హీరోల బూట్లు నాకడం బందుపెడితే చాలు… ప్రేక్షకుడు ఈడ్చి తన్నడం ఆగుతుంది…

కరోనా సమయంలో ప్రేక్షకుల ఆలోచనా విధానంలో సమూలమైన మార్పు వచ్చింది. రోజుల తరబడి నిర్వ్యాపారం, పని లేకపోవడం వలన ప్రేక్షకులు, ఓటీటీ వేదికల మీద ఇతర భాషా చిత్రాలను చూసి, ఇంప్రెస్ అయి వాటితో తెలుగు సినిమాలను పోల్చి చూసుకుని, మన సినిమాలలోని డొల్లతనాన్ని పసిగట్టారు. కథల్లో నవ్యత లేకపోవడం, హీరోల బిల్డప్పులు, హీరోయిన్ల నకరాలు – ముఖ్యంగా ప్రజలు కరోనాతో అల్లల్లాడుతుంటే, ఏ ఒక్క సినిమా ప్రముఖుడు సిన్సియర్ గా తమకు సహాయం చేయకపోవడం ప్రజలను, తెలుగు సినిమాకు దూరం చేసింది.

ప్రజలు, సినిమా రంగ కార్మికులు, ‘అన్నమో రామచంద్రా!’అని అల్లల్లాడుతుంటే, సినీహీరోలు తమ వ్యానిటీ వ్యానులను, కోట్ల విలువ చేసే బంగళాలను, విమానాలను, ఐశ్వర్యాన్ని ప్రదర్శిస్తుంటే ప్రజలు ఛీ కొట్టారు. తాము చెల్లించే పైస పైసాను, వాళ్ళంతా కొల్లగొట్టినట్టు ఫీలయ్యారు. కరోనా సమయంలో తెలుగు సినీ హీరోలు ప్రజల అభిమానాన్ని కోల్పోయారు. అరచేతిలో వైకుంఠంలాగా, మన కథే అనిపించే మంచి కథ, కథనం, భూమ్మీదనే నిలబడి నటించిన నటీనటులు, ఏ భాషవాళ్ళైనా సరే, వారి సినిమాలను బాగా ఆదరించారు. ఇన్నాళ్లూ తాము రొడ్డ కొట్టుడు సినిమాలను ఆదరించి నిర్మాతలను, సినీ హీరోలను, దర్శకులను కోటీశ్వరులను చేసామని గ్రహించారు. ఆ హీరోలు తమను, తాము కష్టాల్లో ఉన్నప్పుడు, వరదల్లో, ప్రకృతి విపత్తుల్లో ఎన్నడూ, ఆదుకోలేదనీ, ఆదుకోరని అర్థమయి వారిని దూరంగా పెట్టారు.

దానికి తోడు, చెత్త సినిమాలను నిర్మించి వేలాది స్క్రీన్లలో విడుదల చేసి, సినిమా గురించిన అసలైన ‘టాక్’ బయటకు వచ్చేలోగానే, రెండు మూడు రోజుల్లోనే, వందల కోట్లు గుంజేయాలనే కక్కుర్తిని ప్రేక్షకులు పసిగట్టారు. సినీహీరోలే, ఇప్పుడు నిర్మాతలై, లాభాల్లో వాటాలు గుంజుకుంటున్నారు. అవసరం ఉన్నా లేకున్నా నెలల కొద్దీ విదేశాల్లో షూటింగులు, హీరోయిన్లకు కూడా కోట్లలో పారితోషికాలు, తన చెలికత్తెలతో సహా ఐదారుగురికి ఎగ్జిక్యూటివ్ క్లాసు విమాన ప్రయాణాలు, 7 నక్షత్రాల హోటళ్ళలో బస, సంవత్సరాల కొద్దీ నిర్మాణం, లక్షలాది రూపాయలు అద్దె చెల్లించి నిరుపయోగంగా పడి ఉండే సాంకేతిక సామాగ్రి వల్ల, నిర్మాతలకు తడిసి మోపెడవుతుంది. ఈ వృధా ఖర్చులను చూసి సామాన్య ప్రేక్షకుడు ఎందుకు సానుభూతి చూపాలి?

చెత్త కథలను ఎన్నుకుని, పది ఇంగ్లీషు సినిమాలలోని సీన్లను కాపీ కొట్టి, వాటికి ఎంత అలంకారం చేస్తే మాత్రం ఏం లాభం? ఇప్పుడు తెలుగు సినిమా, తెలుగు సినిమా కాదు. ప్రతీది ‘పాన్ ఇండియా’ మూవీనే! దానిని మనమెందుకు చూడాలి? ప్రతీ భాష నుంచి ఒక నటుణ్ణి పెట్టి, అన్ని భాషల ప్రేక్షకులను ఫూల్స్ చేయాలనుకుంటే, అసలుకే మోసం వచ్చింది. నిర్మాతలు, దర్శకులు చేసే మోసాలను, గిమ్మిక్కులను ప్రేక్షకులు, పసిగట్టారు కాబట్టే అవి ఎంత తోపులైన హీరోలు నటించినా, ఈడ్చి తంతున్నారు. ఇప్పుడు ప్రేక్షకుడే హీరో! ఇప్పుడు ఇది ప్రేక్షకుడి సామ్రాజ్యం. దానికి తోడు, వీరి అక్రమ సంబంధాలు, పెళ్ళిళ్ళు, విడాకులు, ఎన్నికలు, అంగాంగ ప్రదర్శనలను చూసిన ప్రేక్షకుడికి వీరి పట్ల గౌరవం తగ్గిపోతుంది.