.
వ్యూహకర్త నుంచి ‘మంత్రి’ వరకు.. విజయ్ కేబినెట్లో కీర్తన మెరుపులు! రాజకీయాలంటే జుట్టు పండిన వారు మాత్రమే చేసే వ్యవహారం అనుకుంటే పొరపాటే. ఇప్పుడు ట్రెండ్ మారింది. డేటా పాయింట్లు, డిజిటల్ క్యాంపెయిన్లు, ప్రజల నాడిని పట్టే స్టాటిస్టిక్స్.. ఇవే అసలైన ఓట్ల యంత్రాలు. సరిగ్గా ఈ విద్యలోనే ఆరితేరిన 30 ఏళ్ల యువతీ, నేడు తమిళనాడు కేబినెట్లో అత్యంత పిన్న వయస్కురాలైన మంత్రిగా బాధ్యతలు చేపడుతోంది. ఆమె పేరు ఎస్. కీర్తన. మరోసారి చెబుతున్నా, జస్ట్ 30 ఏళ్లు…
డేటా ‘వ్యూహం’ నుంచి అసెంబ్లీ ‘పీఠం’ దాకా… కీర్తన ప్రస్థానం కేవలం ఐదేళ్లలోనే ఊహించని మలుపులు తిరిగింది. చదువు పూర్తయ్యాక కార్పొరేట్ కొలువుల వైపు వెళ్లకుండా, ఆమె ఎంచుకున్న మార్గం ‘పొలిటికల్ కన్సల్టెన్సీ’. షోటైమ్ కన్సల్టింగ్ సంస్థలో వ్యూహకర్తగా చేరిన ఆమె, 2024 ఆంధ్రప్రదేశ్ ఎన్నికల్లో తెలుగుదేశం పార్టీ కోసం తెర వెనుక ఉండి చక్రం తిప్పింది…
Ads
-
సూపర్ సిక్స్ సక్సెస్…: ఏపీలో కూటమి విజయానికి వెన్నెముకగా నిలిచిన ‘సూపర్ సిక్స్’ పథకాలను సామాన్యుల గుండెల్లోకి చేర్చడంలో కీర్తన కీలక పాత్ర పోషించింది…
-
సైలెంట్ ఆపరేషన్…: ఏ నియోజకవర్గంలో ఏ సమస్య ఉంది? సోషల్ మీడియాలో ఏ అంశం ట్రెండ్ చేయాలి? ఎవరికి టికెట్ ఇస్తే గెలుస్తారు? వంటి అంశాలపై ఆమె ఇచ్చిన డేటా విశ్లేషణ అప్పట్లో సంచలనం…
విజయ్ కంట పడ్డ ‘శివకాశి’ ఆణిముత్యం!… సినిమా గ్లామర్ ఓట్లు తెస్తుందేమో కానీ, ఆ ఓట్లను సీట్లుగా మార్చాలంటే పక్కా మేనేజ్మెంట్ కావాలని నమ్మిన వ్యక్తి దళపతి విజయ్. తన ‘తమిళ వెట్రి కళగం’ (TVK) పార్టీకి ఒక ఆధునిక రూపు ఇవ్వాలని భావించిన విజయ్, కీర్తనలోని చాకచక్యాన్ని గమనించాడు. కేవలం సలహాలు ఇవ్వడమే కాదు, ప్రత్యక్ష రాజకీయాల్లోకి రావాలని ఆమెను ఆహ్వానించి ‘శివకాశి’ అగ్నిపరీక్షలో నిలబెట్టాడు…
తొలి అడుగులోనే ఘనవిజయం సాధించిన కీర్తన, ఇప్పుడు ఏకంగా మంత్రివర్గంలో చోటు సంపాదించి అందరినీ ఆశ్చర్యపరిచింది… అదీ వాణిజ్య పన్నులు, రిజిస్ట్రేషన్ల శాఖ… వావ్…
ముచ్చటగా మూడు ముక్కల్లో చెప్పాలంటే… వారసత్వ రాజకీయాల నీడలో కాకుండా, కేవలం మేధస్సుతో, పక్కా ప్లానింగ్తో రాజకీయ శిఖరాలను అధిరోహించవచ్చని కీర్తన నిరూపించింది… ఒకప్పుడు నాయకులకు గెలుపు మార్గాలను చూపించిన ఆమె, నేడు అదే గెలుపు గుర్రంపై స్వారీ చేస్తూ తమిళనాడు భవిష్యత్తును తీర్చిదిద్దే బాధ్యతను భుజాన వేసుకుంది…
ఆల్ ది బెస్ట్ కీర్తన! యువత తలుచుకుంటే ఏ రంగమైనా కొత్త పుంతలు తొక్కాల్సిందేనని నీ విజయం మరోసారి చాటి చెప్పింది….
Share this Article