.
హైదరాబాద్, జనవరి 26 ….. నిష్ఠురంగా ఉన్నా ఓ చేదు నిజం… కఠిన వాస్తవం… ఒకప్పుడు రాష్ట్ర ప్రభుత్వానికి వందల కోట్ల డెవిడెంట్ ఇచ్చిన సింగరేణి… ఈరోజు జీతాల కోసం అప్పులు తెచ్చుకోవాల్సి వస్తోంది… ఈ దురవస్థకు, ఈ చీకట్లకు కారణం కేసీయార్ పాలన విధానాలు…
ఇక్కడ పారడాక్స్ ఏమిటంటే..? కేసీయార్ పాలించినప్పుడు ఆయన బిడ్డ కవిత ఎక్కువ కాలం తెలంగాణ బొగ్గు గని కార్మిక సంఘం (TGBKS) గౌరవ అధ్యక్షురాలిగా తనే ఉంది… ఆమెకు అన్నీ తెలుసు… అప్పట్లో ఆమె సమర్థించుకొచ్చిన విధానాల్ని ఇప్పుడు వ్యతిరేకిస్తూ మాట్లాడుతోంది… కేసీయార్ ఛత్రం కింద ఉన్నన్నాళ్లు , మౌనంగా ఉన్నా ఇప్పటికైనా నిజాలు చెప్పడం గుడ్…
Ads
ఇప్పుడు రేవంత రెడ్డి బామ్మర్ది గుప్పిట్లో పడి సింగరేణి పతనం అవుతుందని పదే పదే హరీష్ రావు, కేటీయార్ ఆరోపణలు చేస్తున్నారు… నిజానికి సదరు బామ్మర్దిని ఎంకరేజ్ చేసింది వీళ్లే… రాజకీయ పరస్పర ఆరోపణలను కాసేపు పక్కన పెట్టి… కవిత చెబుతున్న ఎండీఓ విధానం వల్ల నష్టాలేమిటో ఓసారి చెప్పుకోవాలి…
ఎం.డి.ఓ (MDO) Mine Developer and Operator విధానం అంటే ఏమిటి?
సాధారణంగా సింగరేణి సంస్థే నేరుగా మైనింగ్ పనులు చేపడుతుంది… కానీ ఎం.డి.ఓ విధానంలో, బొగ్గు గని తవ్వకం బాధ్యతను ఒక ప్రైవేట్ సంస్థకు అప్పగిస్తారు…. ఆ సంస్థ యంత్రాలను, పనివారిని సమకూర్చుకుని బొగ్గు తీసి సింగరేణికి ఇస్తుంది…. అందుకు ప్రతిఫలంగా సింగరేణి ఆ సంస్థకు ఒక నిర్ణీత రుసుము చెల్లిస్తుంది….
తాడిచర్ల బ్లాక్ – ప్రధాన వివాదం
తాడిచర్ల ఓపెన్ కాస్ట్ గనిని ఎం.డి.ఓ పద్ధతిలో కేటాయించడం గతంలోనే పెద్ద వివాదమైంది…
-
ఆరోపణ…: ఈ విధానం వల్ల సింగరేణికి రావాల్సిన లాభాలు ప్రైవేట్ కాంట్రాక్టర్ల పాలవుతున్నాయి…
-
వాస్తవం…: గత ప్రభుత్వ హయాంలోనే (బి.ఆర్.ఎస్ అధికారంలో ఉన్నప్పుడు) తాడిచర్ల గనిని ఎం.డి.ఓ పద్ధతిలో అప్పగించడం జరిగింది…. అప్పట్లో ప్రభుత్వం ఈ నిర్ణయాన్ని సమర్థించుకుంది, కానీ ఇప్పుడు అదే పార్టీ నాయకురాలు దీనిపై విమర్శలు చేయడం రాజకీయ చర్చకు కారణమవుతోంది…
ఎం.డి.ఓ వల్ల కలిగే నష్టాలు (ఆరోపణల ప్రకారం)
-
లాభాల క్షీణత…: సింగరేణి నేరుగా బొగ్గు తీస్తే వచ్చే లాభం కంటే, ప్రైవేట్ ఆపరేటర్లకు చెల్లించే మొత్తం ఎక్కువగా ఉండటం వల్ల సంస్థ నికర ఆదాయం తగ్గుతుంది…
-
కార్మికుల హక్కులు…: సింగరేణి శాశ్వత ఉద్యోగుల సంఖ్య తగ్గి, కాంట్రాక్ట్ కార్మికులపై ఆధారపడటం పెరుగుతుంది…. దీనివల్ల ఉద్యోగ భద్రత ప్రశ్నార్థకమవుతుంది….
-
యంత్రాల వినియోగం…: సింగరేణికి ఉన్న సొంత భారీ యంత్రాలు నిరుపయోగంగా మారే అవకాశం ఉంది….
