సరిగ్గా కుదరాలే గానీ… దీని ముందు దమ్ బిర్యానీ కూడా బలాదూర్…

.

రైలు బండి పలారం స్టోరీ చూశాక… అందులో పేర్కొన్న పబ్బియ్యం రెసిపీ ఏమిటని అడిగారు కొందరు మిత్రులు… నెట్‌లో చెక్ చేస్తే పెద్దగా కనిపించలేదు అన్నారు… అవును, ఒకటీరెండు వీడియోలు, స్టోరీలు కనిపించినా అవి మిస్‌లీడ్ చేసేవే…

1. ఇది కిచిడీ కాదు 2. బగారన్నం అసలే కాదు 3. దీనికి వెజ్ లేదా నాన్ వెజ్ కూరలు అవసరం లేదు 4. పులావ్ కాదు, బిర్యానీ అసలే కాదు 5. ఏ ఆధరువూ అవసరం లేకుండా స్ట్రెయిట్‌గా తినేయవచ్చు 6. మసాలాలు అవసరం లేదు… ఇదీ క్లారిటీ…

ఇప్పుడంటే కర్రీ పాయింట్లు, హోటళ్లు, జొమోటాలు, స్విగ్గీలు… కానీ గతంలో విద్యార్థులు, ఒంటరి పురుషులకు విడిగా కూరలు, చారులు అక్కర్లేని రెసిపీ అది… చేసుకోవడం ఈజీ… అందుకని తెలంగాణ వంటకాల్లో ఇదీ పాపులర్… ఇప్పుడూ అంతే…

ఎన్నిరకాల టిఫినీలు తిన్నా సరే, ఎంత తిన్నా సరే, కడుపు నిండినట్టుండదు… మెయిన్ కోర్స్, అంటే ఏదో ఒక బియ్యం ఐటం కడుపులో పడాల్సిందే… చివరకు కాసింత పెరుగన్నమైనా సరే… ఏమీ లేకపోతే కాస్త అన్నం, పచ్చిపులుసు అయినా సరే… అన్నిరకాల పోషక విలువలూ ఉండి, అందుబాటులోని కూరగాయలు వేసుకుని, మసాలాలు దట్టించి చేసుకునే టేస్టీ బిర్యానీలో, ఫ్రైడ్ రైసో వేరు… దానికి టైం, ఓపిక గట్రా కావాలి…

అవేవీ లేకుండా సింపుల్‌గా అందరూ చేసుకోగలిగే రైస్ ఐటమ్ ఏది..? ఆ వంట పేరు పబ్బియ్యం… దాన్నే పోనుబియ్యం, పప్పుబియ్యం, పోపుబియ్యం అనీ అంటాం… ఆధరువుగా ఏ రైతా లేకపోయినా, చివరకు ఓ ఊరగాయ ముక్క లేకపోయినా ‘రా’ సరుకే గబగబా కడుపులోకి ట్రాన్స్‌ఫర్ చేసి బ్రేవ్‌మనొచ్చు… వీలయితే కొందరు అందులోనే రెండు గుడ్లు వేసి, ఎగ్ పబ్బియ్యం చేసేస్తారు… అది వేరే కథ… సరే, ఇప్పటికీ కడుపు చేత్తో పట్టుకుని దేశదేశాలు వెళ్లినవాళ్లకు… పబ్బియ్యం బెటర్ డిష్…

మీకు యూట్యూబులో చాలా తక్కువ వీడియోలు కనిపిస్తాయి… కనిపించిన వాటిల్లో కూడా అవి వేయండి, ఇవి వేయండి, అంటూ పెండాబెల్లం కలిపేసి, మన కడుపుల మీద పగసాధిస్తాయి… సమయానికి ఇంట్లో ఏమీ లేకపోతే… బియ్యం, శెనిగె పప్పు, పచ్చి మిర్చి, ఉప్పు… నిజానికి ఇవి చాలు… ఆకలితో అలమటించే ఆత్మారాముడికి పెద్ద రిలీఫ్… ఉల్లిపాయలు, అల్లంవెల్లుల్లి, కేరట్, బీన్స్, ఆలూ ఉంటే కాస్త మేలు…

కొన్ని వీడియోల్లో కొత్తిమీర వేయండి, కరివేపాకు వేయండి, పుదీనా వేయండి, టమాటాలు కట్ చేసి వేసేయండి అని చెబుతుంటారు… దాల్చినచెక్క, లవంగాలు, ఇంగువ కూడా వేయమంటారు… అవేవీ వద్దు… అసలు పబ్బియ్యానికి అవి సూట్ కావు… లైట్ తీసుకొండి… (సర్వపిండిని కూడా నూనెలో ఫ్రై చేస్తూ ఓడప్పలు, అప్పాల్లాగా మార్చేశాయి కొన్ని సైట్లు, వీడియోలు… అది కూడా వేరే కథ…)

ఇప్పుడు కుక్కర్లు వచ్చాయి కాబట్టి పబ్బియ్యం ఇంకా ఈజీ… కాస్త నూనె వేసి (పోసి కాదు…) ఆవాలో, జిలకరో వేయండి… తరువాత సరిపడా పచ్చి మిరపకాల్ని కట్ చేసి వేయండి… కాస్త వేగాక మీకు అవసరమున్నంత బియ్యం, దానికి పది శాతం పరిమాణంలో శెనిగెపప్పు వేయండి… ఆ నూనె కాస్త బియ్యం మొత్తానికి అంటితే చాలు, పబ్బియ్యం ముద్ద గాకుండా ఉంటుంది… ఒకటికి రెండు నీళ్లు కలపండి… సరిపడా ఉప్పు కలిపి, మూడు విజిళ్లు రాగానే దింపి, ఆవిరి పోయాక, మూత ఓపెన్ చేసి, ఓసారి మొత్తం పెద్ద చెంచాతో కలిపేయండి…

ఒకవేళ సమయానికి అవకాశముంటే… నాలుగు బీన్స్ ముక్కలు, ఆలుగడ్డ ముక్కలు, ఉల్లిపాయ ముక్కలు, కేరట్ ముక్కలు వేసుకోగలిగితే…. మొదట్లోనే కాస్త అల్లం వెల్లుల్లి పేస్ట్, కాస్త పసుపు వేస్తే చాలు… రుచికి రుచి… తెలంగాణలో చాలాచోట్ల పల్లీలు కూడా వేస్తారు… అసలు పల్లీలు లేని పబ్బియ్యం ఏమిటబ్బా అంటుంటారు…

వంట కుదిరితే వేడివేడిగా గబగబా కడుపులోకి జారిపోతుంది… దీనికి ఊరగాయ అంచుకు ఉంటే చాలు… ఏరకం ఊరగాయైనా సరే, ఈ పబ్బియ్యానికి భలే దోస్త్… పబ్బియ్యం అంటే పప్పు ప్లస్ బియ్యం… అంతే… సో, జాగ్రత్త… కడుపు మీద ఎడాపెడా ప్రయోగాలు చేయకండి, అసలే రోజులు బాగాలేవు… ఈ పబ్బియ్యం చాలా సేఫ్ అండ్ ఈజీ డిష్… పొద్దున వండుకుంటే… రాత్రికీ దానికి ఓవెన్ వేడి తగిలిస్తే సరి…!!