ఒకే సినిమా… ఏకంగా ఆరుగురు శాస్త్రీయ నృత్య దర్శకులు… కళాత్మకం…

.

Subramanyam Dogiparthi ……… స్వర్ణకమలం సినిమా గురించి వ్రాయడమంటే దేదీప్యమానంగా ప్రకాశిస్తున్న సూర్యుడిని దివిటీతో చూపే సాహసం చేయడమే . ఈ సినిమాను ఎన్ని సార్లు చూసి ఉంటానో లెక్కే లేదు . ఒక్కో పాత్ర ఒక్కో థీసిస్ . ఒక్కో పాట ఒక్కో థీసిస్ . తెరవెనుక ఈ సినిమాకు ప్రాణం పోసిన ఒక్కో సాంకేతిక నిపుణుడు ఒక్కో థీసిస్ . ఈ ఒక్క సినిమా మీద ఓ వంద Ph.D థీసిస్సులను తయారు చేయవచ్చు .

• • ప్రపంచ చలన చిత్ర చరిత్రలో ఒక్క సినిమాకు ఆరుగురు నృత్య దర్శకులు నృత్య దర్శకత్వాన్ని వహించిన ఏకైక సినిమా ఈ స్వర్ణకమలం .ఘల్లు ఘల్లు ఘల్లు మంటు మెరుపల్లె తుళ్ళు , అందెల రవమిది పదములదా అనే ఈ రెండు పాటలకు నృత్య దర్శకుడు గోపీకృష్ణ .శివపూజకు చివురించిన సిరిసిరిమువ్వ పాటకు శీను .ఆంగికం , చేరి యశోదకు పాటలకు కె వి సత్యనారాయణ .
  • ఆకాశంలో ఆశల హరివిల్లు ఆనందాలే పూచిన పొదరిళ్ళు , కొత్తగా రెక్కలొచ్చెనా పాటలకు శేషు .
  • కొలువై ఉన్నాడే దేవదేవుడు పాటకు శ్రీమతి కె ఉమా రామారావు .
  • మరో గొప్ప శాస్త్రీయ నృత్యాన్ని తెలుగు ప్రేక్షకులకు అందించిన విశ్వ విఖ్యాత నృత్యకారిణి షెరాన్ లౌవెన్ నృత్యించిన సఖీ హే కేశ మధన ముదారం పాటకు నృత్య దర్శకులు పద్మవిభూషణ్ పురస్కార గ్రహీత కేలూ చరణ్ మహాపాత్రో . ఆయన ఓ లెజెండరీ క్లాసికల్ నాట్యాచార్యులు . ఒడిస్సీ నృత్యానికి జగత్ప్రచారకులు . షెరాన్ లౌవెన్ కు గురువు .

జయదేవుని అష్టపదుల నుంచి తీసుకోబడిన ఈ పాటను పాడింది మరో గొప్ప గాయకురాలు తృప్తీ దాస్ . ఈ ఒక్క నృత్య గీతానికి సంగీతాన్ని భువనేశ్వర మిశ్రా అందించారు . ఇంక ఈ షెరాన్ లౌవెన్ గొప్ప ఒడిస్సీ కళాకారిణి . ప్రపంచమంతా వందల ప్రదర్శలను సంస్కృతం , ఒడియా , హిందీ , తెలుగు , బెంగాలీ , మళయాళం , కాశ్మీరీ , డోగ్రా భాషల్లో ఇచ్చింది . ఇంతటి గొప్ప కళాకారులు ఈ సినిమాకు పనిచేయడం అసాధారణ విషయం . బహుశా కళాతపస్వి విశ్వనాధుడికే సాధ్యమేమో !

ఇంక నటీనటులు . మాయాబజార్ సినిమాలో ఏ పాత్ర గొప్ప అంటే ఓ పట్టాన తేల్చగలమా ! ఈ సినిమా కూడా అంతే . ఈ సినిమాకు షీరో భానుప్రియే . స్వతహాగా గొప్ప నృత్యకారిణి కావడం , పెద్ద పెద్ద కళ్ళు ఉండటం , అద్భుతమైన నటనా కౌశల్యం ఉండటం సినిమా అంతా తానే నడిపిస్తుంది . ఆమె తర్వాత నిస్సందేహంగా వెంకటేషే . ఓ ఇంటర్వ్యూలో ఆయనే చెప్పినట్లు one of the best movies acted by him . వెంకటేష్ చేత కూడా శాస్త్రీయ నృత్యపు అడుగులు వేయించారు విశ్వనాధ్ .

మరో గొప్ప పాత్ర వేదాంతం శేషేంద్ర శర్మ పాత్ర . శంకర శాస్త్రి గారు లాగా గంభీరుడు కాదు . శారీరిక , ఆర్ధిక అనారోగ్య బాధితుడు . గొప్ప విద్వాంసుడు . తాను ఆరాధించే సంగీతాన్ని , నృత్యాన్ని రెండు కళ్ళు లాగా ఇద్దరు కూతుళ్ళలో చూసుకుందామని తపించే ఓ నిస్సహాయ తండ్రి .

