అత్యాచార బాధితురాలు లేడీ డాక్టర్ అర చేతిలో సూసైడ్ నోట్..!!

.
Ravi Vanarasi…. మహారాష్ట్రలోని ఒక జిల్లా ఆసుపత్రిలో జరిగిన ఒక మహిళా వైద్యురాలి ఆత్మహత్య దేశం మొత్తాన్ని కలచివేసింది. ఈ సంఘటన కేవలం ఒక వ్యక్తి విషాదాంతం కాదు; ఇది మన వ్యవస్థలోని లోపాలను, అధికార దుర్వినియోగాన్ని, సమాజంలో స్త్రీల భద్రత ఎంత అగాధంలో ఉందో తెలిపే చేదు వాస్తవం.

ఆమె ఎడమ అరచేతిపై రాసిన చిన్న ఆత్మహత్య లేఖ (సూసైడ్ నోట్) ఆ విషాదానికి ఓ ఉదాహరణ. ఆ లేఖలో ఇద్దరు పోలీసు అధికారుల పేర్లు ఉన్నాయి—ఒకరు పలుమార్లు చేసిన అత్యాచారం, మరొకరు నిరంతర శారీరక, మానసిక వేధింపులకు కారణమని ఆమె స్పష్టంగా పేర్కొన్నారు.

“నా చావుకు కారణం పిఎస్ఐ గణేష్. అతను నన్ను నాలుగుసార్లు అత్యాచారం చేశాడు, ప్రశాంత్ బంకర్ నన్ను శారీరకంగా, మానసికంగా హింసించాడు” అని ఆ లేఖ చెప్తోంది.

ఒకవైపు ప్రజల ప్రాణాలను రక్షించే వృత్తిలో ఉండి, మరోవైపు తన సొంత ఉనికిని, గౌరవాన్ని కాపాడుకోలేని నిస్సహాయ స్థితిని ఈ అక్షరాలు ప్రతిబింబిస్తున్నాయి. తన శరీరంపై, మనసుపై జరిగిన దాడుల గురించి ఆమె ఎంత పోరాడిందో, ఎంతగా మొరపెట్టుకుందో ఊహించడం కూడా కష్టమే.

బాధితురాలు జూన్/జులై నుండే తనపై జరుగుతున్న వేధింపుల గురించి ఆసుపత్రిలోని తన సీనియర్లకు, ఉన్నతాధికారులకు పదేపదే తెలియజేసినట్లు తెలుస్తోంది. ప్రతిసారీ, ఆమె సహాయం కోసం అభ్యర్థించారు, వేధింపులను ఆపాలని వేడుకున్నారు.

చివరికి, ఈ భారాన్ని తట్టుకోలేక, తన జీవితాన్ని అంతం చేసుకుంటానని కూడా హెచ్చరించారు. అయినప్పటికీ, ఆమె ఆర్తనాదాలు చెవిటి గోడల మధ్య ప్రతిధ్వనించాయి. బాధితురాలికి సహాయం చేయాల్సిన వ్యవస్థ, ఫిర్యాదులను పట్టించుకోకుండా, దుర్వినియోగం చేసే పోలీసు అధికారుల చేతల్లో ఆమెను ఒంటరిగా వదిలివేసింది.

ఒక అధికారి, మరణాలకు, ఆత్మహత్యలకు సంబంధించిన కేసుల్లో తప్పుడు ఫోరెన్సిక్ స్టేట్‌మెంట్లు రాయమని ఆమెపై ఒత్తిడి తెచ్చినట్లు కూడా ఆరోపణలు ఉన్నాయి. ఇది కేవలం వేధింపుల కేసు మాత్రమే కాదు, వ్యవస్థాగత అవినీతి, న్యాయ ప్రక్రియను అపహాస్యం చేసే ప్రయత్నం కూడా అని స్పష్టమవుతోంది.

ప్రభుత్వంలో బాధ్యతాయుతమైన పదవుల్లో పనిచేసే వారిపై జరిగే ప్రతి నేరం తీవ్రంగా ఖండించదగినదే. అయితే, ఒక మహిళపై, అందునా వైద్యురాలిపై, ప్రజలకు రక్షణ కల్పించాల్సిన పోలీసుల చేతుల్లోనే ఇలాంటి దారుణాలు జరగడం అత్యంత భయంకరమైన విషయం.

ప్రస్తుత రాజకీయ వాతావరణంలో, ఇలాంటి అమానుష నేరాలు కూడా రాజకీయ ఆయుధాలుగా, పోలరైజేషన్ సాధనాలుగా మారుతున్నాయి… ఏ నేరం జరిగినా, బాధితురాలు, నేరస్థుల మతాలు, రాష్ట్రంలో ఏ పార్టీ అధికారంలో ఉందనే అంశాలు చర్చకు వస్తున్నాయి.

పశ్చిమ బెంగాల్‌లోని కొన్ని సంఘటనలు జాతీయ స్థాయిలో సంచలనం సృష్టించగా, మహారాష్ట్రలో బీజేపీ ప్రభుత్వం అధికారంలో ఉన్న ఈ కేసులో, మీడియా, రాజకీయ వర్గాల నుండి అటువంటి తీవ్రమైన ఆగ్రహం ఎందుకు కనిపించడం లేదు? ఈ ద్వంద్వ ప్రమాణాలు, న్యాయం, మానవత్వం పట్ల మన వైఖరిని ప్రశ్నిస్తున్నాయి…. రవి వానరసి