గోవిందా..! ఎనిమిదేళ్ల స్ట్రాంగ్ దోస్తీ ముక్కచెక్కలు… ముగ్గురూ మూడు దారులు…

టీవీల్లో కామెడీ షోలను, ప్రత్యేకించి జబర్దస్త్ షోలను రెగ్యులర్‌గా చూసేవాళ్లకు ఓ సంగతి ప్రత్యేకంగా చెప్పాల్సిన పనిలేదు… అది సుడిగాలి సుధీర్, గెటప్ సీను, ఆటో రాంప్రసాద్‌ల దోస్తీ… దాదాపు ఏడెనిమిదేళ్లుగా జబర్దస్త్ టీమ్స్‌లోకి ఎవరెవరో వస్తుంటారు, పోతుంటారు… కొత్త టీమ్స్ వస్తుంటాయి, మాయమైపోతుంటాయి… మొదట్లో వేణు టీంలో సభ్యులుగా కనిపించిన సుధీర్ అండ్ బ్యాచ్ ఇక ఎప్పుడూ విడిపోలేదు… ఆ షోలోనే కాదు, రియల్ లైఫ్‌లో కూడా వాళ్లు మంచి దోస్తులు…

లాస్ట్ నవంబరు, డిసెంబరు నెలల్లో… ఈ సుధీర్ బ్యాచ్ అంతా జబర్దస్త్‌ను విడిచిపెట్టి పోతున్నదంటూ బాగా ప్రచారం జరిగింది… అప్పటికే మల్లెమాల టీం సుధీర్‌కు పొగపెట్టడం మొదలైంది కూడా… ఆ టైమ్‌లో ఈ ముగ్గురూ కలిసి ఓ స్కిట్ చేశారు… జబర్దస్త్ విడిచిపెడుతున్నట్టు ముందుగా ఓ ప్రోమో రిలీజ్ చేశారు… అందులో ఒకరినొకరు కౌగిలించుకున్నారు… కన్నీళ్లు పెట్టుకున్నారు… ఫాఫం, రోజా కూడా ఎమోషన్‌కు గురైంది…

తీరా చూస్తే అది ఓ ప్రాంక్ ప్రోమో… మేం కలిసే ఉంటాం, ఎన్ని అవాంతరాలు వచ్చినా, ఎవరెలా ప్రయత్నించినా సరే మమ్మల్ని ఎవరూ విడగొట్టలేరు, మా దోస్తీ నాగార్జున సిమెంట్‌కన్నా స్ట్రాంగ్, ఇన్నేళ్లు ఎలాగో, ఇకపైనా అలాగే… అని అసలు స్కిట్‌లో చెప్పుకున్నారు… అందరూ చప్పట్లు కొట్టారు, అయిపోయింది… కానీ పైన తథాస్తు దేవతలు ఉంటారట కదా… ఆ ప్రోమో చూసి తథాస్తు అన్నట్టున్నారు… అదే జరిగింది… ఎలాగంటే..?

ఆ ప్రోమో, ఆ స్కిట్ తరువాత చకచకా పరిణామాలు చోటుచేసుకున్నాయి… ముందుగా గెటప్ సీను ఈటీవీని, మల్లెమాలను వదిలేసి వెళ్లిపోయాడు… ఈ ముగ్గురి దోస్తీకి పగులు స్టార్టయింది… ఏవో చిన్నాచితకా సినిమా అవకాశాలు వెతుక్కుంటున్నాడు… నెక్స్ట్ సుధీర్ ఔట్… తనను పొమ్మనలేక పొగపెడుతున్నారు అనే సంగతి బలంగా అర్థమైపోయింది… ఫస్ట్ స్పెషల్ ఈవెంట్స్, తరువాత ఢీ నుంచి ఔట్… రీసెంటుగా జబర్దస్త్ నుంచి ఔట్… త్వరలో శ్రీదేవి డ్రామా కంపెనీ నుంచి కూడా… ఆ కథంతా మనం చెప్పుకున్నదే…

ఇప్పుడు సుడిగాలి సుధీర్ పేరు కూడా కొట్టేశారు… సాధారణంగా తన పేరిట ఆ ముగ్గురి స్కిట్ వచ్చేది కదా… దాన్ని డిలిట్ కొట్టేశారు… మిగిలింది రాంప్రసాదే కదా… తననే టీం లీడర్‌ను చేసి, ఆటో రాంప్రసాద్ టీం అని పేరు పెట్టేశారు… (ఈ పేరుతో చేసిన తొలి స్కిట్ పరమ నాసిరకంగా ఉంది… అది వేరే సంగతి…) సో, మేం విడిపోం, దోస్త్ మేరా దోస్త్, మా బంధం దృఢమైంది అని ఎప్పుడైతే బలంగా ఓ ప్రత్యేక స్కిట్ ద్వారా చెప్పుకున్నారో… అప్పటి నుంచే ఆ బంధం కాస్తా విచ్చిపోయి, ముగ్గురూ వేర్వేరు బాటల్లోకి వెళ్లిపోయారు…

సాధారణంగా అనసూయకు, రష్మికి పడదు… అది అందరికీ తెలిసిందే… రష్మికి, సుధీర్ ఎనిమిదేళ్లుగా జాన్ జిగ్రీ దోస్తానా… ఆది, అనసూయ కాస్త కలివిడిగా స్కిట్స్‌లో పార్టిసిపేట్ చేస్తుంటారు… కానీ ఇప్పుడు ఏమైంది..? రష్మి, సుధీర్ వేర్వేరు బాటలు… ఆది మొత్తానికే జబర్దస్త్‌లో లేకుండా పోయాడు, అనసూయతో సుధీర్‌తో సూపర్ సింగర్ షోలో జతకట్టింది… అవును, ఢీ నుంచి పంపించేసిన సదాను తిరిగి జబర్దస్త్‌కు తీసుకొచ్చినట్టు… అలా అలా కొన్ని జరిగిపోతుంటాయి…!!