బాబులీ… ఆనాడు చంద్రబాబు అరెస్టయినప్పుడు ఏం జరిగిందంటే…

బాసరలో భోజనానికి ఆగారు . నాకెంతో ఇష్టమైన సర్వ పిండి హోటల్స్ లో అమ్మడం బాసరలోనే తొలిసారి చూశాను . ఇప్పుడు స్వగృహ ఫుడ్స్ అమ్మే చాలా వాటిలో సర్వ పిండి అమ్ముతున్నారు, కానీ అప్పుడలా కాదు . నిజాం కాలేజీ గ్రౌండ్ లో తెలంగాణ సంబురాలు నిర్వహించి తెలంగాణ వంటకాలు అమ్మితే మొత్తం సర్వ పిండి అరగంటలో కనిపించకుండా పోయింది . అప్పుడు సర్వ పిండి తినాలి అంటే ఇంట్లోనే .. అందులోనూ అమ్మ చేసిన సర్వపిండి రుచి చూశాక …… అలాంటి పరిస్థితిలో బాసరలో సర్వపిండి అలా గుర్తుండి పోయింది …

శత్రు సైన్యానికే కాదు సొంత సైన్యానికి కూడా చివరి నిమిషం వరకు దాడి తెలియకుండా ఉండడం యుద్ధ నీతి .. అటు నుంచి వాహనాలను ఎటు తీసుకువెళ్తారో , ఏం చేస్తారో తెలియదు . అప్పటి ఆంధ్ర , మహారాష్ట్ర సరిహద్దుల్లో ధన్ బాద్ సమీపంలో పెద్ద సంఖ్య లో పోలీసులు మోహరించారు . ఆంధ్ర నుంచి వచ్చిన బాబు సైన్యాన్ని అక్కడే ఆపేశారు . అక్కడే ఉపన్యాసాలు .. చుశారా ? మీరేమో తెలంగాణ రాష్ట్రం కావాలి అని డిమాండ్ చేస్తుంటే మేం తెలంగాణ కోసం ఉద్యమం చేస్తున్నాం , అరెస్టులకు సిద్ధం అయ్యాం , ఇక నైనా మారండి అన్నట్టుగా పయ్యావ్యుల కేశవ్ తెలంగాణ కోరుకునే నాలాంటి వారికీ హితబోధ చేశారు . ఇదేమన్నా ఒక రాజ్యం ఇంకో రాజ్యం పై దాడి చేయడమా ? ఇలా చేస్తే తెలంగాణకు ఏం లాభం అంటే .. అరెస్టులకు సిద్దమైన ఆంధ్ర నాయకుల త్యాగాలు నీకు అర్థం కావు అని విమర్శ …

సరిహద్దుల్లో కొంత సమయం రాజకీయ ఉపన్యాసాలు , చప్పగా ఉన్నట్టు అనిపించింది . లాఠీ చార్జీలు , తోపులాట అయితే తప్ప సరైన కవరేజ్ దక్కదు . మహారాష్ట్ర పోలీసులేమో మీ భూభాగంలో మీరు ఏమైనా చేసుకోండి అని నిమ్మకు నీరెత్తినట్టు ఉండి పోయారు . దాంతో బాబు బృందానికి సహనం నశించి, సరిహద్దు దాటి, మహారాష్ట్రలో అడుగుపెట్టి, బాబ్లీ వెళ్లాలని ప్రయత్నిస్తే సాయంత్రం తరువాత ఈ బృందాన్ని అరెస్ట్ చేసినట్టు చూపించి ధన్ బాద్ లోని ఒక విద్యా సంస్థలో ఉంచారు .

ఉప ఎన్నికల్లో ఎక్కడా గెలవరు , గెలుపు మాట దేవుడెరుగు, డిపాజిట్ కూడా దక్కదు . ఉప ఎన్నికలు వెనక్కి వెళ్లి తమ బాబ్లీ ఉద్యమం ముందుకు రావాలి అనే రాజకీయం అని తెలుస్తూనే ఉంది . అక్కడినుండి చేసేదేమి లేదని ఆఫీస్ కు ఫోన్ చేసి అనుమతి తీసుకొని హైదరాబాద్ వచ్చేశాను .

**********

ఉదయం రోడ్డు మీద చూడగానే జైలు గోడల మధ్య, ఇనుప చువ్వల వెనుక బాబు ఉన్నట్టు భారీ పోస్టర్లతో నగరాన్ని నింపేశారు . ధన్ బాద్ లోని ఐటిఐలో అందరినీ ఒకేచోట ఫ్రీగానే వదిలేశారు . ఈ జైలు గోడలు , ఇనుప చువ్వల వెనుక బాబు ఎలా వచ్చారో అర్థం కాలేదు . అది సరే, అరెస్ట్ తో అప్పుడు సానుభూతి వచ్చిందా ? అంటే… ఉప ఎన్నికలను మరిచిపోయేట్టుగా మీడియా బాబు బాబ్లీ ఉద్యమానికే ప్రాధాన్యత ఇచ్చి కవరేజ్ తో అదరగొట్టినా .. ఉప ఎన్నికల్లో తెలంగాణ ప్రజలు తెలంగాణకే ప్రాధాన్యత ఇచ్చారు విజయం చేకూర్చారు . బాబు బాబ్లీ నాటకం మీడియా ప్రచారానికే పరిమితం అయింది . డిపాజిట్లు కూడా దక్కలేదు …… – బుద్దా మురళి