సలాడ్స్‌లోకి టమాటాల్లేవ్… కీర దోసల్లేవ్… బ్రిటన్‌లో కూరగాయల కొరత…

గత వారం యూరోపియన్ యూనియన్ చీఫ్ ఉర్సులా వాన్ డెర్ లేయెన్ [Ursula von der Leyen] బ్రిటన్ పర్యటన కోసం వచ్చినప్పుడు నెటిజన్లు ఉర్సులా ని ఉద్దేశిస్తూ మాకు కొన్ని టమాటాలు తీసుకురాకూడదూ అంటూ జోక్ చేశారు సోషల్ మీడియాలో! అయితే అది జోక్ కాదు ! నిజం ! అవును, గత రెండు వారాలుగా బ్రిటన్ లో టమాటాలు, కీర దోసకాయలతో పాటు ఫ్రెష్ వెజిటబుల్స్ కొరత తీవ్రంగా ఉండడంతో అన్ని మాల్స్ కూడా రేషన్ విధించారు వీటి మీద!

సూపర్ మార్కెట్స్ తో పాటు పెద్ద పెద్ద మాల్స్ లో ఒక్కో మనిషికి ఒక్కో బెల్ పెప్పర్స్ [Bell Peppars ] బాగ్ కంటే ఎక్కువ కొనడానికి వీలు లేదు అంటూ బోర్డులు పెట్టారు. ఒక్క బెల్ పెప్పర్ మాత్రమే కాదు టమాటాలు, కీర దోసకాయల మీద కూడా రేషన్ విధించారు. ఒక్కొక్కరికి ఒక్క బాగ్ మాత్రమే అమ్ముతున్నారు!

************************

అధికారులు మాత్రం ఇటీవల స్పెయిన్ మరియు ఉత్తర ఆఫ్రికా లోని బాడ్ వెదర్ వల్ల దిగుబడి పడిపోయింది, దాని వల్లనే కూరగాయల కొరత ఏర్పడింది అంటున్నారు ! అయితే బ్రిటన్ అధికారుల వివరణని నెటిజన్లు వెక్కిరిస్తూ, అలా అయితే మిగతా యూరోపియన్ దేశాలలో కూరగాయల కొరత ఎందుకు లేదు అంటూ ఎదురు ప్రశ్నిస్తున్నారు. స్పెయిన్ మరియు ఉత్తర ఆఫ్రికాలు కేవలం బ్రిటన్ మీదనే ఎందుకు ప్రభావం చూపిస్తున్నాయి ? ఈ ప్రశ్నలకి బ్రిటన్ అధికారుల దగ్గర జవాబు లేదు.

కొంతమంది సోషల్ మీడియాలో మాత్రం బ్రిటన్ యూరోపియన్ యూనియన్ [బ్రేగ్జిట్ ] నుండి బ్రిటన్ వైదొలగడం వల్లనే అన్నిటికీ కొరత ఏర్పడుతున్నది అని విమర్శిస్తున్నారు. బ్రిటన్ ప్రభుత్వం మాత్రం బ్రేగ్జిట్ వల్ల కొరత ఏర్పడింది అన్న విమర్శలని ఒప్పుకోవట్లేదు. తాజా కూరగాయల కొరత అనేది మరో రెండు నెలలు మాత్రమే ఉంటుంది అనీ, అంతవరకు దిగుమతి చేసుకునే కూరగాయల వాడకం మానేయాలని, బ్రిటన్ లో పండించే ముల్లంగి [turnips] ని వాడాలని సలహా ఇచ్చింది బ్రిటన్ పర్యావరణ శాఖ సేక్రటరీ అయిన థేరేసి కొఫ్ఫే [Therese Coffey]. ఇదెలా ఉంది అంటే నెల క్రితం పాకిస్థాన్ ఆహార మంత్రి ప్రజలని ఉద్దేశించి ఒక ప్రకటన చేస్తూ దేశంలో టీ పొడి కొరత తీవ్రంగా ఉంది అని ఇప్పుడు దిగుమతి చేసుకునే వీలు లేదని కాబట్టి పాకిస్థాన్ ప్రజలు టీ తాగడం తగ్గిస్తే మంచిదని సలహా ఇచ్చాడు! పాకిస్థాన్ లో అంటే విదేశీ మారక ద్రవ్యం అయిన డాలర్ కొరత ఉంది కాబట్టి ఒక పూట టీ మానేయండి అనడానికి కారణం ఉంది కానీ బ్రిటన్ కి ఏం మాయరోగం వచ్చింది ?