ఓపెన్ కాస్ట్ మైనింగ్ – లాభనష్టాల బేరీజు
ఒకప్పుడు అండర్ గ్రౌండ్ మైనింగ్ కంటే ఓపెన్ కాస్ట్ మైనింగ్లో సింగరేణికి భారీ లాభాలు వచ్చేవి…
-
ప్రస్తుత పరిస్థితి…: ఓపెన్ కాస్ట్ గనుల్లో బొగ్గు పొరలు లోతుకు వెళ్లేకొద్దీ తవ్వకం ఖర్చు (Overburden removal) పెరుగుతోంది….
-
ప్రైవేటీకరణ భయం…: ఎం.డి.ఓ విధానం వల్ల క్రమంగా సింగరేణి ఆస్తులు, కార్యకలాపాలు ప్రైవేట్ శక్తుల చేతుల్లోకి వెళ్తాయనే ఆందోళన కార్మిక సంఘాల్లో ఉంది….
సింగరేణి ఆర్థిక స్థితి – అప్పులు, జీతాలు
సింగరేణి సంస్థ అప్పులు తెచ్చి జీతాలు ఇచ్చే పరిస్థితిలో ఉందనేది కొంతవరకు వాస్తవమే… సంస్థకు రావాల్సిన భారీ బకాయిలు సకాలంలో అందకపోవడం వల్ల, నగదు కొరత (Cash crunch) ఏర్పడి, దైనందిన కార్యకలాపాలకు, ఉద్యోగుల జీతభత్యాల కోసం స్వల్పకాలిక రుణాలు (Working Capital Loans) తీసుకోవాల్సిన పరిస్థితి ఏర్పడింది…
రావాల్సిన ప్రధాన బకాయిలు (Dues to Singareni)
సింగరేణికి వివిధ విద్యుత్ ఉత్పత్తి సంస్థల నుంచి వేల కోట్ల రూపాయల బకాయిలు రావాల్సి ఉన్నాయి… ప్రధానంగా….
-
తెలంగాణ జెన్కో (TSGENCO)…: సింగరేణికి రావాల్సిన బకాయిల్లో సింహభాగం తెలంగాణ జెన్కో నుంచే ఉంది. సుమారు ₹15,000 కోట్ల నుంచి ₹20,000 కోట్ల వరకు బకాయిలు పేరుకుపోయాయని అంచనా…
-
ఆంధ్రప్రదేశ్ జెన్కో (APGENCO)…: విభజన తర్వాత ఏపీ జెన్కో నుంచి కూడా వందల కోట్ల రూపాయల బకాయిలు రావాల్సి ఉంది….
-
ఇతర రాష్ట్రాల విద్యుత్ సంస్థలు…: కర్ణాటక, మహారాష్ట్ర వంటి పొరుగు రాష్ట్రాల విద్యుత్ బోర్డులకు సరఫరా చేసిన బొగ్గుకు సంబంధించిన చెల్లింపులు కూడా కొంత మేర పెండింగ్లో ఉన్నాయి…
-
రాష్ట్ర ప్రభుత్వం..: విద్యుత్ సంస్థలే కాకుండా, ప్రభుత్వ ఇతర విభాగాల నుంచి కూడా సబ్సిడీలు లేదా ఇతర రూపాల్లో రావాల్సిన నిధులు ఆలస్యమవుతున్నాయి….
బకాయిలు పేరుకుపోవడానికి కారణాలు:
-
డిస్కంల నష్టాలు…: రాష్ట్రంలోని విద్యుత్ పంపిణీ సంస్థలు (DISCOMs) తీవ్రమైన ఆర్థిక నష్టాల్లో ఉండటం వల్ల, అవి జెన్కోకు చెల్లింపులు చేయలేకపోతున్నాయి…. ఫలితంగా జెన్కో, సింగరేణికి ఇవ్వాల్సిన బొగ్గు బకాయిలను సకాలంలో చెల్లించలేకపోతోంది….
-
పెరుగుతున్న ఉత్పత్తి ఖర్చులు…: గనుల తవ్వకం ఖర్చులు, డీజిల్ ధరలు, కార్మికుల వేతనాల పెంపు వల్ల సింగరేణిపై ఆర్థిక భారం పెరుగుతోంది…
ప్రస్తుత ప్రభావం: రావాల్సిన బకాయిలు సకాలంలో రాకపోవడం వల్ల సింగరేణి కొత్త గనుల ఏర్పాటు (Expansion projects), ఆధునీకరణపై ఆశించిన స్థాయిలో పెట్టుబడులు పెట్టలేకపోతోంది… సంస్థ ఆర్థికంగా బలంగా ఉన్నప్పటికీ, ఈ బకాయిల చక్రం (Circular Debt) వల్ల నగదు లభ్యత సమస్యగా మారింది…
బకాయిల సమస్య – గతం, వర్తమానం
సింగరేణికి రావాల్సిన సుమారు ₹20,000 కోట్ల బకాయిలు ఒక్క రోజులో వచ్చినవి కావు….
