దేశాల నడుమ గూఢచర్యానికి డ్రగ్ మాఫియాల సాయం… నిష్ఠురనిజం…

సాధారణంగా గూఢచార సంస్థలు విదేశాలలో కీలక సమాచారం కోసం వివిధ రూపాలలో తమ ఏజెంట్స్ ని నియమించుకుంటాయి. వ్యక్తిగతంగా రౌడీషీటర్స్ దగ్గర నుండి చిన్న చిన్న మాఫియా ముఠాల నాయకులని అలాగే ఉగ్ర కార్యకలాపాలలో నిమగ్నం అయి ఉన్న సంస్థల నాయకులని మరియు డ్రగ్స్ సరఫరా చేసే అంతర్జాతీయ మాఫియాలతో సంబంధాలని పెట్టుకొని పనిచేస్తూ ఉంటాయి. ఒక దేశం నుండి మరో దేశానికి మనుషులని అక్రమ రవాణా చేసే ముఠాలు కూడా ఏదో ఒక గూఢచార సంస్థతో సన్నిహిత సంబంధాలని కలిగి ఉంటాయి.

ఇక హనీ ట్రాప్ కోసం సినీ తారలు అలాగే అందమయిన యువతులని కూడా తమ ఆపరేషన్లో భాగంగా వాడుకుంటూ ఉంటాయి. కొన్ని సంబంధాలు తాత్కాలికంగా ఉండి తమకి కావాల్సిన సమాచారం అందగానే తమకి సమాచారం ఇచ్చినవాళ్ళతో మళ్ళీ మాట్లాడరు. అవి తాత్కాలికంగా మాత్రమే ఉంటూ ఉంటాయి.

ఇక గూఢచర్యం అనేది ఎప్పుడూ డబ్బుతో ముడి పడి ఉంటుంది! ముఖ్యంగా డాలర్లు లేదా బంగారం లేదా డ్రగ్స్ ని ఇచ్చి తమ పని కానిచ్చుకుంటూ ఉంటాయి ! మీరు చదువుతున్నదీ నిజం ! డ్రగ్స్ సరఫరా చేసే లేదా తయారుచేసే మాఫియాలని ఎందుకు ప్రభుత్వాలు అంతం చేయలేకపోతున్నాయి అని ప్రశ్నించుకుంటే ప్రతీ దేశపు గూఢచార సంస్థలు ప్రధానంగా తమ సమాచార సేకరణ కోసం ఆధారపడేది ఈ డ్రగ్స్ సరఫరా మరియు తయారుచేసే మాఫియాలని వాడుకుంటాయి ! అందుకనే ఇలాంటి డ్రగ్ మాఫియాలు ఎప్పుడూ అంతం కావు అది అమెరికా కావొచ్చు లేదా యూరోపు దేశాలు కావొచ్చు లేదా లాటిన్ అమెరికన్ దేశాలు కావొచ్చు పూర్తిగా డ్రగ్ మాఫియాని అణిచివేయవు ఎందుకంటే వాటితో తమకి పని ఉంటూ ఉంటుంది ఎప్పుడూ !

CIA ఆపరేషన్స్ భాగంగా తమ ఏజెంట్స్ ఎక్కడన్నా, ఎప్పుడన్నా ఏ దేశంలో అయినా దొరికిపోతే ఎలా విడిపిస్తుంది ? సాధారణంగా సీక్రెట్ ఏజెంట్స్ ని పెద్ద వ్యాపారవేత్తగా ప్రోజెక్ట్ చేసి వాడుకుంటాయి కానీ ఏదో ఒక సందర్భంలో ఎక్కడో అక్కడ దొరికిపోయినప్పుడు వాళ్ళని డ్రగ్స్ సరఫరా చేస్తూ పట్టుబడ్డట్లుగా నటిస్తారు. ఒకవేళ ఆ దేశ అధికారులు డబ్బుకి ఆశపడే వాళ్ళు అయితే వాళ్ళు అడిగినంత డబ్బుని డాలర్ల రూపంలో ఇచ్చి విడిపించుకుంటారు. డాలర్లు అనేవి ఎంత మొత్తం అయినా సరే ఇచ్చి విడిపించుకుంటుంది సిఐఏ!

