ఇంతవారమయ్యాము అంటుంటారు కదా… ఎంతవారని..? అదెంతని..?

ఆ కార్య‌క్ర‌మంలో ఎన్టీఆరూ, విశ్వ‌నాథ స‌త్య‌నారాయ‌ణ‌గారూ పాల్గొన్నారు.
ఎన్టీఆర్ మాట్లాడుతూ ..
బ్ర‌ద‌ర్ ఘంట‌సాల‌, మాస్టారు విశ్వ‌నాథ ఉండ‌డం వ‌ల్లే మేమింత‌టి వార‌మ‌య్యాము అన్నారు.
ఆ త‌ర్వాత మైకందుకున్న విశ్వ‌నాథ ….
నా శిష్యుడ‌నని చెప్తున్న ఈ ఎన్టీరామారావు నా వ‌ల్ల‌నే ఇంత వాడినైతిన‌ని చెప్పినాడు.
ఆ ఇంత ఎంతో నాకు తెలియ‌దు.
ఆ ఇంత‌లో నాకు మ‌రొక‌రు అన‌గా ఘంట‌సాల వెంక‌టేశ్వ‌ర్రావుతో వాటా పెట్టినారు.
మరి వారి వారి వాటా ఎంతయో తెల్పితిరి కారు.
అంతియే కాక నాకు తెలియ‌ని విష‌య‌ము మ‌రొక‌టి క‌ల‌దు..
అస‌లు వారెంతైనారో … కూడా నాకు తెలియ‌దు.
ఆ తెలియ‌ని అంత‌లో ..
ఇంత అన‌నెంతో నాకు అంత‌కంటే తెలియ‌దు.
ఆ ఇంత‌లో నేను చేసినాన‌ని ఆయ‌న చెప్పుచున్న‌దెంతో తెలియ‌దు.

 

అది అట్లుండ‌నిండు .
ఇక నాకు భగవద్గీత అంటూ ఈ గ్రామ‌ఫోను ప్లేటు ఒక‌టిచ్చినారు.
దీనిని ఆడించు యంత్ర‌ము మా ఇంట లేదు.
పోనీ దీనిని ఏ ప‌చ్చ‌డి జాడీ మీదో మూత‌గా వాడుకొమ్మ‌ని మా ఆవిడ‌కు ఇవ్వ‌వ‌చ్చున‌నుకొంటిని …
అట్ల‌నుకొన‌గా దీనికి మ‌ధ్య‌లో రంధ్ర‌ము క‌ల‌దు.
ఇది ఒక పెను ఇబ్బంది.
అది జాడీ మీద మూత‌గా వాడిన‌ప్పుడు ఈ రంధ్ర‌ములోంచీ ఏవైనా లోనికి ప్ర‌వేశించి ప‌చ్చ‌డి పాడు అగును.
ఏడాది పొడుగూతా వాడుకోవాల్సి ఉన్న ఊర‌గాయ పాడుకావ‌డానికి నేను కార‌ణ‌భూతుడ్న‌వ‌డం చేత ఆవిడ మ‌న‌సులోనైనా నా అమాయ‌క‌త్వ‌మునూ … తెలివిలేని త‌న‌మును గురించి ఏమైనా అనుకునే అవ‌కాశ‌మూ క‌ల‌దు.
ఏ విధ‌ముగా చూసిన‌నూ ఇది నాకు శ్రేయ‌స్క‌ర‌ము అయితే కాదు…
ఇదియునూ అట్లుండ‌నిమ్ము ..
అని ఘంట‌సాల భ‌గ‌వ‌ద్గీత మీద‌కు సాగిపోయార‌ట విశ్వ‌నాథ వారు.
ఈ ఉప‌న్యాస‌ము ముగించే స‌రికి హెచ్ఎమ్వీ వారు ఓ రికార్టు ప్లేయ‌రును తెచ్చి విశ్వ‌నాథ వారికి స‌మ‌ర్పించుకున్నార‌ట..
ఆయ‌నే అన్న‌ట్టు అది వేరు విష‌య‌ము…