*****************************

బ్రిటన్ యూరోపియన్ యూనియన్ లో ఉండాలా వద్దా అని యూరోపియన్ పార్లమెంట్ లో ఓటింగ్ పెట్టినప్పుడు గాలరీ లో కూర్చున్న బ్రిటన్ పౌరులతో పాటు కొంతమంది బ్రిటన్ పార్లమెంట్ సభ్యులు కూడా కలిసి పెద్దగా కేకలు వేస్తూ మేము EU లో ఉండము అంటూ ఎగతాళిగా మాట్లాడారు. ఒక పక్క ఓటింగ్ విషయంలో EU అధ్యక్షుడు మాట్లాడుతుండగానే గాలరీ నుండి అరుపులు, కేకలు వినపడుతుండడంతో కొద్ది సేపు తన ప్రసంగాన్ని ఆపి బ్రిటన్ పౌరులు ఎంతటి ఉన్నత సంస్కారవంతులో మీ కేకలు, అరుపులు వల్ల ప్రపంచానికి తెలిసిపోతున్నది అంటూ చురక వేశాక కానీ అల్లరి సద్దుమణగ లేదు !

So! ఆనాటి ఆ పగ తీర్చుకోవడానికే అన్నట్లుగా యూరోపియన్ యూనియన్ చీఫ్ ఉర్సులా వాన్ డెర్ లేయెన్ బ్రిటన్ పర్యటనకి వచ్చింది సరిగ్గా బ్రిటన్ లో కూరగాయల కొరత ఉన్నప్పుడే ! యూరోపియన్ మీడియా మాత్రం చాలా జాగ్రత్తగానే బ్రిటన్ వెజిటబుల్ ఫియాస్కో మీద మాట్లాడింది!

EU నుండి బ్రిటన్ వైదొలగడం వల్ల బ్రిటన్ ఒక్క కూరగాయలే కాదు దాదాపుగా అన్నింటిలోనూ కొరతని ఎదుర్కుంటున్నది అని ప్రధాన కారణాన్ని పేర్కొంది ! మరోవైపు స్పెయిన్ లో చలి తీవ్రంగా ఉండడం చేత మరియు ఉత్తర ఆఫ్రికా దేశం అయిన మొరాకోలో తీవ్ర వర్షాలతో వరదలు రావడం మరో కారణంగా పేర్కొంది! బ్రిటన్ ప్రధానంగా టమాటాలు, కీర దోసకాయలని స్పెయిన్ మరియు మొరాకో దేశాల నుండి దిగుమతి చేసుకుంటూ వస్తున్నది చాలా కాలంగా !

*************************

స్పెయిన్ లోని రైతులు మాత్రం వాతావరణాన్ని నిందిస్తున్నారు! గడ్డ కట్టే చలికాలం అయిపోయిన వెంటనే తీవ్రమయిన ఎండలు రావడం వలన తమ దేశంలో టమాట, కీర దోస, వంకాయల పంట దిగుబడి 40% పడిపోయింది అంటున్నారు. విపరీతమయిన వేడి మరియు వడ గాలుల వలన గత సంవత్సరం యూరోపు మొత్తం పండ్లు, కూరగాయల పంటల మీద తీవ్ర ప్రభావం చూపి దరిమిలా దిగుబడి బాగా తగ్గి పోయి ధరలు పెరగడానికి దోహదం చేసింది. ఎక్కువగా జర్మనీ దేశం బాగా దెబ్బతిన్నది యూరోపు లో.

*****************

యూరోపు దేశాల నుండి దిగుమతి చేసుకోవచ్చు కదా ? యూరోపు దేశాలలో కూడా వాళ్ళకి సరిపడా మాత్రమే పండుతున్నాయి ప్రస్తుతం. కారణం ఏమిటి ? రష్యా ఉక్రెయిన్ యుద్ధానికి ముందు యూరోపు లోని రైతులు టమాటా పండించడానికి గ్రీన్ హౌస్ లని ఉపయోగించి పండించేవారు. కానీ ఇంధనం ధరలు పెరగడం వలన మరో వైపు విద్యుత్ ఉత్పత్తి తగ్గి పోవడం వలన రైతులు గ్రీన్ హౌస్ లలో LED బల్బులు వాడకం మానేశారు. టమాటా పండాలి అంటే గ్రీన్ హౌస్ ల లోపల వేడి కోసం LED బల్బులు వెలిగించేవారు కానీ పెరిగిన ధరల వలన మాకు కరెంట్ ఖర్చులు కూడా రావు అని టమాటా పంటని గ్రీన్ హౌస్ లలో వేయడం ఆపేశారు. దాంతో యూరోపు దేశాలలో టమాటా పంట దిగుబడి తగ్గిపోయి ఏ దేశానికి ఆ దేశం వాడుకోవడానికి సరిపడా మాత్రమే లభ్యం అవుతున్నాయి.

