వైభవ్ బలహీనతల్ని పట్టుకున్న ఎఐ… ఔట్ చేసేస్తున్నారు…

.

వైభవ్ సూర్యవంశీ… ఈ బుడ్డోడిని ప్రేమించని క్రికెట్ ప్రేమికుడు ఎవరుంటారు..? కొందరు కావాలని తనది ఫ్లూక్ సక్సెస్ అని వెక్కిరిస్తారు, హడ్డీమార్ గుడ్డీ దెబ్బ అని డిమోరల్ చేయడానికి ప్రయత్నిస్తారు… కానీ కాదు… తనలో ఉన్నది కుర్రతనం కాదు… ధైర్యం ఉంది, టెక్నిక్ ఉంది, బాగా ఆడాలనే కసి ఉంది… లేకపోతే ఇక్కడి దాకా రాడు… అయితే..?

ఇది ఎఐ యుగం… ఏ బ్యాటర్‌కైనా లోపాలుంటాయి… వాటిని పట్టుకోవడానికి ప్రత్యర్థి జట్లు బ్యాటింగ్ వీడియోలు, ఔటయిన క్షణాల్ని వందలాదిగా ఎఐకి ఫీడ్ చేసి… అసలు లోపాలు ఏమిటో పట్టుకోవడానికి ప్రయత్నిస్తున్నాయి… ఒక్కో ఆటగాడిని విశ్లేషించడం అన్నమాట… అలా సూర్యవంశీ లోపాల్ని కూడా పట్టుకున్నారనేది సమాచారం…

గత రెండుమూడు మ్యాచుల్లో ఆ లోపాల మీద బౌలింగ్ చేసే తనను ఔట్ చేశారంటున్నారు… ఈసారి ఐపీఎల్‌లో రియల్ టైమ్ డేటా అనాలిసిస్ విపరీతంగా వాడుతున్నారు… ఒక బ్యాటర్ స్టాన్స్ ఎలా ఉంది? అతను ఏ లెంగ్త్ బంతులకు తడబడుతున్నాడు? అనేది నిమిషాల్లో డీకోడ్ చేస్తున్నారు… మొన్నటి మ్యాచులో జెమీసన్ తన ఎత్తును వాడుకుంటూ వైభవ్ బ్యాక్ లిఫ్ట్ టైమింగ్‌ను దెబ్బకొట్టడం అనేది ఒక పక్కా ప్లాన్ ప్రకారం జరిగినట్టే కనిపిస్తోంది…

సాంకేతిక లోపం: హై బ్యాక్ లిఫ్ట్ శాపమా?  వైభవ్ బ్యాటింగ్ శైలిలో ప్రధానంగా కనిపించే అంశం అతని ‘హై బ్యాక్ లిఫ్ట్’... భారీ షాట్లు ఆడటానికి ఇది సహకరించినప్పటికీ, బంతి వేగంగా దూసుకొచ్చినప్పుడు బ్యాట్ కిందకు రావడానికి పట్టే సమయం (Downswing) ఇక్కడ విలన్‌గా మారుతోంది…

• టార్గెట్…: యార్కర్ లెంగ్త్, ఫుల్ లెంగ్త్ డెలివరీలను ఎదుర్కొనేటప్పుడు బ్యాట్ రాక ఆలస్యం కావడంతో అతను కంట్రోల్ కోల్పోతున్నాడు…

• ఫలితం…: వరుసగా బౌల్డ్ లేదా LBW రూపంలో పెవిలియన్ చేరుతున్నాడు… అండర్-19 స్థాయిలో ఈ లోపం పెద్దగా బయటపడకపోయినా, అంతర్జాతీయ లేదా ఐపీఎల్ వంటి ఉన్నత స్థాయి పోటీల్లో బౌలర్లు దీనిని అస్త్రంగా మార్చుకుంటున్నారు…

నేటి క్రికెట్ కేవలం మైదానానికే పరిమితం కాలేదు… ఆర్టిఫిషియల్ ఇంటెలిజెన్స్ (AI), మల్టిపుల్ కెమెరా యాంగిల్స్, వీడియో అనాలిసిస్ వంటి సాంకేతికతలు అందుబాటులోకి రావడంతో ఏ ఆటగాడైనా తమ లోపాలను దాచుకోవడం అసాధ్యం… ప్రత్యర్థి జట్ల వీడియో అనలిస్టులు వైభవ్ ఆడిన రెండు మ్యాచ్‌లను చూసి అతని బలహీనతను డీకోడ్ చేయగలరు… అదే లైన్, లెంగ్త్‌లో బంతులు వేస్తూ అతన్ని ఒత్తిడిలోకి నెట్టడం ఇప్పుడు సులభమైపోయింది…

అతివ్యాప్తి (Hype) – ఆత్మవిశ్వాసంపై దెబ్బ చాలా తక్కువ వయసులోనే అంతర్జాతీయ స్థాయి ఫోకస్ లభించడం వల్ల కొన్నిసార్లు లాభం కంటే నష్టమే ఎక్కువ… వరుస వైఫల్యాలు ఎదురైతే, అది ఒక యువ ఆటగాడి ఆత్మవిశ్వాసాన్ని దెబ్బతీస్తుంది… సరైన మెంటరింగ్ లేకపోతే, విమర్శల హోరులో ఆటగాడు తన సహజ సిద్ధమైన శైలిని కూడా కోల్పోయే ప్రమాదం ఉంది…

ప్రస్తుత తరుణంలో వైభవ్‌కు కేవలం కోచ్ మాత్రమే కాదు, ఒక దృఢమైన మెంటార్ అవసరం… (మొన్న మన ఒలింపిక్ షూటర్ మనూ భాకర్ చెప్పింది కూడా ఇదే)… రాహుల్ ద్రవిడ్, వి.వి.ఎస్. లక్ష్మణ్ వంటి వారు ప్రచారం కంటే ఫలితాలకే ప్రాధాన్యత ఇచ్చే ‘హార్డ్ టాస్క్ మాస్టర్లు’… అండర్-19 స్థాయిలో వీరి పర్యవేక్షణ వైభవ్‌కు ఒక రక్షణ కవచంలా ఉంటుంది…

అయితే, ఇప్పుడున్న విపరీతమైన హైప్‌ను క్యాష్ చేసుకోవాలని చూసే వారి మధ్య వైభవ్ చిక్కుకుంటే, అతని అసలు టెక్నిక్ మెరుగుపడటం కష్టమే… అతని బ్యాక్ లిఫ్ట్ అడ్జస్ట్ చేయడం, యార్కర్లను ఎదుర్కోవడంలో ప్రత్యేక ప్రాక్టీస్ ఇవ్వడం వంటి అంశాలపై వెంటనే దృష్టి పెట్టాలి…

టాలెంట్ ఉండటం ఒక ఎత్తు అయితే, దానిని నిలబెట్టుకోవడం మరొక ఎత్తు… వైభవ్ సూర్యవంశి తన టెక్నికల్ గ్యాప్‌ను పూడ్చుకుని, మెంటల్లీ స్ట్రాంగ్‌గా తయారైతేనే భారత క్రికెట్‌లో సుదీర్ఘ కాలం రాణించగలడు… ఇండియన్ క్రికెట్ లవర్ కోరుకునేది కూడా ఇదే…