.
వ్యవస్థలో నిప్పుకణిక: సాత్తాన్కుళం నిజం బయటపెట్టిన ‘మౌన’ సాక్షి రేవతి! పోలీస్ స్టేషన్ అనగానే మనకు భయం, గౌరవం, ఆ పైన కొంచెం సందేహం, జంకు ఉంటాయి… పోలీస్ లాఠీలు వాటిని ఎప్పటికప్పుడు పెంచుతూ ఉంటాయి… అది పోలీసు నైజం… కానీ, ఆ గోడల మధ్యే అమానవీయమైన మరణం (లాకప్ డెత్) సంభవించినప్పుడు? చుట్టూ ఉన్నవాళ్లంతా మౌనంగా ఉండిపోవాలని నిర్ణయించుకున్నప్పుడు? వ్యవస్థలోని ఒక చిన్న భాగం, ఆ వ్యవస్థనే ప్రశ్నించినప్పుడు? అది ఒక సంచలనం మాత్రమే కాదు, చారిత్రక సాహసం!
తమిళనాడు సాత్తాన్కుళం లాకప్ డెత్ ఘటన దేశాన్ని కుదిపేసింది… తండ్రీకొడుకుల్ని లాక్ డౌన్ సమయంలో… అక్రమంగా లాకప్పులోకి తరలించి… కుళ్లబొడిచి, చంపేసిన ఆ సంఘటన వెనుక ఉన్న భయంకరమైన వాస్తవం… భయానకం, బీభత్సం, ఒడలు గగుర్పొడిచే దారుణం… నిన్న కోర్టు బాధ్యులైన పోలీసులందరికీ మరణశిక్ష వేసిన వార్త మెయిన్ స్ట్రీమ్ బాగానే కవర్ చేసింది… గుడ్… కానీ…?
Ads
ఆరోజు సంఘటన బయటకు రాకుండా, సాక్ష్యాలను తుడిచేసే ప్రయత్నం పక్కాగా జరిగింది… కానీ, అదే స్టేషన్లో ఉన్న హెడ్ కానిస్టేబుల్ రేవతి అనే ఒక మహిళా శక్తి, ‘మౌనం’ కంటే ‘నిజం’ మిన్న అని నిరూపించింది… అసలు ఆ పోలీసులందరికీ మరణదండన అనే వార్తకన్నా… దాని వెనుక ఉన్న ఓ లేడీ కానిస్టేబుల్ వార్తే అత్యంత ప్రధానం…
స్టేషన్ గోడల వెనుక దాగుడుమూతలు.., సంఘటన జరిగిన తర్వాత, స్టేషన్లో వాతావరణం భీతావహంగా ఉంది… సాక్ష్యాలను మాయం చేయడం, కేసును పక్కదారి పట్టించడం ప్రధాన లక్ష్యంగా మారింది… అందరూ తోటి పోలీసులే… ఆ ఒత్తిడిని తట్టుకోవడం సామాన్యమైన విషయం కాదు… అయితే, రేవతికి అది కేవలం డ్యూటీ కాదు, తన కళ్లముందే జరిగిన అన్యాయానికి వ్యతిరేకంగా తన మనసాక్షి వేసిన గళం…
ఆ రక్తపు మరకలే దిక్సూచి! నిందితులు సాక్ష్యాలను చెరిపేసేందుకు ఎంత ప్రయత్నించినా, రేవతి అప్రమత్తంగా ఉన్నది… స్టేషన్ను శుభ్రం చేసినా, గోడల మూలల్లో, టేబుళ్ల కింద మిగిలిపోయిన చిన్నపాటి రక్తపు మరకలను ఆమె చాకచక్యంగా గుర్తించి మేజిస్ట్రేట్కు చూపించింది… ఆ రక్తపు చుక్కలే… నిందితుల నేరాన్ని శాస్త్రీయంగా నిరూపించడంలో కీలకంగా మారాయి… సీసీటీవీ ఫుటేజీ లేకపోయినా, తన జ్ఞాపకశక్తితో సంఘటన క్రమాన్ని పూసగుచ్చినట్లు వివరించి దర్యాప్తుకు దిక్సూచిలా నిలిచింది ఆమె…
వ్యవస్థలో ఉంటూ.. వ్యవస్థకు వ్యతిరేకంగా! ఒకే యూనిఫాం వేసుకున్నవాళ్లపైనే సాక్ష్యం చెప్పడం అంటే, మృత్యువుతో చెలగాటం ఆడటమే… రేవతి చేసిన పని చాలా సింపుల్ అనిపించవచ్చు, కానీ ఆ గండంలో నిజం చెప్పడం సామాన్యమైన వ్యక్తికి సాధ్యమయ్యే పని కాదు… ఆమె ధైర్యానికి గుర్తింపుగా, కోర్టు ఆమె భద్రతపై ప్రత్యేక దృష్టి పెట్టింది… సినిమా ఇండస్ట్రీలోలాగే పోలీసు యంత్రాంగంలో కూడా మహిళలకు అంతులేని వివక్ష, ఐనాసరే, ఆమె ధైర్యంగా నిలబడింది… నువ్వు గ్రేట్ తల్లీ…
నిజం ఎప్పుడూ చేదుగానే ఉంటుంది, కానీ దానిని ధైర్యంగా పలికేవారు ఉన్నంత కాలం వ్యవస్థలో ఆశ మిగిలే ఉంటుంది…. సాత్తాన్కుళం కేసులో న్యాయం జరగడానికి ఎన్నో కారణాలు ఉండొచ్చు, కానీ నిజం బయటికి రావడానికి కారణమైన పేరు మాత్రం ఒక్కటే… హెడ్ కానిస్టేబుల్ రేవతి!
ఆమె చూపిన తెగింపు, నిజాయితీ ఇప్పటి తరం పోలీసులకు ఒక పాఠం... వ్యవస్థలో ఉంటూనే వ్యవస్థను ప్రక్షాళన చేయొచ్చని నిరూపించిన ఈ మహిళా కానిస్టేబుల్కు ఒక బిగ్ సెల్యూట్!
Share this Article