ఇక పోలీసులకి దొరికిపోయిన తమ ఏజెంట్ నేరుగా విమానం ద్వారా ఆ దేశం దాటలేడు ఎందుకంటే పాస్పోర్ట్ సీజ్ అయి ఉంటుంది కాబట్టి. ఇలాంటి సందర్భాలలో సిఐఏ డ్రగ్ మాఫియాని వాడుకుంటుంది తమ ఏజెంట్ ని దేశం దాటించడానికి. ఏదో ఒక సముద్ర తీరం దగ్గరికి పట్టుబడి విడిపించబడ్డ ఏజెంట్ చేరుకుంటాడు అక్కడ నుండి స్పీడ్ బోట్ల ద్వారా డ్రగ్ మాఫియా మనుషులు సముద్ర మధ్యభాగంలోకి తీసుకెళ్ళి అక్కడ చమురు రవాణా లేదా కంటైనర్స్ రవాణా చేసే నౌకలలోకి ఎక్కిస్తారు ఆ తరువాత వాళ్ళకి కావాల్సిన చోట మళ్ళీ ఇంకో దేశపు డ్రగ్ మాఫియా ఆ ఏజెంట్ ను స్పీడ్ బొట్ల ద్వారా వేరే దేశానికి చేరుస్తారు ఇక కొత్త పాస్పోర్ట్ తో స్వేచ్ఛగా తిరగగలుగుతాడు ఆ ఏజెంట్ !

అలాగే వివిధ దేశాలలో ఉండే తమ ఏజెంట్స్ పట్టుపడితే డ్రగ్ మాఫియా రంగప్రవేశం చేసి డబ్బులిచ్చి విడిపిస్తుంది. చాలా కొద్ది ఆపరేషన్స్ లో నేరుగా అమెరికన్ అధికారులు తమ పౌరుడిని అక్రమంగా అరెస్ట్ చేశారు అంటూ దౌత్యపరంగా ఒత్తిడి తెచ్చి విడిపించుకుంటూ ఉంటుంది. 2001 నుండి 2021 వరకు నాటో దేశాల సైనికులు ఆఫ్ఘనిస్తాన్ లో ఉన్నా ఏనాడూ తాలిబన్లు పండించే గంజాయి పంటల జోలికి వెళ్లలేదు అంటే వాళ్ళ అవసరం ఉండబట్టే !

ఏ గూఢచార సంస్థకి అయినా కావలసింది డాలర్లు అదీ పెద్ద మొత్తంలో ! డాలర్ అనేది అంతర్జాతీయ కరెన్సీ. చాలా ఈజీగా ఆయా దేశాల కరెన్సీలలోకి మార్చుకోవచ్చు! మళ్ళీ ఇప్పుడు రష్యా విషయానికి వద్దాము! రష్యన్ గూఢచార సంస్థ కి ఉక్రెయిన్ లో సమాచారం సేకరించడానికి కావలసింది అక్కడి కరెన్సీ లేదా డాలర్లు. ప్రస్తుతం ఉక్రెయిన్ కరెన్సీ కి పెద్దగా విలువ లేదు కాబట్టి అక్కడ డాలర్ కే డిమాండ్ ఉంది కానీ FSB భారీ మొత్తంలో డాలర్లు ఆఫర్ చేసి సమాచారం సేకరించలేకపోవడానికి తగినన్ని డాలర్లు లేకపోవడమే ! (డబ్బు లేక కాదు, డాలర్లు లేక…)