-
గత ప్రభుత్వ హయాంలో TSGENCO నుండి రావాల్సిన బకాయిలు పేరుకుపోతుంటే, అప్పట్లో యూనియన్ నాయకత్వం ప్రభుత్వంపై ఒత్తిడి తెచ్చి ఆ నిధులను ఎందుకు వసూలు చేయలేకపోయిందనే ప్రశ్న వస్తుంది…
-
సింగరేణి లాభాలను ఇతర ప్రభుత్వ పథకాలకు లేదా అవసరాలకు మళ్లించారనే ఆరోపణలు కూడా ఉన్నాయి….
సింగరేణి లాంటి వందేళ్ల అనుభవం, వేల కోట్ల విలువైన యంత్రాలు, లక్షలాది మంది నైపుణ్యం కలిగిన కార్మికులు ఉన్న సంస్థ... తన పనిని ప్రైవేటు వారికి ఎందుకు అప్పగించాలనేదే ఇక్కడ మిలియన్ డాలర్ల ప్రశ్న...
“లాభం ప్రైవేటుకు – నష్టం సింగరేణికి”
సింగరేణి నేరుగా బొగ్గు తీస్తే, టన్ను బొగ్గుపై వచ్చే పూర్తి లాభం సంస్థకే ఉంటుంది… కానీ MDO పద్ధతిలో…:
-
బొగ్గు తవ్వే కాంట్రాక్టును ప్రైవేటు కంపెనీకి ఇస్తారు…
-
ఆ కంపెనీకి సింగరేణి ఒక నిర్ణీత ధర (Service Charge) చెల్లిస్తుంది…
-
బొగ్గు అమ్మగా వచ్చే లాభంలో సింహభాగం ఈ నిర్వహణ ఖర్చులకే సరిపోతుంది. అంటే, రిస్క్ అంతా సింగరేణిది, నికర లాభం ప్రైవేటు ఆపరేటర్లది….
యంత్రాలు ఉన్నా ఎందుకు ఇవ్వాలి?…
సింగరేణి వద్ద ప్రపంచ స్థాయి భారీ యంత్రాలు (Draglines, Shovels, Dumpers) ఉన్నాయి…
-
ప్రభుత్వ వాదన…: కొత్త గనులను వేగంగా ప్రారంభించడానికి సింగరేణి వద్ద తగినన్ని నిధులు లేదా అదనపు యంత్రాలు లేవని, అందుకే ప్రైవేటు వారిని తెస్తున్నామని చెబుతుంటారు…
-
అసలు విమర్శ…: ఉన్న యంత్రాలను ఆధునీకరించకుండా, కావాలనే నిధులను ఇతర పథకాలకు మళ్లించి, “సంస్థ వద్ద డబ్బులు లేవు” అనే సాకుతో ప్రైవేటు వ్యక్తులకు దారులు వేస్తున్నారనేది కార్మిక సంఘాల ప్రధాన ఆరోపణ…
అనుభవం కంటే “రాజకీయం” ఎక్కువైందా?
సింగరేణికి భూగర్భ గనులు (Underground), ఓపెన్ కాస్ట్ గనుల్లో దశాబ్దాల అనుభవం ఉంది…
-
MDO విధానం వల్ల సింగరేణి ఒక “మైనింగ్ కంపెనీ” నుండి కేవలం ఒక “సూపర్ వైజింగ్ ఏజెన్సీ”గా మారిపోయే ప్రమాదం ఉంది….
-
తాడిచర్ల వంటి బ్లాకులను MDOలకు ఇవ్వడం వెనుక రాజకీయ నాయకులకు అత్యంత సన్నిహితంగా ఉండే కాంట్రాక్టర్ల ప్రయోజనాలు ఉన్నాయనేది బహిరంగ రహస్యం…
మొత్తానికి బంగారు కోడిపెట్ట వంటి సింగరేణిని అస్తవ్యస్త పాలన విధానాలతో భ్రష్టుపట్టించిన పాపం ప్రధానంగా కేసీయార్దే... అసలు పారడాక్స్ ఏమిటంటే..? ఈ దుస్థితికి కారకులే గాయిగత్తర చేస్తూ ప్రస్తుత ప్రభుత్వం మీద బురద జల్లడం... అవునూ, కిషన్ రెడ్డి సాబ్, మీకేమైనా అర్థమవుతోందా..?!
- తిమ్మిని బమ్మి, బమ్మిని తిమ్మి చేయడంలో, చెప్పడంలో, చూపడంలో, గగ్గోలు పెట్టడంలో బీఆర్ఎస్ నేతలు దిట్టలు… దిగువ నమస్తే తెలంగాణ బ్యానర్ స్టోరీ క్లిప్ చూడండి… గాయిగత్తర… హరీష్ రావుకు ఓ ప్రశ్న… తాడిచర్ల బ్లాక్ను ఎండీఓ పద్దతిలో ప్రైవేటుకు ధారాదత్తం చేసింది ఎవరు..? పోనీ, నీ దైవం కేసీయార్ బిడ్డను అడుగుదామా..?
Share this Article