అడాప్టివ్ టెస్టింగ్ ! నీట్- పోటీ పరీక్షల అక్రమాలకు రియల్ చెక్ !!

.

మీరు ఓ జాతీయ పరీక్షకు హాజరయ్యారు… అది పూర్తిగా  కంప్యూటరైజ్డ్ అడాప్టివ్ టెస్టింగ్… కొన్ని వేల ప్రశ్నల బ్యాంకు ఆధారంగా మీకు ప్రశ్నలు ఎదురవుతూ ఉంటాయి… అలాగే మీ స్థాయిని బట్టి, అంటే మీ మెరిట్‌ను బట్టి… ఉదాహరణకు మీకు మొదటి ప్రశ్న 18*14 ఎంత అనే రావొచ్చు (సరళమైన ఉదాహరణ)… మీరు చెప్పలేకపోయారు, తరువాత ప్రశ్న 12*9 ఎంత అని రావొచ్చు… అదీ చెప్పలేకపోతే పోనీ, 2*2 ఎంత అని అడగొచ్చు… వైస్ వెర్సా మీరు చకచకా సమాధానాలు చెబితే మీకు మరింత కఠిన ప్రశ్నలు ఎదురుకావచ్చు…

ఎహె, సమాధానాలు చెప్పలేకపోతే… ఈజీ ప్రశ్నలు అడుగుతూ పోతే ఇక మెరిట్ పరీక్ష ఏమున్నట్టు..? నాన్సెన్స్, అబ్సర్డ్ అనిపిస్తోందా..? కానీ కాదు… ఇది సరైన పద్ధతే… అదెందుకో తరువాత చెప్పుకుందాం గానీ… ప్రస్తుతం దేశాన్ని కుదిపేస్తున్న అంశం నీట్… ఇతర రాష్ట్రాల్లోని పబ్లిక్ పరీక్షలు, పబ్లిక్ సర్వీస్ కమిషన్ల పరీక్షలు… అన్నింట్లోనూ అక్రమాలు, పేపర్ లీకేజీలు ఎట్సెట్రా… నీట్ బాగోతం కేంద్రాన్ని కదిలిస్తోంది కదా…

సో, వీటన్నింటికీ సమాధానంగా ఈ అడాప్టివ్ టెస్టింగ్ విధానం ప్రవేశపెట్టాలనే బలమైన చర్చ సాగుతోంది ఇప్పుడు… ఈ రకైం పరీక్షను మన దేశంలోని కొన్ని నిర్దిష్టమైన, అంతర్జాతీయ స్థాయి ప్రవేశ పరీక్షల్లో ఉపయోగిస్తున్నారు కానీ, వైద్య లేదా ఇంజనీరింగ్ వంటి కోట్లాది మంది రాసే భారీ జాతీయ ప్రవేశ పరీక్షల్లో ఇంకా అమలు చేయలేదు… కానీ..?

జీమ్యాట్ (GMAT)…: మేనేజ్‌మెంట్ కోర్సుల కోసం నిర్వహించే అంతర్జాతీయ ప్రవేశ పరీక్ష GMAT పూర్తిగా ‘కంప్యూటర్ అడాప్టివ్ టెస్టింగ్’ విధానంలోనే నడుస్తుంది. ఇందులో అభ్యర్థి ఇచ్చే సమాధానాలను బట్టి తదుపరి వచ్చే ప్రశ్న కఠినత్వం (Difficulty level) మారుతూ ఉంటుంది.

జీఆర్‌ఈ (GRE)…: విదేశాల్లో ఉన్నత చదువుల కోసం రాసే GRE పరీక్ష కూడా ‘సెక్షన్- అడాప్టివ్’ (Section-Adaptive) విధానాన్ని అనుసరిస్తుంది. అంటే ఒక సెక్షన్‌లో అభ్యర్థి ప్రదర్శనను బట్టి, తదుపరి సెక్షన్‌లోని ప్రశ్నల స్థాయి నిర్ణయించబడుతుంది.

ఇతర సర్టిఫికేషన్ పరీక్షలు…: కొన్ని ప్రైవేట్, విదేశీ విశ్వవిద్యాలయాల ఆన్‌లైన్ ప్రవేశ పరీక్షలు, నైపుణ్య సర్టిఫికేషన్ పరీక్షల్లో ఈ విధానాన్ని ఎక్కువగా వాడుతున్నారు.