ఈ పాత్ర ద్వారా పేద , వృధ్ధ కళాకారులు పడుతున్న ఆర్ధిక కష్టాలను విశ్వనాధ్ కళ్ళకు కట్టినట్లు చూపారు . దేవుడు వరమిచ్చినా పూజారి వరమివ్వనన్నట్లు ఫించను అధికారి ఘనాపాటిలను అవమానించే సీను చూసాక సీట్లోనుంచి లేచి తన్ని వద్దామని అనిపిస్తుంది . ఈ సినిమాలో నన్ను ఎప్పుడూ కదిలించే సీన్ ఇది .

ఈ పాత్రను వేసిన ఘంటా కనకారావు నిజ జీవితంలో కూడా కూచిపూడి కళాకారుడే . సినిమాలో నృత్యిస్తూ చనిపోయినట్లే నిజ జీవితంలో కూడా వేదిక మీదే ప్రాణాలను కోల్పోయారట . మరో గొప్ప పాత్ర పెద్ద కూతురు సావిత్రి . దేవీ లలిత ఈ పాత్రను పోషించింది . దిగువ మధ్య తరగతి సాంప్రదాయ కుటుంబానికి ప్రతీకగా నటించింది .

వెంకటేష్ శిష్యుడు షణ్ముఖ శ్రీనివాస్ , హారతి భక్తురాలు శ్రీలక్ష్మి , ఆమె హారతుల బాధితుడు సాక్షి రంగారావు , ఇంటి ఓనర్ కె యస్ టి సాయి , అతని భార్య డబ్బింగ్ జానకి , వారి వయోలిన్ పుత్రుడు (పేరు తెలియదు . అతను నిజ జీవితంలో కూడా వయోలిన్ విద్వాంసుడే) , మిశ్రో , స్నేహితురాలుగా ముచ్చెర్ల అరుణ , పావలా శ్యామల , ఇంకా ఎంతో మంది ఔత్సాహికులు తమ తమ పాత్రలకు సంపూర్ణ న్యాయాన్ని చేసారు .

ఈ సినిమా విజయానికి ముఖ్య కారణం నృత్యాలు , పాటలు . ఇళయరాజా సంగీత దర్శకత్వంలో ఒక్కో పాట ఒక్కో ఆణిముత్యం . సిరివెన్నెల సీతారామశాస్త్రి గారిని సాహిత్య సరస్వతి ఆవహించి ఇంతటి గొప్ప పాటల్ని వ్రాయించింది . ఆయనకు ఉత్తమ గీత రచయితగా నంది పురస్కారం కూడా వచ్చింది . ఇంక ఆ పాటలకు జీవాన్ని పోసారు ఇళయరాజా , బాలసుబ్రమణ్యం , సుశీలమ్మ , జానకమ్మ , వాణీజయరాం

.
ఈ సినిమాకు నంది అవార్డుల , ఫిలింఫేర్ అవార్డుల , సినిమా ఎక్స్ప్రెస్ అవార్డుల వర్షం కురిసింది . భానుప్రియకు ఉత్తమ నటిగా , నిర్మాతలకు ఉత్తమ చిత్రంగా , విశ్వనాధుడికి ఉత్తమ దర్శకుడు ( Cinema Express) అవార్డులు వచ్చాయి . 12వ అంతర్జాతీయ ఫిలిం ఫెస్టివల్లో , ఆసియా పసిఫిక్ ఫిలిం ఫెస్టివల్లో ప్రదర్శించబడింది .

ఈ సినిమాకు ఆయువు పట్టయిన పాటలకు , నృత్యాలకు దేశంలోనే అద్భుతమైన లోకేషన్లను ఎంపిక చేసుకున్నారు . భువనేశ్వర్ నగరానికి దగ్గరలో ఉన్న ధౌలి/ధవళగిరిలో ఉన్న శాంతి స్థూపం , భృంగేశ్వర శివాలయం , కాశ్మీర్ లోని పెహల్గాం , సోనామార్గ్ , మరెన్నో పార్కుల్లో , సుందర విశాఖలో షూటింగ్ జరుపుకుంది ఈ మాస్ & క్లాస్ సినిమా .

భానుప్రియ అందమైన కళ్ళను , నృత్యాలను కమనీయంగా చూపిన లోక్ సింగుని , ప్రతీ అక్షరం తూచి తూచి వాడిన , వ్రాసిన సాయినాధుని , భానుప్రియకు అందమైన కాస్ట్యూమ్సుని అందించిన సూర్యారావుని పేరుపేరునా అభినందించాల్సిందే .

వీరందరి సమిష్టి కృషే ఈ దృశ్య శ్రవణ కావ్యం . It’s a musical , visual splendour presenting the great Indian cultural heritage . విశ్వనాధ్ గారు చెప్పినట్లు రాళ్ళల్లో కూడా రాగాలను పలికించే గొప్ప వాగ్గేయకారులు , విద్వాంసులు పుట్టిన దేశం మనది . రాతి గుండెల్ని కూడా కదిలించగల కళాడండాలను సృష్టించగల విశ్వనాధులు పుట్టిన గడ్డ మనది . ఎందరో మహానుభావులు అందరికీ వందనములు .

టివిలో ఎన్ని సార్లు వచ్చిందో ! యూట్యూబులో కూడా ఉంది . ఎన్ని సార్లయినా చూడొచ్చు .
నేను పరిచయం చేస్తున్న 1187 వ సినిమా ఇది .
#తెలుగు_సినిమాల_సింహావలోకనం #తెలుగు_సినిమాలు #సినిమా_కబుర్లు #సినిమా_స్కూల్