సుడిగాలి సుధీర్… ప్లే బాయ్ షో కాదు… పక్కా ఫ్యామిలీ షో… గుడ్ హోస్టింగ్…

మామూలుగా ఈటీవీలో రియాలిటీ షోలంటేనే ఓరకమైన విరక్తి వచ్చేసింది అందరికీ… జబర్దస్త్, ఎక్సట్రా జబర్దస్త్, ఢీ, శ్రీదేవి డ్రామా కంపెనీ, ఆలీతో సరదాగా, సుమ అడ్డా, పాడుతా తీయగా… ఏది తీసుకున్నా అలాగే ఉంది… సరే, ఏవేవో మార్పులు చేస్తున్నారు… ఆ ముచ్చటను పక్కన పెడితే…

ఈటీవీ తను గతంలో వదిలించుకున్న అదే సుడిగాలి సుధీర్‌ను పిలిచి, ఫ్యామిలీ స్టార్స్ అనే ఓ ప్రోగ్రాం హోస్ట్ బాధ్యతను ఇచ్చింది… గతంలో అయితే ఆ ప్లేబాయ్ ఇమేజీ ఉన్న సుధీర్ హోస్టింగ్ చేయగలడా అని ఆశ్చర్యపోయేవాళ్లేమో… కానీ ఆహాలో సర్కార్, అంతకుముందు కామెడీ స్టాక్ ఎక్స్‌చేంజ్, అంతకుముందు అదేదో టీవీలో ఏదో మ్యూజిక్ షో చేసిన అనుభవం ఉంది కదా… ఈ ఫ్యామలి స్టార్స్ హోస్టింగ్ కూడా అలవోకగా చేశాడు…

నిజానికి తెలుగు మేల్ యాంకర్లలో ప్రదీప్ టాప్… నంబర్ వన్… తన స్పాంటేనిటీ, తన జోక్స్, ఎవరినీ నొప్పించని మాటతీరు బాగుంటయ్… ప్రదీప్ తరువాత ఎవరు అనే ప్రశ్నకు జవాబు దొరికింది… సుడిగాలి సుధీర్..! నిజమే… తనకున్న ఇమేజీ ప్లేబాయ్ ఇమేజీ… ఐతేనేం, ఈరోజు టీవీ సెలబ్రిటీలతో ఓ ఫ్యామిలీ మ్యాన్‌గా కనెక్టయి, వాళ్ల వ్యక్తిగత జీవితాల్లోకి వెళ్లి మరీ షోను రక్తికట్టించాడు… ఎక్కడా తన హోస్టింగులో వీసమెత్తు తడబాటు లేదు, కొత్తదనం లేదు, లోపం లేదు…

నిజానికి ఈ షో కేరక్టర్ చాలా రొటీన్… అత్తలు, కోడళ్లు, టీమ్స్, ఏవో పిచ్చి గేమ్స్, చిట్‌చాట్, కిట్టీ పార్టీ… అచ్చంగా ఓ సుమ షో లాంటిదే ఇది కూడా…! సుమ అడ్డా ఎప్పుడైతే పక్కా సినిమాల ప్రమోషన్ల ప్రోగ్రామ్ అయిపోయిందో, మిగతావీ అలాగే అయిపోయాయో, ఇక ఈ ఫ్యామిలీ స్టార్స్ కూడా అంతేలే అనుకుని మొదట్లోనే పెదవి విరిచారు చాలామంది…

కానీ సరదాగా బాగా రన్ చేశాడు సుధీర్ దీన్ని… సెలబ్రిటీలయితేనేం… రక్తమాంసాలున్న మనుషులే కదా… వాళ్లకూ కన్నీళ్లుంటాయి, అనుభూతులుంటాయి, ఉద్వేగాలుంటాయి… వాటిని షేర్ చేసుకునే వేదిక దొరికితే బరస్ట్ అవుతారు… ఆ ఎమోషన్ కనిపించింది ఫ్యామిలీ స్టార్స్ షోలో… అలాగని కృతకంగా ఏమీ లేదు… సహజంగానే అనిపించింది, అంటే స్క్రిప్టెడ్ కాదు…

వాళ్లను అలా తమ జీవితాల్లోకి తీసుకుపోయి, తమ అనుభవాల్ని షేర్ చేసుకునేలా చేయడం అంత ఈజీ కాదు, ఆ పని సుధీర్ చేయగలిగాడు… వేరే యాంకర్లు చేయలేరా అంటే, చేయగలరు… కానీ ఈ షో కేరక్టర్‌లో అదీ ఓ భాగం… దాన్ని సుధీర్ బాగా డీల్ చేయగలిగాడు అని…

తనతోపాటు ఆషు రెడ్డి, భాను కో హోస్టులుగా కనిపించారు… గుడ్, బాగానే చేశారు… అన్నట్టు… సుధీర్, సరదాగా ఓ సూచన… ఈ షోలో కస్తూరి పాల్గొంది కదా… వచ్చే షో, లేదా ఆ వచ్చే తరువాత షోలో… చిన్మయి, కస్తూరి, సుచిత్ర (సుచీ లీక్స్), మన అనసూయ ఎట్సెట్రా కేరక్టర్లతో ప్లాన్ చేయొచ్చు కదా… నడుమ నువ్వు… ఆట భలే ఉండదూ..!! అఫ్‌కోర్స్, నీ జుట్టు కాపాడుకోవాలబ్బా..!!