహంలో ఫీలింగ్స్ ప్లస్ సైగలతో విషయాన్ని వివరించాలి… కానీ కథనం దెబ్బతీసింది,., ఏమాత్రం బిగి లేకుండా, గ్రిప్ లేకుండా… ఇష్టారాజ్యంగా కథనాన్ని నడిపించాడు దర్శకుడు… దాంతో ఓటీటీలోనే పెద్ద మంచి పేరు రాలేదు సినిమాకు… అప్పుడెప్పుడో అక్టోబరులో ఓటీటీలో రిలీజ్ చేస్తే… ఆగీ ఆగీ తాపీగా మొన్నామధ్య జీవాడు ప్రసారం చేశాడు.,.  నిజానికి అనుష్క ఇమేజీ, సస్పెన్స్ థ్రిల్లర్ సినిమా, కొత్త సినిమా, ఇప్పటికీ జనం థియేటర్ల వైపు వెళ్లలేని స్థితిలో… ఈ సినిమాకు కాస్తో కూస్తో మంచి రేటింగ్స్ వచ్చి ఉండాలి… కానీ ఆ అంచనాలన్నీ దారుణంగా బోల్తాకొట్టాయి..!!