ఉక్రెయిన్ నుండి వివిధ దేశాలకి యుద్ధం వలన వలస వెళ్ళిన వారి సంఖ్య దాదాపుగా 78 లక్షల మంది ! వీళ్లలో 27 లక్షల 50 వేల మంది రష్యాలోకి శరణార్ధులుగా వెళ్లారు ! ఆశ్చర్యంగా ఉంది కదూ ? అవును ఇది నిజం ! సోవియట్ యూనియన్ కాలం నుండి ఉక్రెయిన్ రష్యా ప్రజల మధ్య వివాహ సంబంధాలు ఉన్నాయి కాబట్టి రెండు దేశాల ప్రజలకి రెండు దేశాలలో దగ్గరి బంధువులు ఉన్నారు అందుకే రష్యా తమ దేశంలో రావడానికి అనుమతి ఇచ్చింది పైగా వీళ్ళు అందరూ రష్యన్ భాష మాట్లాడగలరు.

ఒకప్పుడు అంటే 1995 వరకు రష్యన్ గూఢచార సంస్థ చాలా యాక్టివ్ గా ఉండేది ఎంతగా అంటే వివిధ దేశాలలో కధలు కధలుగా చెప్పుకునేంతగా ! సోవియట్ యూనియన్ విచ్ఛిన్నం తరువాత KGB [Komitet Gosudarstvennoy Bezopasnosti – Committee for State Security] తన పేరుని మార్చుకొని FSB [Federal Security Service of the Russian Federation] గా మార్పు చెందిన తొలినాళ్ళలో పుతిన్ దానిమీద అధికారం చెలాయించే వాడు. సోవియట్ విచ్ఛిన్నం తరువాత ఆర్ధికంగా చితికిపోయిన స్థితిలో ఉన్న రష్యా తన గూఢచార సంస్థకి తగినన్ని నిధులు కేటాయించలేక పోయింది. దాంతో క్రమేణా వార్తలలో ఉండడం తగ్గిపోయింది !

ఎలెక్ట్రానిక్స్ !

యూరోపు మరియు ఆమెరికాలలో ఎలెక్ట్రానిక్స్ అభివృద్ధి చెందినంతగా రష్యాలో అభివృద్ధి చెందలేదు. ఈ విషయంలో చైనా కంటే వెనకపడి ఉంది రష్యా. కమ్యూనికేషన్ వ్యవస్థని అడ్డుకొని సంభాషణలు వినే అత్యాధునిక ఎలెక్ట్రానిక్స్ విషయం లో అమెరికా, చైనాలు చాలా ముందున్నాయి. తరుచూ రష్యన్ కమాండర్లు ఉక్రెయిన్ లోని యుద్ధ సమాచారాన్ని రష్యాలో ఉన్న సెంట్రల్ కమాండ్ కి చేరవేసే క్రమంలో ఉక్రెయిన్ ఇంటెలిజెన్స్ అమెరికా సహాయంతో అడ్డుకొని సైనిక వ్యూహాలని తెలుసుకోవడం వలన రష్యా తరుచూ దెబ్బతింటూ వచ్చింది గత పది నెలలుగా !

దాదాపుగా అన్ని దేశాలలోని డ్రగ్ మాఫియా ప్రస్తుతం సిఐఏ లేదా మోస్సాద్ కనుసన్నలలో ఉన్నాయి కాబట్టి రష్యాకి అవకాశం లేకుండా పోయింది. మరోవైపు గూఢచర్యానికి ఉపయోగించే టెలీకమ్యూనికేషన్ సంబంధించి మరీ ముఖ్యంగా టెలీ కమ్యూనికేషన్ ద్వారా జరిగే సంభాషణలని రహస్యంగా వినగలిగిన టెక్నాలజీ ఇప్పుడు అమెరికా ఆధిపత్యంలో ఉంది. అఫ్కోర్స్ అది ఎలాంటి వస్తువయినా సరే దానిలో ఇమిడిపోయే విధంగా మైక్రోఫోన్లని పెట్టగలిగే సామర్ధ్యం విషయంలో ఇప్పటికీ రష్యాదే పై చేయి కానీ వైర్లెస్ లేదా శాటిలైట్ కమ్యూనికేషన్ ని అడ్డుకొని వినగలిగే విషయంలో అమెరికా ఇజ్రాయెల్ లు ముందు ఉన్నాయి.

