ఈ గెలుపు అపురూపం… పోటీదారుల నుంచి విజేతకు విలువైన కానుకలు…

సాధారణంగా ఓ ఆటల పోటీయో, పాటల పోటీయో జరిగింది… పదీపన్నెండు మంది పోటీపడ్డారు… రిజల్ట్ తేలింది… తరువాత ఏం జరుగుతుంది..? ఏముందీ, గెలిచినవాడిని అభినందిస్తారు, చప్పట్లు కొడతారు, ఎవరి మూటాముల్లే వాళ్లు సర్దుకుని ఇళ్లకు వెళ్లిపోతారు… అంతే కదా… కానీ ఇక్కడ కథ వేరే ఉంది… అది కొంత నమ్మబుల్‌గా లేదు… కొంత ఆశ్చర్యంగా ఉంది… పోటీదారుల నడుమ ఇంత పాజిటివిటీ ఉన్న తీరు చూసి ఆనందంగా కూడా ఉంది… మొన్నమొన్న ఇండియన్ ఐడల్ -12 పోటీ ముగిసింది, ఉత్తరాఖండ్‌కు చెందిన పవన్‌దీప్ రాజన్ గెలిచాడు… మన షణ్ముఖప్రియ ఆరో స్థానంలో నిలబడింది, మనం కాసేపు నాన్సెన్స్, అంతా కుట్ర అని రుసరుసలాడాం అయిపోయింది… అయితే మన తెలుగు టీవీల పైత్యం సోనీ వాడికీ ఎక్కినట్టుంది… ఎవరో ఓ ఇద్దరి నడుమ ఫేక్ ప్రేమను నడిపించి, షోకు కాస్త మసాలా యాడ్ చేయడం… టాప్‌లో ఉంటున్న పవన్‌దీప్ నడుమ అరుణిత నడుమ ఓ ప్రేమ వ్యవహారాన్ని పదే పదే ఫోకస్ చేయడానికి ప్రయత్నించింది సోనీ… సోషల్ మీడియాలో, మీడియాలో బోలెడు వీడియోలు, పోస్టులు, మీమ్స్ జోరుగా నడిచాయ్… అది టీఆర్పీలను పెంచిందో లేదో తెలియదు గానీ… వాళ్ల నడుమ నిజంగానే… చిగురేసే మొగ్గేసే అనే తరహాలో ప్రేమ పుట్టినట్టుంది…

పవన్ దీప్ విజేతగా నిలిచినందుకు తనకు సోనీవాడు ఇచ్చింది 25 లక్షలు… అదేనండీ, ఎవరో స్పాన్సర్ చేశారు… దీనికితోడు మారుతి కంపెనీ ఓ స్విఫ్ట్ కారు ఇచ్చింది… ఆ 25 లక్షల్లో టాక్సులు పోనూ ఏ పదిహేడో, పద్దెనిమిదో మిగిలి ఉంటాయి… కానీ తన తోటి కంటెస్టెంట్, ఫస్ట్ రన్నర్ అప్ అరుణిత తనకు ఇచ్చిన గిఫ్ట్ ఏమిటో తెలుసా..? ఆడి క్యూ7… దాదాపు 70, 80 లక్షల ఖరీదు అది… అంత గిఫ్ట్ ఎందుకిచ్చింది..? ముందస్తు కట్నమా..? అసలు చాలామంది ఇంత గిఫ్ట్ ఇచ్చిందనే వార్తలు వచ్చేసరికి నమ్మలేదు… కానీ వాళ్లెవరూ ఈ వార్తల్ని ఖండించలేదు, సో, నిజమే అనుకుందాం… అసలు గిఫ్ట్ విలువతో పోలిస్తే అరుణిత ఇచ్చిన గిఫ్ట్ విలువ మూడు రెట్లు… వావ్… అరుణిత ఫ్లాట్ కొన్ని భవనంలోనే పవన్ దీప్ కూడా ఓ ఫ్లాట్ కొన్నాడని ఓ వార్త… రెండు మధురమైన గొంతులు ఒక్కటవ్వాలనే ఆశిద్దాం, సరే… అరుణితే కాదు, పవన్ దీప్ అంటేనే తోటి కంటెస్టెంట్లకు కూడా అభిమానం… అందుకే ప్రతి ఒక్కరూ ఏదో గిఫ్ట్ ఇచ్చారు… అభినందనగా… ఇక్కడ ఈర్ష్య కనిపించకపోవడం నచ్చింది…

సెకండ్ రన్నర్ అప్‌గా నిలిచిన సైలీ కాంబ్లే 72 వేల రూపాయల విలువ చేసే ఓ బంగారు చెయిన్ ఇచ్చింది… (ఫస్ట్, సెకండ్ రన్నర్స్ అప్‌కు అయిదేసి లక్షలు ఇచ్చింది సోనీ… నిజానికి ఈ ప్రోగ్రామ్ మీద ప్రచారం, నిర్మాణవ్యయంతో పోలిస్తే ఇచ్చిన గిఫ్టుల విలువ చాలా చాలా తక్కువ…) ఫోర్త్ ప్లేసులో నిలిచిన మొహమ్మద్ డానిష్ 14 లక్షల విలువ చేసే గిటార్ బహూకరించాడు… గ్రేట్… మధ్యలో ఎలిమినేట్ అయి వెళ్లిపోయిన రాజస్థానీ సింగర్ సవాయ్ భట్ విజేత పవన్ దీప్‌కు మాంచి రాజస్థానీ దుస్తుల్ని ఇచ్చాడు… శాస్త్రీయగానంతో అలరించి, మధ్యలో ఎలిమినేట్ అయిన అంజలీ గైక్వాడ్ 4 లక్షల విలువ చేసే ఓ ప్లాటినం బ్రేస్‌లెట్ ఇచ్చింది… షణ్ముఖ ప్రియ ప్రముఖ సెలబ్రిటీ డ్రెస్ డిజైనర్ మనీష్ మల్హోత్రా డిజైన్ చేసిన 1.3 లక్షల సూట్ ప్రజెంట్ చేసింది… ఆశిష్ కులకర్ణి అనే మరో కంటెస్టెంట్ నైక్ షూస్ కొనిచ్చాడు… ఫైనలిస్టులో ఒకడిగా నిలిచిన నిహాల్ టారో ఖరీదైన చాక్లెట్లను, అనుష్క బెనర్జీ పర్‌ఫ్యూమ్ సీసాల్ని ఇచ్చారు… ఇక్కడ ఖరీదు సంగతి కాదు, విజేత పట్ల ఇంత ప్రేమను చూపించడం బాగా నచ్చింది… విజేత ఆనందాన్ని ప్లస్ విజేతను వాళ్లు తమ గిఫ్టులతో షేర్ చేసుకున్న తీరు నచ్చింది… అందుకే ఈ కథనం…