రేపే కదా కౌంటింగ్… ఈ సినిమా చూశాకే టీవీ రిమోట్‌కు పనిచెప్పండి…

సినిమాను చూస్తుంటే మనకు ఎందరెందరో నాయకులు , ఎవరెవరో నాయకులు గుర్తుకొస్తూ ఉంటారు . పదవిని కాపాడుకోవటానికి ప్రధాని సీట్లో కూర్చున్న తుగ్లక్ తన సహచర లోకసభ సభ్యుల్ని ఎలా బ్లాక్ మెయిల్ చేస్తాడు , ప్రజల మనోభావాలను ఎలా తనకు అనుకూలంగా తిప్పుకుంటాడు వంటి సీన్లు నిత్యనూతనంగా కనిపిస్తాయి . సహచర సభ్యుల చేత ఎలా భజన చేయించుకుంటాడో చూస్తుంటే మన ప్రస్తుత నాయకులు చాలామంది గుర్తుకొస్తారు . ఈ సినిమాకు దాసరి నారాయణరావు వ్రాసిన మాటలు తూటాలయి పేలాయి .

తుగ్లక్ గా నాగభూషణం , ఆయన మంత్రిగా కృష్ణంరాజు అద్భుతంగా నటించారు . బహుశా ఆ డైలాగులు , ఆ నటన ఆయన మాత్రమే చేయగలరు అని అనిపిస్తుంది . కృష్ణంరాజుకు మంచి గుర్తింపు వచ్చిన పాజిటివ్ రోల్ . స్వాతంత్ర్య సమరయోధునిగా నాగయ్య , ఆయన కుమార్తెగా రమాప్రభ బాగా నటించారు . ఇతర పాత్రల్లో ఛాయాదేవి , రావి కొండలరావు , రాజబాబు , సంధ్యారాణి , లీలారాణి , అల్లు రామలింగయ్య , సాక్షి రంగారావు ప్రభృతులు నటించారు .

సాలూరి హనుమంతరావు సంగీత దర్శకత్వంలో పాటలన్నీ శ్రావ్యంగా ఉంటాయి . కొన్ని బాగా హిట్టయ్యాయి కూడా . అల్లా అల్లా యా అల్లా ఏమిటయ్యా నీ లీలా పాట బాగా హిట్టయింది . మరో వ్యంగ్య పాట జోహారు జోహారు ఢిల్లీశ్వరా ఆరోజుకీ ఈరోజుకీ వీర సూటవుతుంది . అలాగే మరో వ్యంగ్య పాట యస్ పి బాలసుబ్రమణ్యమే పాడి , నటించారు కూడా . అది : హేపీ బర్త్ డే టు యు అనే పాటలో మంత్రి రమాప్రభను ఉద్దేశించి పాడే వ్యంగ్య పాట తమిళంలో వివాదాస్పదం అయింది కూడా . ఇందిరాగాంధీని పోలేలా ఆ పాత్రను మలిచారని , ఆ పాటలోని సాహిత్యం కూడా ఆమెని ఉద్దేశించే వ్రాసారని సంచలనం , వివాదమూ అయ్యాయి . సచ్చు , జయకుమారి డాన్సులు హుషారుగా ఉంటాయి . తేనె మనసులు జంట రామ్మోహన్ , సంధ్యారాణిల మీద కొంటె చూపుల చిలకమ్మా పాట బాగుంటుంది .