… ఇంతకీ ఈ సినిమా కథలో హీరో ఎవరు..? విలన్ ఎవరు..?

.

ఫాస్ట్ పాసెంజర్ రైల్ లాగా సాగుతుంది 1979 లో వచ్చిన ఈ విజయ సినిమా . దాసరి నారాయణరావు గారి శిష్యుడు దుర్గా నాగేశ్వరరావు దర్శకత్వం వహించిన మొదటి సినిమా .

మాగంటి రవీంద్రనాధ్ చౌదరి , విజయ బాపినీడులు నిర్మాతలు . ఫుల్ లేడీస్ సినిమా . ఆనాటి మహిళలు మెచ్చే కధ , మెచ్చిన సినిమా . కాబట్టే 13 సెంటర్లలో 50 రోజులు , ఆరు సెంటర్లలో వంద రోజులు ఆడింది .

ఓ మంచి ధనిక కుటుంబం సాంప్రదాయబధ్ధంగా ఉండే సీతమ్మను కోడలిగా తెచ్చుకుంటుంది . ఆ ఇంట్లో ఓ అందమైన , చురుకైన పనిపిల్ల ఉంటుంది . ఇంట్లో పిల్లలాగానే చలాయించుకుంటూ ఉంటుంది . హీరో తాగొచ్చి పనిపిల్లను పాడుచేస్తాడు . ఆమె గర్భవతి అవుతుంది .

ఆ పిల్లను అమితంగా ప్రేమించే విలన్ బావ ఈ మంచి కుటుంబం మీద అల్లరి చేస్తాడు . సంవత్సరం కింద జరిగిన ప్రమాదంలో తాను సంసార జీవితానికి పనికిరాని వాడిని అయ్యాననే ఓ డాక్టర్ సర్టిఫికెట్ చూపించి ఆ గొడవలోనుంచి బయటపడతారు .

ఈలోపు ఇంటి కోడలు గర్భవతి అవుతుంది . ఆమెను అనుమానిస్తారు . సీతమ్మ వారు పుట్టింటికి చేరుతుంది . పనిపిల్లని విలన్ బావ హత్య చేసి హీరో మీద నెట్టేస్తాడు . మంచి కుటుంబం అంతా కలిసి విలన్ని పోలీసులకు అప్పచెప్పటంతో సినిమా సుఖాంతం అవుతుంది .

ఈ సినిమాలో నాకు బాగా నచ్చింది హీరోయిన్ తల్లి కూతురికి చెప్పే సత్యవతి కధ . ఆమె ఎలా అష్టకష్టాలు పడింది , అష్టలక్ష్ముల కృపను ఎలా పొందింది , అంధుడైన భర్తకు కంటిచూపు ఎలా తెప్పించుకున్నది వివరించే కధ . ఈ కధ ఉన్నట్లు కూడా నాకు తెలియదు . ఏ పురాణంలోనిదో కూడా తెలియదు .

కధ మాత్రం చాలా సందేశాత్మకంగా ఉంది . సత్యవతిగా జయంతి నటించింది . అందరూ తప్పక చూడవలసిన కధ . ఈ కధలోని మంగళ రూపిణి మంగళ దాయిని పాట వీడియో యూట్యూబులో ఉంది .

సినిమాలో ట్విస్టుల మీద ట్విస్టులు ఉంటాయి . చక్రవర్తి సంగీత దర్శకత్వంలో పాటలు థియేటర్లో బాగానే ఉంటాయి . బయట పాపులర్ అయినట్లుగా లేదు . హీరోయిన్ సరిత ద్విపాత్రాభినయం ఓ పెద్ద ట్విస్ట్ . సరిత , నూతన్ ప్రసాదుల నటనను ప్రత్యేకంగా మెచ్చుకోవాల్సిందే .

వేటగాడు సినిమాలోలాగా జంధ్యాల రావు గోపాలరావు డైలాగులను ప్రత్యేకంగా వ్రాసారు . జంధ్యాల మార్కు డైలాగులు ఉన్నాయి. దుర్గా నాగేశ్వరరావు దర్శకత్వం బాగుంది .

నటీనటుల చేత బాగానే నటింపచేసుకున్నాడు . మోహన్ బాబు , మురళీమోహన్ , చిట్టిబాబు , రమాప్రభ , విజయలలిత , నిర్మలమ్మ , హలం , జయమాలిని , అనిత , ఛాయాదేవి , పండరీబాయి , తదితరులు నటించారు .

ఫేమిలీ సెంటిమెంట్ , ఫుల్ లేడీస్ ఫీల్ గుడ్ సినిమా . Partly colour cinema . నలుపు తెలుపుతో ప్రారంభమయి మన రాజకీయ నాయకులు రాత్రికి రాత్రి పార్టీలు మారినట్లు సడెన్ గా రంగుల్లోకి మారుతుంది .

సినిమా యూట్యూబులో ఉంది . కాస్త ఓపిగ్గా చూడాలి . ఫాస్ట్ పాసెంజర్ రైల్ . ధడధడా సాగదు . అయినా బాగుంటుంది . చూడబుల్ . ముఖ్యంగా సత్యవతి అష్టలక్ష్ముల కధ . #తెలుగుసినిమాలసింహావలోకనం #తెలుగుసినిమాలు         …….. ( సమీక్ష :: దోగిపర్తి సుబ్రహ్మణ్యం )