.
( దోగిపర్తి సుబ్రహ్మణ్యం ) …. కృష్ణ శ్రీదేవిల జైత్రయాత్రలో మరో సినిమా ఆగస్టు 1980 లో వచ్చిన ఈ చుట్టాలున్నారు జాగ్రత్త . కధ రొటీనే అయినా ప్రముఖ నటుడు , నిర్మాత బాలయ్య బిర్రయిన స్క్రీన్ ప్లే సినిమాను ఏడు సెంటర్లలో వంద రోజుల వైపు నడిపించింది .
చాలా సినిమాల్లో మంచి మారాజుల్ని నమ్మించి మోసం చేసేది చుట్టాలు , చుట్టూ ఉండేవారు . ప్రపంచంలో మోసగించబడేది ఎప్పుడూ మంచోళ్ళు , నమ్మినోళ్ళు , అమాయకులు . ఆస్తుల విషయయమైనా , రాజకీయ అధికారం విషయమైనా . అయితే చుట్టాలు అందరూ మోసం చేసేవారేనా అంటే కానే కాదు . అందరూ అలాగే అయితే కల్కి ఎప్పుడో వచ్చి ఉండేవాడు .
Ads
అనగనగా ఓ మంచి మారాజు . ఆయన తమ్ముడు , చెల్లెలు , మేనల్లుడు గాదె కింద పందికొక్కుల్లా ఆస్తిని హరిస్తూ ఉంటారు . హీరో ఆయన వద్ద మేనేజర్ . అతన్ని అడ్డు తప్పించుకోవటానికి మంచి మారాజుని మర్డర్ చేసి అతన్ని జైలుకు పంపుతారు చుట్టాలు .
ఈ మేనేజర్ లాంటోడే మరొకడు ఉంటాడు . అంటే హీరో కృష్ణ ద్విపాత్రాభినయం అన్న మాట . ఇద్దరూ కలిసి చుట్టాల్ని పోలీసులకు అప్పచెప్పుతారు . టూకీగా ఇదీ కధ .
మేనేజర్ కృష్ణకు జోడీ శ్రీదేవి . దొంగ గంగులుకు జోడీ కవిత . రెండు జంటలూ చలాకీగా , హుషారుగా ఉంటాయి . కృష్ణ , శ్రీదేవి 31 సినిమాలలో కలిసి నటించారు . సక్సెస్ జోడీ . శ్రీదేవి అందరికీ సక్సెస్ జోడీయే అనుకోండి . ఇతర ప్రధాన పాత్రలలో మిక్కిలినేని , రావు గోపాలరావు , నూతన్ ప్రసాద్ , బాలయ్య , వంకాయల , నిర్మలమ్మ , మమత ప్రభృతులు నటించారు .
యం యస్ విశ్వనాథన్ సంగీత దర్శకత్వంలో ఆరు పాటలూ హిట్టే . కృష్ణ అభిమానులకు థియేటర్లలో పండగే పండగ . సి నారాయణరెడ్డి , కొసరాజు , జాలాది పాటల్ని వ్రాసారు . కొసరాజు వ్రాసిన అపనా తనామనా పాట బాగా హిట్టయిన పాట . ఆయన వ్రాసిందే మరో పాట చిక్కావులేరా నా కొండె అని చుట్టాల్ని టీజ్ చేస్తూ పాడే పాట .
సి నారాయణరెడ్డి వ్రాసిన రెక్కలు తొడిగి రెపరెపలాడి పాట కృష్ణ , శ్రీదేవిల మీద ఉంటుంది . బాగా హుషారుగా ఉంటుంది . చాలా శ్రావ్యంగా ఉంటుంది . అలాగే ఆయన వ్రాసిందే రావయ్యా రామేశం పాట కూడా . మరో జంట కృష్ణ , కవితల మీద పాట అమ్మీ ఓలమ్మి పాట కూడా హుషారుగా ఉంటుంది .
జాలాది వ్రాసిందే బావనే వయ్యారి భామ అంటూ సాగే పాట నూతన్ ప్రసాద్ మీద ఉంటుంది . నూతన్ ప్రసాద్ కామిక్ విలనీని బాగా చేసారు . నూతన్ ప్రసాద్ నటన చూస్తుంటే అప్పుడప్పుడు నాగభూషణం గుర్తుకొస్తాడు .
బి వి ప్రసాద్ దర్శకత్వంలో వచ్చిన ఈ సినిమా ఏడు సెంటర్లలో వంద రోజులు ఆడింది . ఆ ఏడింటిలో ఒకటి మా గుంటూరు . సరస్వతి పిక్చర్ పేలసులో ఆడింది . రైల్వే స్టేషన్ రోడ్లో ఇంకా నడుస్తూ ఉంది ఈ థియేటర్ . సంతోషం . మా నరసరావుపేటలో ఈశ్వర్ మహల్లో 50 రోజులు ఆడింది . అదీ నడుస్తోంది .
తెలుగులో హిట్టయిన ఈ సినిమా హిందీ తమిళ భాషల్లోకి రీమేక్ చేసారు . హిందీలో జితేంద్ర , జయప్రద , ఆమె ప్రత్యర్థి శ్రీదేవి నటించారు . తెలుగులో శ్రీదేవి పాత్రను హిందీలో జయప్రద పోషించగా కవిత పాత్రను శ్రీదేవి పోషించింది . తమిళంలో రజనీకాంత్ , శ్రీదేవి , రాధికలు నటించారు . కవిత పాత్రను రాధిక పోషించింది .
సినిమా , పాటల వీడియోలు యూట్యూబులో ఉన్నాయి . కృష్ణ శ్రీదేవి అభిమానులు చూసి ఉండకపోతే అర్జెంటుగా చూసేయండి . A feel good , entertaining , Krishna-mark movie . Of course , Sridevi’s too . #తెలుగుసినిమాలసింహావలోకనం #తెలుగుసినిమాలు
Share this Article