ఈ గుండు బాస్ 40 ఏళ్ల క్రితం ఆ యండమూరి నవల చదివే ఉంటాడు…

 ఏ చీరయినా మీకు నచ్చితే దాన్ని వెంటనే కొనెయ్యాలన్న ఆతృతని దుకాణదారుని ముందు ప్రదర్శించకండి.

 ఏ చీర మీదయినా మీ దృష్టి రెండు సెకన్లు ఎక్కువ నిలబడితే వెంటనే దుకాణందారు “ఇది లేటెస్ట్ డిజైనమ్మా, చాలా ఫాస్టు కలరు. మొన్నే వచ్చింది మార్కెట్లోకి…” అంటాడు. నమ్మకండి. మీ దృష్టి దాని మీద కొద్దిగా ఎక్కువ సేపు ఆగటంతో మీరు దానిపట్ల కొద్దిగా ఆకర్షితులయ్యారనీ, అటూ ఇటూ వూగుతున్నారనీ అతడు గ్రహించాడు. మిమ్మల్ని కన్విన్స్ చేయటానికి ప్రయత్నం చేస్తున్నాడు. కేవలం మీకు నచ్చితేనే తీసుకోండి. అతడి మాటలవల్ల కాదు.

 చీరలు కొనేటప్పుడు పొడవు వెడల్పు కొలవమని అడగటంలో మొహమాట పడకండి. అలాగే ఫాస్ట్ కలర్ అన్న ముద్ర ఉన్న చీరలు బెటరు.

 అయిదు మీటర్ల కన్నా పొడవైన చీరలు వంటికి అందాన్నిస్తాయి.

 కళ్ళు చెదిరే రంగుల్తో పెద్ద ప్రింటులున్న చీరల్ని భారీకాయం ఉన్నవాళ్లు కట్టుకుంటే ఎత్తైన ముఖ ద్వారానికి బరువుగా వేలాడే కర్టెన్లలా ఉంటారు. అలాగే, పొట్టివాళ్ళు ఎక్కువ నగలేసుకుంటే భూమిలో సగం వరకూ పాతి పెట్టిన మొక్కజొన్న పొత్తులా ఉంటారు.

సరస్వతి వ్రాయటం ఆపి, కాస్త తటపటాయించి, “ఈ చివరి సలహా తీసేద్దాం సార్. కొనుగోలుకీ దానికీ సంబంధంలేదు” అంది. ఆమె ఆలా చెప్పటంతో అతడు కాస్త ఆలోచించి, ఆమె వైపు మెచ్చుకోలుగా చూస్తూ, “అవును తీసెయ్యండి” అన్నాడు.

 “గొప్ప తగ్గింపు ధరలు-” అన్న బోర్డు చూసి ఎప్పుడూ మోసపోకండి. ‘అసలు ఎవరైనా ధర ఎందుకు తగ్గించాలి?’ అని ఒక క్షణం ఆలోచించండి. కేవలం చీర కంటించిన కాగితం మీద, ‘తన కలం’ తో వ్రాసిన ధరలోనే తగ్గింపు ఇస్తున్నాడన్న విషయం మర్చిపోకండి. లేకపోతే మిగిలిపోయిన సరుకంతా వదుల్చుకోవటానికి ప్రయత్నిస్తున్నాడని గ్రహించండి. ఏ విధంగానైనా మీకే నష్టం.

 రవితేజ వారి ధరల లిస్టు దుకాణదారు దగ్గిర ఉచితంగా పొందండి. మీరు కొనే చీర ధర, దానితో పోల్చి సరిచూసుకోండి. చీర ధరలను కరెక్టుగా కొనుగోలుదార్లకి చెప్పే సంస్థ- రవితేజ టెక్స్‌టైల్స్ ఒకటే.