ఎట్టాగో వున్నాది ఓలమ్మీ... ఏటేటో అవుతుందే చిన్నమ్మీ...

Subramanyam Dogiparthi …. ANR-వాణిశ్రీ జోడీ నట జైత్రయాత్రకు శ్రీకారం చుట్టిన సూపర్ డూపర్ బ్లాక్ బస్టర్ 1971 లో వచ్చిన ఈ దసరా బుల్లోడు . ఈ సినిమాకు యాభై ఏళ్ళ వయసు ఉందా అనిపిస్తుంది ఈరోజు చూసినా . ANR ఫస్ట్ గోల్డెన్ జూబిలీ సినిమా . యాభై వారాలు ఆడింది . ANR కెరీర్లో జనాన్ని ఒక ఊపు ఊపిన సినిమాలు మూడు . దసరా బుల్లోడు , ప్రేమ నగర్ , ప్రేమాభిషేకం . ఈ మూడు సినిమాలు నేను ఎన్ని సార్లు చూసానో ! ప్రముఖ నిర్మాత వి బి రాజేంద్రప్రసాద్ దర్శకత్వం వహించిన మొదటి సినిమా ఇది .

బావామరదళ్ళ సరసం , ఒకరినొకరు అల్లరి పెట్టడం ఆరోజుల్లో ఎక్కువగా ఉండేది . అవన్నీ ఉంటాయి ఈ సినిమాలో . ఎమోషన్స్ , డ్రామా , కధ , కధను నడిపించే తీరు , బిర్రయిన స్క్రీన్ ప్లే , ఎక్కడా రాజీ పడకుండా రిచ్ గా తీయటం , నటీనటుల నటన అన్నీ అద్భుతం . గ్రామీణ నేపధ్యంలో పులి ఆటలు , నెమలి నృత్యాలు , ANR కొత్త పంచె కట్టు వగైరా తిరణాల తిరణాలగా ఉంటాయి .

స్టెప్పులకు , డాన్సులకు పెట్టింది పేరు ANR . పక్కన వాణిశ్రీ . ఇంక చెప్పేదేముంది . ముతగ్గా చెప్పాలంటే ఇరగతీసారు . విజృంభించారు . పచ్చ గడ్డి కోసేటి పడుచు పిల్లో నీ పైట కొంగు జారిందే గడుసు పిల్లా , అరెరెరె ఎట్టాగో వున్నాది ఓలమ్మీ ఏటేటో అవుతుంది ఓలమ్మీ రెండు పాటలు ఈరోజుకీ ముసలాళ్ళ మనసుల్ని కూడా లాగేస్తాయి . చేతిలో చెయ్యేసి చెప్పు బావా పాటలో వాణిశ్రీ నటన మరచిపోలేనిది . మొదట హుషారుగా , రెండో సారి విషాదంగా , రెండు సార్లూ ఆమెకు ఆమే సాటి .

నల్లవాడే అమ్మమ్మా అల్లరి పిల్లవాడే పాటలో బావామరదళ్ళ సరసం , అల్లరి , గోము అన్నీ సమపాళ్ళలో కలిపారు . మళ్ళా వాడు నీవాడే నీవాడే అంటూ వాణిశ్రీ , చంద్రకళల పోటాపోటీ త్యాగాన్ని హృద్యంగా చూపాడు దర్శకుడు రాజేంద్రప్రసాద్ . ఓ మల్లయ్య గారి ఎల్లయ్య గారి కల్లబెల్లి బుల్లయ్యో పాటలో నాగభూషణాన్ని టీజ్ చేయటం బాగుంటుంది . వినరా సూరమ్మ వీరగాధలు వీనుల విందూగా , వెళ్ళిపోతున్నావా పాటలు కూడా బాగుంటాయి . కె వి మహదేవన్ సంగీత దర్శకత్వం సినిమాను 120 కి మీ స్పీడులో ఉరుకెత్తిస్తుంది .

ANR-వాణిశ్రీ-చంద్రకళల కాంబినేషన్ అద్భుతంగా పండింది . SVR, సూరేకాంతం కాంబినేషన్ , గుమ్మడి- అంజలీదేవి కాంబినేషన్ చాలా బాగుంటాయి . నాగభూషణం రూరల్ విలనీని కూడా బాగా చూపారు . పద్మనాభం , ఛాయాదేవి , ఝాన్సీ , రాధాకుమారి , బేబీ రాణి , మరెంతమందో నటీనటులు నటించారు . బ్లాక్ & వైట్ నుండి కలర్లోకి తెలుగు సినిమా ప్రయాణపు మొదటి రోజుల్లో వచ్చిన కలర్ సోడా ఇది . ఈ సినిమాలో మరో ఎట్రాక్షన్ ANR వాడే టాప్ లెస్ కారు . చాలా క్రేజీ కారు .

ఈ సినిమా చూడని వారు ఈ తరంలో కూడా ఉంటారని నేను అనుకోను . ఉంటేగింటే అర్జెంటుగా చూసేయండి యూట్యూబులో . వాణిశ్రీ అందమైన అల్లరి నటన మిస్సయితే ఎలా ! అలాగే ANR డాన్సులు . షడ్రసోపేత విజ్యువల్ , మ్యూజికల్ ఫీస్ట్ . ఈ సినిమా గురించి ఒక్కొక్కరు ఒక్కో ధీసిస్సే వ్రాస్తారు . #తెలుగుసినిమాలసింహావలోకనం #తెలుగుసినిమాలు

Share this Article