.
Subramanyam Dogiparthi …. మనకు తెలుగులో కమేండో ఆపరేషన్లు కధాంశంగా ఎక్కువ సినిమాలు లేవు . ఉన్న కొన్నింటిలో ఎక్కువగా రాజశేఖరే నటించారు . 1990 డిసెంబర్లో వచ్చిన ఈ మగాడు సినిమా కమేండో ఆపరేషన్ కధాంశంగా వచ్చిందే . జీవిత సమర్పణలో వచ్చిన ఈ సినిమా బాగుంటుంది .
మళయాళంలో బాగా హిట్టయిన Moonnam Mura అనే సినిమాకు రీమేకే మన తెలుగు సినిమా . మళయాళంలో మోహన్ లాల్ , సురేష్ గోపి , రేవతి ప్రభృతులు నటించారు . మళయాళ సినిమాకు దర్శకత్వం వహించిన కె మధుయే తెలుగు సినిమాకు కూడా దర్శకత్వం వహించారు .
Ads
కధ ఏంటంటే : ఆంధ్రాకే చెందిన ఓ కేంద్ర మంత్రి గారు విశాఖపట్టణానికి వస్తారు . రాష్ట్ర ప్రభుత్వం లిజీని గైడుగా పంపుతుంది . మాదక ద్రవ్యాల క్రిమినల్స్ కేంద్ర మంత్రి గారి బృందాన్ని అంతా కిడ్నాప్ చేస్తారు . వంద కోట్లు , వగైరా కావాలని DIG కి తెలియపరుస్తారు .
వారందరినీ కిడ్నాప్ నుండి రక్షించడానికి రాజశేఖర్ని ఆశ్రయిస్తారు . పూర్వాశ్రమంలో అతను పోలీసు అధికారే . క్రిమినల్స్ అతని భార్య , కుమార్తెని కారు బాంబు ద్వారా చంపుతారు . ఆ ఘటనలో అతనంటే అసూయపడే మరో యస్పీ శరత్ కుమార్ ఒక క్రిమినల్ని చంపేస్తాడు . ఇద్దరూ ఘర్షణ పడతారు . ఘర్షణ క్రమంలో పోలీసు శాఖ నుండి రాజీనామా చేసి బయటకు వెళతాడు .
DIG మురళీమోహన్ అభ్యర్ధన మీద బంధితులని రెస్క్యూ ఆపరేషన్లో విజయవంతంగా రక్షించి మగాడు అని పిలిపించుకుని నిష్క్రమిస్తాడు . సినిమా శుభాంతం అవుతుంది . సినిమా మొదటి నుండి చివర దాకా బిర్రుగా సాగుతుంది . ఎక్కడా బోరించదు .
రాజశేఖర్ భార్యగా జీవిత , కుమార్తెగా బేబీ షాలిని , గైడుగా లిజీ , కిడ్నాప్ టీం నాయకుడిగా త్యాగరాజన్ , DIG గా మురళీమోహన్ , IG గా దేవదాస్ కనకాల , ఇతర విలన్లుగా బాబ్ ఏంథొనీ , రాజేష్ , ప్రభృతులు నటించారు . ఇతర పాత్రల్లో పి ఆర్ వరలక్ష్మి , వంకాయల , రమణారెడ్డి , హరిబాబు , బాబూమోహన్ , బ్రహ్మాజీ , పి జె శర్మ తదితరులు నటించారు .
రాజ్ కోటి సంగీత దర్శకత్వంలో సిరివెన్నెల , వేటూరి పాటలను బాలసుబ్రమణ్యం , జానకమ్మ , రాధిక పాడారు . రెండే పాటలు .రెండూ బాగుంటాయి . బయట పెద్దగా హిట్ కాలేదు .
ప్రముఖ నటుడు శరత్ కుమార్ కు తెలుగులో ఇది రెండవ సినిమా . కె యల్ ప్రసాద్ డైలాగులను చక్కగా వ్రాసారు . ఈ సినిమాలో నటనకు రాజశేఖరుకి ఫిలింఫేర్ అవార్డు కూడా వచ్చింది . బాగా నటించాడు .
నేను పరిచయం చేస్తున్న 1249 వ సినిమా #తెలుగుసినిమాలసింహావలోకనం #సినిమా_కబుర్లు #సినిమా_స్కూల్ ……. మగాడు పేరుతో గతంలో ఎన్టీఆర్ హీరోగా కూడా ఓ సినిమా వచ్చింది… మరో తమిళ డబ్బింగ్ సినిమా (సత్యరాజ్) కూడా ఇదే టైటిల్తో వచ్చింది…
Share this Article