***********************

మరి బ్రిటన్ లో టమాటాలు పండవా ? బ్రిటన్ లో కూడా గ్రీన్ హౌస్ లలో టమాటాలని పండిస్తారు కానీ రష్యా ఉక్రెయిన్ యుద్ధం వలన ఇంధన ఛార్జీలు పెరగడం వలన గ్రీన్ హౌస్ పంటలకి తాత్కాలికంగా స్వస్తి పలికారు బ్రిటన్ రైతులు. రష్యా ఉక్రెయిన్ యుద్ధంకి ముందు గ్రీన్ హౌస్ పంటలకి అయ్యే LED బల్బుల విద్యుత్ ఛార్జీలు ఇప్పుడు 6 రెట్లు పెరిగాయి బ్రిటన్ లో. టమాటో పంట వేసినా వాటిని ఎక్కువ ధరకి అమ్మాల్సి వస్తుందని పంట వేయలేదని రిచర్డ్ డిప్లక్ [Richard Diplock] తెలిపారు. రిచర్డ్ గ్రీన్ హౌస్ ఫార్మింగ్ చేసే అందరి తరుపున ప్రాతినిధ్యం వహిస్తున్నారు. ఫిబ్రవరి నెల దాటే వరకు మేము గ్రీన్ హౌస్ లలో టమాటాలు పండించకూడదు అని ఏకగ్రీవంగా నిర్ణయం తీసుకున్నామని తెలిపారు.

************************

బ్రిటన్ లోని సూపర్ మార్కెట్ యాజమానుల ఫాల్స్ ప్రిస్టేజ్ ! గ్రీన్ హౌస్ పంటలని ఎక్కువ ధరకి కొని అమ్మకూడదు అంటూ బ్రిటన్ లోని సూపర్ మార్కెట్ యజమానులు నిర్ణయం తీసుకున్నారు. ధరలు పెంచి అమ్మడం వలన ప్రజలు ఇబ్బందులు పడతారనే ఫాల్స్ ప్రిస్టేజ్ నిర్ణయం వలనే ఇన్ని సమస్యలు! అసలు లేని దాని కన్నా కొంచెం ధరలు ఎక్కువయినా సరే అమ్మితే తప్పు ఏముంది ? ప్రపంచానికి నాగరికత నేర్పాము అని గొప్పలు చెప్పుకునే బ్రిటన్ కనీసం తమ ప్రజలకి టమాటాలు కూడా ఇవ్వలేని స్థితిలో ఎందుకు ఉన్నది ? స్పెయిన్, మొరాకోలు కాకపోతే వేరే దేశం నుండి దిగుమతి చేసుకోవచ్చు కదా రెండు నెలల పాటు ? ఓహ్ ! డాలర్ రిజర్వ్ తక్కువగా ఉన్నదా బ్రిటన్ లో ? మరీ టమాటాలు, కీర దోసకాయలు దిగుమతి చేసుకుంటే డాలర్లలో చెల్లింపులు చేయాల్సి వస్తుందనా ?

******************************

ఇదిలా ఉండగా యూరోపు దేశాలలోని అన్ని సూపర్ మార్కెట్లు కూడా తాజా కూరగాయాలతో అమ్మకాలని జరుపుతున్నాయి. కానీ బ్రిటన్ లో అలా లేదు. అఫ్కోర్స్ కొన్ని యూరోపు మీడియా సంస్థలు బ్రిటన్ EU నుండి బయటకి వెళ్ళడం వలనే ఇదంతా జరుగుతున్నది అంటూ బ్రేకింగ్ న్యూస్ తో అదరగొడుతున్నాయి! నిజమే ! EU పార్లమెంటు లో బ్రిటన్ ప్రజలు, హౌస్ ఆఫ్ కామన్ సభ్యులు చేసిన ఎగతాళిని ఎలా మర్చిపోగలదు EU?

***************************

యూరోపులోని ఒక విశ్లేషకుడు మాత్రం బ్రిటన్ కి లెక్కలు రావు అనేశాడు ! ఎందుకంటే టమాటాలు, కీర దోసకాయల ధరలు పెంచి అమ్మడం వలన ద్రవ్యోల్బణం [Inflation] పెరుగుతుంది అని భయడుతున్నది బ్రిటన్. ఇంతకంటే హాస్యాస్పదం మరొకటి ఉండదు.

