ఆస్కార్‌కు గొందల్ ! భారీ పోటీ నడుమ ఈ మూవీయే ఎందుకు ఎంపిక?!

.

ఆస్కార్‌కు గొందల్..! 33 సినిమాల్లో నుంచి మరాఠీ థ్రిల్లర్‌నే ఎందుకు ఎంచుకున్నారు? తెలుగు నుంచి పోటీపడిన సినిమాలేవి? దురందర్, పెద్ది, ఇరుముడి, హక్, గవర్నర్ వంటి సినిమాలన్నీ ఈ పోటీలో ఫెయిలై ఈ మరాఠీ చిన్న సినిమా ఆస్కార్ వెళ్లడానికి కారణాలేమిటి..?

ఆస్కార్‌కు భారత్ నుంచి అధికారిక ఎంట్రీ ఏ సినిమా వెళ్లాలి? ఈ ప్రశ్న వచ్చినప్పుడు సహజంగానే మన కళ్ల ముందు పెద్ద హీరోలు, భారీ బడ్జెట్లు, వందల కోట్ల వసూళ్లు, దేశవ్యాప్తంగా సంచలనం సృష్టించిన సినిమాలే కనిపిస్తాయి. కానీ ఈసారి భారత జ్యూరీ మాత్రం పూర్తిగా మరో దారి ఎంచుకుంది.

మహారాష్ట్రలోని ఒక పాత జానపద ఆచారం… దాని చుట్టూ తిరిగే ఒక చీకటి కథ… గ్రామీణ వాతావరణంలో జరిగే ఒక రాత్రి… ప్రేమ, మోసం, కోరిక, హత్య, నమ్మకం, భయం… ఇవన్నీ కలిసిన మరాఠీ థ్రిల్లర్ ‘గొందల్’ను 2027 ఆస్కార్ కోసం భారత అధికారిక ఎంట్రీగా ఎంపిక చేసింది ఫిల్మ్ ఫెడరేషన్ ఆఫ్ ఇండియా.

33 సినిమాలు పోటీలో ఉన్నాయి. అందులో 14 హిందీ సినిమాలు. మరాఠీ, తెలుగు, గుజరాతీ భాషల్లో నాలుగేసి సినిమాలు. తమిళంలో మూడు… మలయాళం, నేపాలీ, నాగమీస్‌లో ఒక్కో సినిమా. ఒక మూకీ చిత్రం కూడా ఉంది. ఈ మొత్తం పోటీ నుంచి బయటకు వచ్చిన పేరు ‘గొందల్’.,,

అంటే… ఇది కేవలం మరాఠీ సినిమాకు వచ్చిన గౌరవం కాదు. భారతీయ సినిమా అంటే పెద్ద సినిమా మాత్రమే కాదు… తన నేల వాసనను ప్రపంచానికి చూపించే సినిమా కూడా కావచ్చు అన్న సందేశం కూడా ఇందులో కనిపిస్తోంది.

ఏయే భాషల్లో ఏయే సినిమాలు అనే విషయంలో మీడియా రిపోర్టుల నడుమ కొంత తేడా కనిపిస్తోంది… కానీ మొత్తానికి ఈసారి ఆస్కార్ ఎంట్రీ కోసం స్టార్ పవర్ నుంచి జానపద సంస్కృతి వరకు… కమర్షియల్ సినిమా నుంచి ఫెస్టివల్ సినిమా వరకు… చాలా విస్తృతమైన పోటీ జరిగింది.

మరి ఇన్ని సినిమాలను కాదని ‘గొందల్’నే ఎందుకు?… అసలు ‘గొందల్’ అంటే ఏమిటి? ముందుగా టైటిల్ దగ్గరే ఆసక్తి మొదలవుతుంది.

గొందల్ మహారాష్ట్రలోని సంప్రదాయ జానపద ఆచారం. సాధారణంగా రాత్రంతా జరిగే ఈ ప్రదర్శనలో సంగీతం, డప్పులు, నృత్యం, పురాణ కథలు, దేవతల ఆరాధన వంటి అంశాలు ఉంటాయి. ఒకరకంగా చెప్పాలంటే ఆచారం, జానపద కళ, భక్తి, నాటకీయత అన్నీ కలిసిన ప్రదర్శన….

దర్శకుడు సంతోష్ దావఖర్ మాత్రం దానిని కేవలం సినిమాలో చూపించే అలంకారంగా వాడలేదు. అదే ఆచారాన్ని కథకు గుండెకాయగా మార్చాడు. IFFI సందర్భంగా ఆయన చెప్పిన ప్రకారం, కనుమరుగవుతున్న ఒక సంస్కృతిని సినిమాతో రికార్డు చేయాలన్న ఉద్దేశం కూడా ఈ చిత్రానికి ఉంది. అక్కడే ‘గొందల్’ ప్రత్యేకత మొదలవుతుంది.

పెళ్లి వేడుక… ఆ తర్వాత ఏం జరిగింది? కథ గ్రామీణ మహారాష్ట్రలో జరుగుతుంది. మొదట చూస్తే పెళ్లి సందడి. సంగీతం, నృత్యం, జానపద ఆచారం, బంధువులు, గ్రామం… అంతా ఒక పండుగ వాతావరణంలానే కనిపిస్తుంది. కానీ ఆ పండుగ రాత్రి క్రమంగా మరో రూపం దాల్చుతుంది.

