క్రాక్… ఊళ్ల పేర్లనూ భ్రష్టుపట్టించాలా..? వేటపాలెం దేనికి ప్రసిద్ధో తెలుసా..?

---

తన కూతురు ఎవరో అబ్బాయితో సినిమా హాల్లో కనిపించిందని జయమ్మ చెప్పగానే ఆవేశంతో ఊగిపోతాడు ఖూనీకోరు కఠారి కృష్ణ. ఆడపిల్ల విషయం కనుక గుట్టుచప్పుడు కాకుండా పని కానివ్వాలని సలహా ఇచ్చిన జయమ్మనే వేటపాలెంకు పోయి రమ్మంటాడు కృష్ణ. వేటపాలెంకు చేరుకున్న జయమ్మ ఊళ్ళో దిగి ఒక గోళిసోడా తాగి నిర్మానుష్యంగా ఉన్న ఓ సముద్రతీరానికి చేరుకుంటుంది. అక్కడ ఓ చనిపోయిన గాడిదను రెండు కర్రలకు కట్టేసి తలకిందులుగా వేలాడదీసుంటుంది, కింద ఉన్న మట్టి మూకుళ్ళలోకి దాని రక్తం కారుతుంటుంది.

జయమ్మ రెండు వేళ్ళు నోట్లో పెట్టుకుని ఒక్క ఈల వేయగానే ఇసుక లోపల నుంచి పది మంది వస్తాదులు బయటకు వచ్చి, మట్టి మూకుళ్ళలో ఉన్న గాడిద రక్తాన్ని తాగి, దాన్ని ఒంటబట్టించుకునేందుకు అలసట వచ్చేదాకా అటూ ఇటూ పరుగెత్తుతారు. అలా చేయకపోతే శరీరంలోకి వెళ్ళిన గాడిద రక్తం గడ్డ కట్టి మనిషి గుండె ఆగిపోతుందని వాళ్ళలో ఒకడు జయమ్మకు చెబుతాడు. ఎటువంటి సాక్ష్యం దొరక్కుండా మనుషుల్ని అత్యంత కిరాతకంగా హతమార్చే కఠారి కృష్ణ రహస్య అనుచరులు వాళ్ళు.

సినిమాల్లో వాణిజ్యపరమైన అంశాల కోసం ఆ ఊరి పేరును అలా వాడుకోవడాన్ని తప్పు పట్టను కానీ – ఆ సినిమాలో చూపించిన వేటపాలెం ఊరు నిజంగా దేనికి ప్రసిద్ధో చెప్పడమే (తెలియని వారికి) నా ప్రధాన ఉద్దేశం. 1918లో వేటపాలెం గ్రామానికి చెందిన స్థానిక ప్రజానేత శ్రీ ఊటుకూరి వెంకట సుబ్బారావు శ్రేష్టి ఆలోచన, సహాయసహకారాలతో ప్రారంభించబడిన ఓ గ్రంథాలయం – ‘సారస్వత నికేతనం’.

వంద సంవత్సరాల చరిత్ర కలిగిన ఈ గ్రంథాలయం ఇప్పుడు సాహిత్యానికి సంబంధించి దాదాపు లక్ష పుస్తకాల భాండాగారంగా అలరారుతోంది. ఎందరో విద్యార్థులకు, పరిశోధకులకు, ఔత్సాహిక రచయితలకు ఎప్పటెప్పటి సమాచారం కావాలన్నా వేటపాలెం గ్రంథాలయంలో తప్పక దొరుకుతుందని ప్రతీతి. ‘జాతిపిత’ మహాత్మా గాంధీజీ ఇక్కడకు విచ్చేసినప్పుడు గుర్తుగా ఉంచిన తన చేతి కర్ర ఇప్పటికీ భద్రపరిచి ఉంది.

మిత్రుడు Nirmal Akkaraju తన ముత్తాత గారు 1924 లో రాసిన ‘ఒంగోలు రాజ్య చరిత్ర రామచంద్ర విజయం నాటకం’ అనే పుస్తకం కాపీ దొరికిన సంగతి చెప్పినప్పుడు వేటపాలెం గ్రంథాలయం గురించి నాకు తెలిసింది. అంతటి చరిత్ర కలిగిన చోట నేను రాసిన ‘పునాదిరాళ్ళు’ పుస్తకం కూడా ఉంటే… నేను గర్వంగా చెప్పుకోవచ్చనే ఉద్దేశంతో గత నెలలో వెళ్ళి అక్కడ రెండు కాపీలు ఇచ్చాను. సమాచారలోపం కారణంగా పనివేళలు కాసేపట్లో ముగుస్తాయనగా అక్కడికి చేరుకున్నాను. కానీ అక్కడి ఉద్యోగులు/నిర్వాహకులు నేను అడిగిన విషయాలన్నిటికీ చాలా ఓపిగ్గా వివరాలు చెప్పిన తీరు చాలా నచ్చింది. ఏదైనా పరిశోధన చేస్తున్నవారు రోజుల తరబడి ఊళ్ళో బస చేసేందుకు అదే ఊళ్ళో హోటళ్ళు లేవు కానీ దగ్గరి టౌన్ చీరాలలో ఏర్పాట్లు చేసుకోవచ్చు…

---

---