నీట్ (NEET) లేదా జేఈఈ (JEE) వంటి పరీక్షల్లో ఎందుకు అమలు చేయడం లేదు? లక్షలాది మంది (నీట్ విషయానికి వస్తే సుమారు 20 లక్షలకు పైగా) విద్యార్థులు ఒకేసారి పాల్గొనే ఈ అతిపెద్ద పరీక్షల్లో అడాప్టివ్ టెస్టింగ్‌ను ప్రవేశపెట్టడం వెనుక కొన్ని ఆచరణాత్మక సవాళ్లు ఉన్నాయి.

భారీ స్థాయిలో మౌలిక వసతులు…: దేశవ్యాప్తంగా ఉన్న లక్షలాది మంది విద్యార్థులకు ఒకే సమయంలో హై-స్పీడ్ ఇంటర్నెట్, నిరంతర విద్యుత్ సరఫరా కలిగిన కంప్యూటర్ సెంటర్లను అందుబాటులో ఉంచడం చాలా పెద్ద సవాల్. మారుమూల ప్రాంతాల విద్యార్థులకు ఇది కష్టతరం అవుతుంది.

భద్రతా పరమైన ఆందోళనలు…: ఆన్‌లైన్ పరీక్షలైనాసమయంలో హ్యాకింగ్, సర్వర్ లోపాలు లేదా ఆన్‌లైన్ మాఫియా ప్రమేయం వంటి సాంకేతిక సమస్యలు తలెత్తే ప్రమాదం ఉంది…

ప్రశ్నాపత్రాల సమానత్వం…: అడాప్టివ్ టెస్టింగ్‌లో ఒక్కో విద్యార్థికి ఒక్కో రకమైన ప్రశ్నపత్రం వస్తుంది. అందరికీ వేర్వేరు ప్రశ్నలు ఇచ్చినప్పుడు, అందరినీ ఒకేలా అంచనా వేయడం (Normalization) మరియు పారదర్శకతపై కొన్ని అపోహలు ఉండే అవకాశం ఉంది…

అయితే అన్ని సమస్యలకూ పరిష్కారం ఉంటుంది… ఎక్కడో ఓచోట అడుగు పడాలి… మన ఐఐటీలు ముందుగా ఈ టెస్టింగ్ పద్ధతిని వచ్చేసారి పైలట్ పద్ధతిలో పరీక్షిద్దాం అంటోంది… అసలు ఏమిటి ఈ అడాప్టివ్ టెస్టింగ్..?

అడాప్టివ్ పరీక్ష (Adaptive Testing లేదా Computerized Adaptive Testing – CAT) అనేది అభ్యర్థి ప్రతిభ ఆధారంగా ప్రశ్నల కఠినతను ఎప్పటికప్పుడు మార్చే ఒక ఆధునిక కంప్యూటర్ పరీక్షా విధానం. ఇందులో అందరికీ ఒకే రకమైన ప్రశ్నలు ఉండవు. అభ్యర్థి సమాధానం బట్టి తదుపరి ప్రశ్న మారుతుంది.

ఇది ఎలా పనిచేస్తుంది?  పరీక్షలో మొదటి ప్రశ్న సాధారణ కఠినతతో వస్తుంది. అభ్యర్థి సరిగ్గా సమాధానం ఇస్తే, తదుపరి ప్రశ్న మరింత కష్టంగా ఉంటుంది. అభ్యర్థి తప్పు సమాధానం ఇస్తే, తదుపరి ప్రశ్న సులభంగా మారుతుంది. ఇలా అభ్యర్థి నిజమైన సామర్థ్యాన్ని కంప్యూటర్ త్వరగా అంచనా వేస్తుంది.

తక్కువ ప్రశ్నలతోనే ఖచ్చితమైన ఫలితం వస్తుంది. అభ్యర్థి స్థాయికి తగినట్లు ప్రశ్నలు ఉంటాయి. నిరాశ ఉండదు: చాలా కష్టమైనవి లేదా చాలా సులభమైన ప్రశ్నలతో విసుగు రాదు. పరీక్ష పూర్తయిన వెంటనే ఫలితం వస్తుంది.

అపోహలు… సాధారణ పరీక్షల్లో ఎక్కువ మార్కులు వస్తే ఎక్కువ మెరిట్ ఇస్తారు. కానీ, అడాప్టివ్ పరీక్షలలో (Adaptive Testing) మార్కులను లెక్కించే విధానం పూర్తిగా భిన్నంగా ఉంటుంది. ఇక్కడ కేవలం “ఎన్ని ప్రశ్నలు కరెక్ట్ అయ్యాయి” అని కాకుండా, “ఎంత కష్టమైన ప్రశ్నలకు కరెక్ట్ సమాధానం ఇచ్చారు” అనే దాన్ని బట్టి మెరిట్ నిర్ధారిస్తారు.