*********************

ప్రతి వారం బ్రిటన్ లో ఒక బాగ్ కీర దోసకాయల ధర 75p [పెన్నీలు] దగ్గర స్థిరంగా ఉంటుంది అది శీతాకాలం అయిన ఎండా కాలం అయినా సరే! ఎగుమతులు చేస్తున్న మొరాకో మాత్రం మంచి లాభాలు ఆర్జిస్తున్నది. బ్రిటన్ రైతులు మాత్రం ప్రభుత్వాన్ని నిందిస్తున్నారు. దశాబ్దాలుగా బ్రిటన్ రైతులకి ప్రోత్సాహకాలు ఇచ్చి పంటలని పండించి దిగుమతుల మీద ఆధారపడకుండా చూడడంలో విఫలం అయ్యింది అని! Well ! ఇది నాగరికత కాదేమో కదా ?

బ్రిటన్ లోని నేషనల్ ఫార్మర్ యూనియన్ మరో విమర్శ చేసింది ప్రభుత్వం మీద ! అదేమిటంటే రష్యా నుండి ఇంధన సరఫరా ఆగిపోవడం వలన పరిశ్రమలకి, సూపర్ మార్కెట్ లకి, ప్రజలకి సబ్సిడీ మీద విద్యుత్ సరఫరా చేస్తున్నది కానీ అదే సబ్సిడీ పంట పండించే రైతులకి ఇస్తే ఎలాంటి లోటు లేకుండా, దిగుమతి చేసుకోకుండా బ్రిటన్ లోనే అన్నీ పండించేవాళ్ళ ము కదా? ఇది కూడా వాస్తవమే కానీ నాగరికత కాదేమో ?

**********************

కర్మ రిటర్న్స్ ?

దశాబ్దాలుగా పశ్చిమ దేశాలు భారత్ మీద పడి ఏడవడమే పనిగా పెట్టుకున్నాయి. భారత్ రైతులకి సబ్సిడీ మీద విత్తనాలు, ఎరువులు ఇస్తున్నది. అలా చేయడానికి వీలు లేదు. ఎందుకంటే భారత వ్యవసాయ ఉత్పత్తలు ప్రపంచ మార్కెట్ లో పోటీకి వచ్చి తమ దేశాల ఆర్ధిక పరిస్థితిని దెబ్బ తీస్తాయని !

************************

క్లైమేట్ ఛేంజ్ ?

వాతావరణ మార్పుల వలన ప్రపంచవ్యాప్తంగా పలు మార్పులు వస్తున్నాయి. గత సంవత్సరం ఫ్రాన్స్ లో వడ గాలులు వీచాయి ! పెట్రోలియం ఉత్పత్తులని చైనా భారత్ లు ఎక్కువగా వాడడం వలన కార్బన్ మోనాక్సైడ్ విడుదల అయ్యి అవి వాతావరణ మార్పులకి గురిచేస్తున్నాయి అని వీళ్ళ బాధ ! భారత్ లో కార్లు కానీ, మోటార్ బైక్ లు కానీ అన్నీ ఇంధనం పొదుపుతో నడిచేవే అమ్ముడుపోతాయి ! లీటర్ పెట్రోల్ లేదా డీజిల్ కి ఎన్ని కిలోమీటర్లు మైలేజ్ ఇస్తుంది అని చూసి మరీ కొంటారు!

మరి పశ్చిమ దేశాలు ?

ఒక గ్యాలన్ [5 లీటర్లు ] కి ఎన్ని మైళ్ళు ఇస్తుంది అని చూస్తారా ? అసలు లెక్క చేయరు ! ఎంత bhp ఇంజిన్ ఉంది ? ఎంత వేగంగా వెళుతుంది ? ఇలా చూస్తారు. భారత్ లో అమ్ముడయ్యే ఎక్కువ కార్లు అన్నీ 1000cc వి ఉంటాయి. మరి అమెరికాలో ? 2000 cc 4 సిలిండర్ లేదా 6 సిలిండర్ కార్లు మాత్రమే అమ్ముతారు. ఎవరు ఎక్కువ ఇంధనం వాడుతున్నారు ? మళ్ళీ అమెరికా కార్ల తయారీదారుల పరిశ్రమలకి భారత్ లో సబ్సిడీలు ఇచ్చి ప్రోత్సహించాలి !