సుమన్ అనే మహిళ తన వైవాహిక జీవితంలో సంతోషంగా ఉండదు. ఆమెకు గోంధళి కళాకారుడైన సాహెబాతో సంబంధం ఏర్పడుతుంది. భర్త నుంచి బయటపడాలని ఆమె ఆలోచన మొదలవుతుంది. అక్కడి నుంచి ప్రేమ కథ కాస్తా మోసం, కుట్ర, హత్య, తప్పించుకునే ప్రయత్నంగా మారుతుంది.

సినిమా ఎలా ఉంది? ‘గొందల్’ను కేవలం “ఆస్కార్‌కు ఎంపికైన సినిమా”గా చూడటం కంటే, ముందే ఫెస్టివల్ సర్క్యూట్‌లో అది సాధించిన గుర్తింపును చూడాలి.

2025లో జరిగిన 56వ IFFIలో దర్శకుడు సంతోష్ దావఖర్‌కు Silver Peacock – Best Director అవార్డు వచ్చింది. జ్యూరీ సినిమా సంప్రదాయం, కథనం, రూపకల్పన, కథ చెప్పే విధానాన్ని ప్రత్యేకంగా ప్రశంసించింది. అధికారిక IFFI ప్రకారం, సంప్రదాయ సంస్కృతి నేపథ్యంతో రూపొందిన ఈ సినిమా ప్రేక్షకుడిని ఉత్కంఠలో ఉంచే కథనంతో ఆకట్టుకుందని జ్యూరీ అభిప్రాయపడింది.

అంతేకాదు… బెంగళూరు, పుణె, థర్డ్ ఐ ఆసియన్ ఇంటర్నేషనల్ ఫిల్మ్ ఫెస్టివల్ వంటి చోట్ల కూడా సినిమాకు అవార్డులు వచ్చాయి. అంతర్జాతీయ సినిమా పత్రిక Screen International కూడా దీనిని సంతోషకరమైన పెళ్లి వేడుక క్రమంగా చీకటి మలుపు తిరిగే కథగా అభివర్ణించింది. దర్శకుడి మొదటి సినిమా అయినప్పటికీ, దాని విజువల్ ట్రీట్‌మెంట్, పేసింగ్, థ్రిల్లర్ ఎలిమెంట్స్‌ను ప్రశంసించింది.

జ్యూరీ సభ్యుడు వివేక్ వాస్వాని చెప్పిన వివరాల ప్రకారం…, చివరి దశలో ‘గొందల్’, నాగమీస్ చిత్రం ‘Angh’, ‘Main Vaapas Aaunga’ ఉన్నాయి. ‘గొందల్’కు ఉన్న బలాల్లో భారతీయ సంస్కృతిని బలంగా ప్రతిబింబించడం కూడా ఒక ముఖ్యమైన అంశం…

ఇక్కడ ఒక విషయం చాలా స్పష్టంగా కనిపిస్తుంది. ఆస్కార్‌కు పంపడానికి సినిమా ఎంత డబ్బు సంపాదించింది? ఎంత పెద్ద హీరో ఉన్నాడు? అనే ప్రశ్న కంటే… ప్రపంచ ప్రేక్షకుడికి భారతదేశం గురించి కొత్తగా ఏం చెప్పగలదు? అనే ప్రశ్నకు ప్రాధాన్యం లభించినట్టుంది. ‘గొందల్’ దగ్గర ఆ సమాధానం ఉంది.

ఈ పోటీ సినిమాల జాబితాలో ‘Dhurandhar’, ‘Dhurandhar: The Revenge’, ‘Border 2’, ‘120 Bahadur’ వంటి భారీ స్థాయి హిందీ సినిమాలున్నాయి. ‘Hanuman Ansh’ కూడా ఉంది. తెలుగు నుంచి ‘Peddi’, ‘Irumudi’ వంటి పెద్ద సినిమాలున్నాయి. కానీ ఆస్కార్ ఎంట్రీ ఎంపిక అనేది బాక్సాఫీస్ పోటీ కాదు.

భారతీయ సంస్కృతి అంటే కేవలం రామాయణం, మహాభారతం, దేవాలయాలు, రాజులు, చరిత్ర మాత్రమే కాదు. ప్రతి ప్రాంతానికీ తనదైన ఆచారం ఉంది. తనదైన జానపద కళ ఉంది. తనదైన నమ్మకం ఉంది. తనదైన భయం ఉంది. ‘గొందల్’ అలాంటి ఒక ముక్కను ప్రపంచ సినిమా ముందుకు తీసుకెళ్తోంది…

… అయితే ఇప్పటివరకు Best International Feature Film విభాగంలో భారత్ విజయం సాధించలేదు. ‘Mother India’, ‘Salaam Bombay’, ‘Lagaan’ మాత్రమే ఈ విభాగంలో నామినేషన్ పొందిన భారతీయ చిత్రాలు. మరి గొందల్ ఏం చేస్తుందో చూడాలి…