ఉక్రెయిన్ విషయానికి వస్తే ఇదివరకటిలాగా రష్యా తరుపున పని చేయడానికి ఎవరూ సిద్ధంగా లేకపోవడం రష్యాకి ప్రతిబంధకంగా మారింది. ముఖ్యంగా డాలర్ రూపంలో లంచాలు ఇవ్వగలిగే స్థితిలో రష్యా లేదు. ఈ విషయంలో అమెరికన్ సిఐఏ ఉక్రెయిన్ లో రష్యా తరుపున పనిచేస్తున్న వాళ్ళకి అడిగినంత మొత్తంలో డాలర్లు మరియు అమెరికన్ పౌరసత్వం ఆశ చూపడం వలన రష్యన్ గూఢచారులు అమెరికా వైపు పనిచేయడం మొదలుపెట్టడం రెండో కారణం రష్యా ఉక్రెయిన్ లో విఫలం అవడానికి! యుద్ధ సమయంలో ఇదివరకటిలాగా హనీ ట్రాప్ లు పనిచేయట్లేదు. ఒకప్పుడు KGB పరిస్థితి వేరు ఇప్పటి FSB పరిస్థితి వేరు. డాలర్లు ఉంటే రష్యా కూడా ఏదన్నా చేయగలదు. డ్రగ్ మాఫియా అండ లేదు.

ఇన్ని ప్రతికూల పరిస్థితులలో కూడా రష్యా అమెరికన్ సెమీ కండక్టర్లు తెప్పించుకొని వాడుతున్నది అంటే అది గొప్ప విషయం. రష్యన్ డ్రగ్ మాఫియా కూడా అతి పెద్దది ! ప్రపంచంలో ఎక్కడ ఏది కావాలన్నా లేదా పని చేసిపెట్టాలి అన్నా చేయగలదు రష్యన్ డ్రగ్ మాఫియా ! అయితే చాలావరకు సిఐఏ వీళ్ళని తమవైపు తిప్పుకున్నది గత 5 ఏళ్లలో !

ఆఫ్ఘనిస్తాన్ లోని కమ్యూనిస్ట్ ప్రభుత్వానికి సహాయంగా వెళ్ళిన సోవియట్ సైన్యానికి [1983-1991] వ్యతిరేకంగా పనిచేయడానికి ఆఫ్ఘన్ మొజాహిదిన్ లు మరియు తాలిబన్లకి సిఐఏ మొదట్లో ఆయుధాలు,  డాలర్లు ఇచ్చి ప్రోత్సహించింది. తరువాతి కాలంలో తాలిబన్ల చేత గంజాయిని పండించి, దానిని ప్రాసెస్ చేసి, హెరాయిన్ గా మార్చి వివిధ దేశాలలో ఎలా అమ్మాలో దారి చూపించింది సిఐఏ. వాటిని అమ్మి వచ్చిన డబ్బులతో వాళ్ళు ఆయుధాలు కొనడం ప్రారంభించారు. ఇప్పటికీ సిఐఏ అపరేటర్లు తాలిబన్లలో ఉన్నారు.

ఇక భారత గూఢచార సంస్థ కూడా డ్రగ్ మాఫియాతో పని చేయించుకుంటుంది అలాగే పాకిస్థాన్ ISI కూడా డ్రగ్ మాఫియాతో పనులు చేయించుకుంటుంది. RDX లాంటి పేలుడు పదార్ధాలు సముద్ర మార్గం ద్వారా వచ్చేది డ్రగ్ మాఫియా ద్వారానే! ఉక్రెయిన్ లో యుద్ధం ఇంతకాలం కొనసాగడానికి ప్రధాన కారణం ఇంటెలిజెన్స్ వైఫల్యం వల్లనే ! నాటో దేశాలు ఈ విషయంలో విజయం సాధించాయి లేకపోతే ఇన్ని నెలలు యుద్ధం కొనసాగడం జరిగేది కాదు!