చావుతో అతి పెద్ద పోరాటం… ఆమె బతికిన తీరే ఓ అద్భుతం…

.

చావును జయించిన ధీరవనిత…: మృత్యువు అంచున మనిషిలోని అజేయ శక్తికి అలిసన్ బోథా సాక్ష్యం!

ఒక చేత్తో తెగి వేలాడుతున్న తన తలను పట్టుకుంది.. మరో చేత్తో శరీరంలోంచి బయటకు వస్తున్న పేగులను లోపలికి నొక్కి పట్టుకుంది.. నెత్తుటి మడుగులో, కొన ఊపిరితో ఆమె రోడ్డు వైపు పాకడం మొదలుపెట్టింది. ఆమె పేరు అలిసన్ బోథా. ఒక సామాన్య మహిళను అసామాన్య పోరాట యోధురాలిగా మార్చిన ఆ రాత్రి, మానవ చరిత్రలోనే అత్యంత భయంకరమైనది.. మరియు అత్యంత స్ఫూర్తిదాయకమైనది కూడా…

ఆ చీకటి రాత్రి.. ఏం జరిగింది?

డిసెంబర్ 18, 1994… దక్షిణాఫ్రికాలోని పోర్ట్ ఎలిజబెత్… 27 ఏళ్ల అలిసన్ తన స్నేహితురాలిని ఇంట్లో దించి, తన అపార్ట్‌మెంట్‌కు చేరుకుంది… అప్పుడే ఒక దుర్మార్గుడు కత్తితో బెదిరిస్తూ ఆమె కారులోకి జొరబడ్డాడు… తన పేరు “క్లింటన్” అని చెప్పుకున్న వాడు, మరో స్నేహితుడిని ఎక్కించుకుని ఆమెను నిర్మానుష్య ప్రాంతానికి తీసుకెళ్లాడు…

• అక్కడ జరిగిన దారుణం మానవత్వానికే మచ్చ… ఆమెపై సామూహిక అత్యాచారం చేశారు… గొంతు నులిమి చంపాలని చూశారు… ఆమె చనిపోలేదని గ్రహించి, పొట్టలో 30 సార్లు కత్తితో పొడిచారు… ఆమె ఇక ఎప్పటికీ తల్లి కాకూడదని ఒక నిందితుడు ఆమె ప్రత్యుత్పత్తి అవయవాలనే లక్ష్యంగా చేసుకుని దాడి చేశాడు… ఆమె కాలు కదలడం చూసి, చావలేదని నిర్ధారించుకుని గొంతును 16 సార్లు కోశారు… ఆమె తల దాదాపు శరీరం నుండి వేరుపడేంత లోతుగా కోశారు… కిరాతకానికి పరాకాష్ట… తలుచుకుంటేనే భయంతో వణికిపోయేంత హింస…

“ఇంతకు మించి హింస అక్కర్లేదు, ఇంత చేశాక ఇక ఎవరూ బతకలేరు…” అని నవ్వుకుంటూ ఆ మానవ మృగాలు వెళ్ళిపోయాయి…

మరణాన్ని ఎదిరించిన సంకల్పం… కానీ అలిసన్ కళ్ళు తెరిచింది… తను అక్కడ పడి ఉంటే తనను చంపింది ఎవరో ప్రపంచానికి తెలియదని ఆమెకు అర్థమైంది… అందుకే మృత్యువుతో యుద్ధం మొదలుపెట్టింది… తన వేళ్లతో ఇసుకపై నిందితుల పేర్లు (ఫ్రాన్స్ డు తోయిట్, థియున్స్ క్రుగర్) రాసింది… దాని కింద “I love Mum” అని రాసి తన చివరి సందేశాన్ని మిగిల్చింది…

కానీ ఆమె ప్రాణాలు వదలడానికి సిద్ధంగా లేదు… తన తల వెనక్కి పడిపోకుండా ఒక చేత్తో పట్టుకుని, మరో చేత్తో పొట్టలోని భాగాలను నొక్కి పట్టుకుని రోడ్డు వైపు పాకింది… తెగిపోయిన థైరాయిడ్ గ్రంథి బయటకు కనిపిస్తున్నా, రక్తపు ముద్దగా మారిన ఆమెను చూసి రోడ్డుపై వెళ్తున్న ఒక వెటర్నరీ విద్యార్థి ఆగాడు… ఆమె బతుకుతుందని ఎవరూ ఊహించలేదు… కానీ సర్జరీల తర్వాత ఆమె ప్రాణాలతో బయటపడింది…

విజేతగా.. అమ్మగా.. ఆస్పత్రిలో చికిత్స పొందుతూనే నిందితులను గుర్తించి, వారికి జీవిత ఖైదు పడేలా చేసింది… అంతటి ఘోరం జరిగిన తర్వాత సిగ్గుతో దాక్కోకుండా, తన కథను ప్రపంచానికి చెప్పింది… ఆమె రాసిన ‘I Have Life’ పుస్తకం లక్షలాది మందికి స్ఫూర్తినిచ్చింది…

వైద్యులు ఆమె తల్లి కాలేదని చెప్పారు… కానీ 2003లో డేనియల్, 2006లో మాథ్యూ అనే ఇద్దరు కొడుకులకు జన్మనిచ్చి, ఆ దుర్మార్గుల కుట్రను ఓడించి ‘అమ్మ’గా గెలిచింది…

తాజా సవాళ్లు – పోరాటం దాదాపు 30 ఏళ్ల తర్వాత, 2023లో ఆ నిందితులకు పెరోల్ మంజూరు కావడం ఆమెను మానసిక వేదనకు గురిచేసింది. ఆ ఒత్తిడి వల్ల 2024 సెప్టెంబర్‌లో ఆమెకు బ్రెయిన్ అనీరిజం (మెదడులో రక్తస్రావం) సంభవించింది… మళ్లీ నడవలేని స్థితికి చేరుకుంది… అయితే, ఫిబ్రవరి 4, 2025న దక్షిణాఫ్రికా ప్రభుత్వం ఆ నిందితుల పెరోల్‌ను రద్దు చేసి వారిని తిరిగి జైలుకు పంపింది…

“మీరు ఎలాంటి కష్టాల్లో ఉన్నా అది కేవలం ఒక చిన్న మలుపు మాత్రమే. ముందుకు సాగడం ఆపకపోతే కచ్చితంగా బయటపడతారు. మళ్ళీ కోలుకుంటారు” అని అలిసన్ ఈ రోజు ప్రపంచానికి చాటి చెప్తోంది…

నిజమే.. శరీరం ముక్కలైనా... ఆశను, ఆత్మను ముక్కలు చేయలేమని నిరూపించిన అలిసన్ బోథా, మన కాలపు అతిపెద్ద పోరాట యోధురాలు!  (ప్రభాకర్ జైనీ ఫేస్‌బుక్ వాల్ మీద కనిపించిన స్టోరీకి తెలుగు అనువాదం)