నా పేరు గుర్మీత్ చౌదరి… ఆరేళ్ల వయస్సున్నప్పుడు మా టీచర్ అడిగాడు… ‘‘నువ్వు జీవితంలో ఏం కావాలని అనుకుంటున్నావురా..?’’ నేను సింపుల్‌గా ‘యాక్టర్ అవుతాను సార్’’ అన్నాను… అందరూ నవ్వారు… టీచర్ కూడా జోక్‌గానే తీసుకున్నాడు… సరదాగా పిర్రల మీద ఒక్కటేశాడు… కానీ నేను సీరియస్‌గానే చెప్పాను… కాకపోతే మా కుటుంబానిది ఆర్మీ నేపథ్యం… అసలు ఫిలిమ్, టీవీ ఇండస్ట్రీలతో ఏమాత్రం లింక్ లేదు… కానీ నేను వెళ్లే తోవ అదేనని వాళ్లకూ తెలియదు అప్పుడు…
మాది నిజానికి బీహార్‌, బాగల్‌పూర్ ప్రాంతంలోని జైరాంపూర్… ఆర్మీ కుటుంబం కదా, చాలా ప్రాంతాలు తిరిగింది మా ఫ్యామిలీ… దయాల్‌పూర్‌లో ఎక్కువ కాలం ఉన్నాం.. చాలా వేసవులు గడిచిపోయాయి అక్కడే… ఆ ఊళ్లో ఒక్కటే టీవీ ఉండేది… దాని ముందు కూర్చుని ప్రోగ్రామ్స్ అన్నీ సీరియస్‌గా గమనించేవాడిని… వాటినే మళ్లీ మా కుటుంబసభ్యుల ఎదుట అనుకరిస్తూ ప్రదర్శించేవాడిని… మోహ్రా రిలీజైనప్పుడు బందన కట్టుకుని తూ చీజ్ బడీ హై మస్త్ పాటకు డాన్స్ చేస్తుంటే అందరూ బాగా చేశావురా అని చప్పట్లు కొట్టేవాళ్లు…
అందరూ చప్పట్లు కొడుతుంటే నా మనసు ఆగుతుందా ఇక… 16 ఏళ్లు వచ్చాక… నాన్నకు చెప్పాను… ‘‘నాన్నా నేను ముంబై వెళ్తాను’’… ఆయన మొదట నమ్మలేదు, తరువాత ఏమనుకున్నాడో ఏమో… క్లుప్తంగా ‘సరే’ అన్నాడు… కాసిన్ని డబ్బులతో, అనేకానేక కలలతో ముంబై చేరాను… నాలాంటోళ్లు కూడా వేలల్లో ఉంటారక్కడ… ఓ ఫిలిమ్ ఇన్‌స్టిట్యూట్‌లో చేరాను… కొన్నాళ్లకు చేతిలో డబ్బు ఖర్చయిపోయింది… జేబులు ఖాళీ… అక్కడే స్వీపర్లతోపాటు పడుకునేవాడిని…
ఓసారి నా ఫ్రెండ్ సందీప్ నన్నక్కడ చూసి, కన్నీళ్లు పెట్టుకుని, తన రూం‌లో ఉండటానికి చాన్స్ ఇచ్చాడు… ఎలాగోలా గ్రాడ్యుయేషన్ కూడా పూర్తి చేశాను కదా… ఆడిషన్స్ ఇవ్వడం మొదలు పెట్టాను… ఓరోజు 10 ఆడిషన్స్‌కు వెళ్లాను… నాలుగేళ్లు కడుపు నిండటానికి మోడలింగ్ చేశాను… చిన్న చిన్న యాడ్ ఫిలిమ్స్ చేసేవాడిని… కథ నడుస్తోంది… కానీ ఎన్నాళ్లు ఇలా..? 24 ఏళ్లకు నాకు రామాయణ్ టీవీ సీరిస్‌లో ఏకంగా రాముడి పాత్ర దొరికింది… నవ్వకండి, హీరో పాత్ర…
రామాయణ్ టీవీ సీరియల్ అంటే దూరదర్శన్‌ కోసం రామానంద సాగర్ తీసిన ఆ రామాయణం కాదు… కానీ 2008లో ఇది తీసింది మాత్రం ఆ రామానంద సాగర్ కొడుకే, పేరు ఆనంద సాగర్… 300 ఎపిసోడ్స్… ఓరోజు ముంబైకి వచ్చిన నాన్నను బైక్ మీద తీసుకెళ్లి ఓ బిల్ బోర్డు ముందు బైక్ ఆపి చూపించాను… అందులో నేను రాముడిగా ప్రధానంగా కనిపిస్తున్నాను… నాన్న గట్టిగా హత్తుకున్నాడు… తను పెద్దగా తన ఉద్వేగాల్ని ప్రదర్శించడు… అలాంటిది నన్ను హత్తుకున్నాడు అంటే తనకు నా వృత్తి జీవితం నచ్చిందనే అర్థం…
ఆ టీవీ సీరియల్‌కు మంచి ఆదరణ లభించింది… తరువాత మలయాళం, తెలుగు, తమిళ, గుజరాత్ టీవీల్లో అనువాదాలు ప్రసారమయ్యాయి… ఇక అన్నీ అలాంటి పాత్రలే వచ్చేవి… శివుడు, విష్ణువు… ఇలా… నాకేమో ఎన్నాళ్లీ పౌరాణిక పాత్రలు అని విసుగొచ్చేది… గీత్‌లో మాన్ పాత్ర దొరికేదాకా అదే ఫీలింగ్… మాన్ పాత్ర నాకు బాగా నచ్చింది… ఓరోజు ఒక కేఫ్‌లో ఉన్నప్పుడు అమ్మాయిలు చుట్టుముట్టి ఫోటోలు తీసుకున్నారు… పర్లేదు, నేను ఎంతోకొంత సక్సెస్ సాధించినట్టే కనిపిస్తున్నాను…
Share this Article