దీనివల్ల సులభమైన ప్రశ్నలు వచ్చిన వారికి ఎలాంటి అదనపు లబ్ధి చేకూరదు. అది ఎలాగంటే..?

1. ప్రతి ప్రశ్నకు ఒక ‘కఠినత్వ విలువ’ (Difficulty Weight) ఉంటుంది. అడాప్టివ్ పరీక్షలో అన్ని ప్రశ్నలకూ ఒకే మార్కు ఉండదు. కష్టమైన ప్రశ్నకు ఎక్కువ పాయింట్లు/ విలువ, సులభమైన ప్రశ్నకు తక్కువ పాయింట్లు/ విలువ ఉంటాయి. సులభమైన ప్రశ్నలకు మాత్రమే సమాధానాలు చెప్పుకుంటూ పోతే స్కోరు చాలా తక్కువగా ఆగిపోతుంది.

2. కంప్యూటర్ మీ సామర్థ్య స్థాయిని (Ability Level) వెతుకుతుంది. పరీక్ష మొదట్లో కంప్యూటర్ అభ్యర్థి స్థాయిని సున్నా (0) అనుకుంటుంది. మీరు సరైన సమాధానాలు ఇస్తుంటే, కంప్యూటర్ మిమ్మల్ని పై స్థాయికి (+1, +2, +3) తీసుకెళ్తుంది. అక్కడ ప్రశ్నలు చాలా కష్టంగా ఉంటాయి. మీరు తప్పులు చేస్తుంటే, కంప్యూటర్ మిమ్మల్ని కింది స్థాయికి (-1, -2, -3) పంపుతుంది. అక్కడ ప్రశ్నలు సులభంగా ఉంటాయి.

పరీక్ష ముగిసే సమయానికి మీరు ఏ స్థాయి వద్ద స్థిరపడ్డారో (అంటే ఏ స్థాయి ప్రశ్నలను మీరు తట్టుకోగలిగారో), ఆ స్థాయిని బట్టి మీ మెరిట్ డిసైడ్ అవుతుంది.

3. ఒక ఉదాహరణతో చూద్దాం… అభ్యర్థి-1 (తెలివైనవాడు) వరుసగా కష్టమైన ప్రశ్నలకు సరైన సమాధానాలు ఇచ్చాడు. చివరికి 20 ప్రశ్నలలో 15 ప్రశ్నలు కరెక్ట్ చేశాడు. ఇతనికి వచ్చినవన్నీ అత్యంత కష్టమైన ప్రశ్నలు. అభ్యర్థి-2 (సగటు విద్యార్థి) తప్పులు చేయడం వల్ల ఇతనికేమో సులభమైన ప్రశ్నలు వచ్చాయి. ఇతను కూడా 20 ప్రశ్నలలో 15 ప్రశ్నలు కరెక్ట్ చేశాడు. కానీ ఇతనికి వచ్చినవన్నీ చాలా ఈజీ ప్రశ్నలు.

ఫలితం…: ఇద్దరూ 15 ప్రశ్నలే కరెక్ట్ చేసినప్పటికీ, అభ్యర్థి-1 కే అత్యధిక మెరిట్ / ర్యాంక్ వస్తుంది. ఎందుకంటే అతను కష్టమైన ప్రశ్నలను పూర్తి చేశాడు. అభ్యర్థి-2 సులభమైన ప్రశ్నలు చేయడం వల్ల అతని స్కోరు తక్కువ స్థాయిలోనే ఉండిపోతుంది.

4. తప్పులు చేస్తే భారీ నష్టం… సులభమైన ప్రశ్నలు పొందిన వ్యక్తికి ఎక్కువ మార్కులు వచ్చే ఛాన్స్ లేదు, ఎందుకంటే ఆ ప్రశ్నల మార్కుల విలువ చాలా తక్కువ. పైగా, ఒక సులభమైన ప్రశ్నకు తప్పు సమాధానం ఇస్తే, స్కోరు మరింత వేగంగా కిందకి పడిపోతుంది. కాబట్టి, ఈ విధానంలో ఎవరూ కంప్యూటర్‌ను మోసం చేయలేరు. ప్రతి ఒక్కరి నిజమైన ప్రతిభ చాలా ఖచ్చితంగా బయటపడుతుంది…