జయసుధ తనను తాను కేరెక్టర్ ఏక్టరుగా చెక్కుకుంటున్న క్రమంలో వచ్చిన సినిమా . అన్నపూర్ణ బేనరుపై 1977 లో వచ్చిన ఈ ప్రేమలేఖలు సినిమా రాఘవేంద్రరావుకు కూడా మంచి పేరుని తీసుకుని వచ్చింది . యద్దనపూడి సులోచనారాణి నవల ఆధారంగా తీసారు . బ్లాక్ అండ్ వైట్ సినిమా అయినా కమర్షియల్ గా కూడా సక్సెస్ అయింది .
ఈ సినిమాలో మ్యూజికల్ సిగరెట్ లైటర్ని తన లవరుకు ప్రెజెంట్ చేస్తుంది హీరోయిన్ . అలాంటి లైటర్ కొనుక్కోవాలని భలే కోరిక ఉండేది . మద్రాసు , బెంగుళూరు వెళ్ళినప్పుడల్లా వెతికేవాడిని . ఎక్కడా దొరకలేదు . చివరకు 1988 లో అమెరికా వెళ్ళినప్పుడు అక్కడ కూడా వెతికా . అక్కడా దొరకలేదు . చివరకు Service Merchandise మాల్లో సిగరెట్ కేస్ కం లైటర్ కొనుక్కొని తృప్తి పడ్డా . ఇదీ నా సిగరెట్ లైటర్ – ప్రేమలేఖలు సినిమా అనుబంధం .
జయసుధ , అనంత నాగ్ , మురళీమోహన్ , దీప , జగ్గయ్య , సత్యనారాయణ , గిరిబాబు , శుభ , పుష్పలత , అల్లు రామలింగయ్య ప్రభృతులు నటించారు . కన్నడం నుండలా అనంత నాగ్ ని ఎందుకు తెచ్చుకొన్నారో నాకు అర్ధం కాదు .
Ads
సత్యం సంగీత దర్శకత్వంలో పాటలు బాగుంటాయి . సుశీలమ్మ , బాలసుబ్రమణ్యం , రామకృష్ణ , వాణీ జయరాంలు పాడారు . ఆరుద్ర వ్రాసిన ఇది తీయని వెన్నెల రేయి మది వెన్నెల కన్నా హాయి , శ్రీశ్రీ వ్రాసిన ఈరోజు మంచి రోజు మరువరానిది మధురమైనది పాటలు చాలా బాగుంటాయి . బాగా హిట్టయ్యాయి కూడా . మిగిలిన ఈ అందం ఈ పరువం , విన్నానులే పొంచి ఉన్నానులే , ఆ కాలపు బొమ్మను కాను ఈ కాలపు పిల్లను నేను పాటలు కూడా శ్రావ్యంగా ఉంటాయి .
45 ఏళ్ల కింద వచ్చిన ఈ సినిమా కుర్రాళ్ళకు , ఆడవాళ్ళకు బాగా నచ్చింది . సినిమా యూట్యూబులో ఉంది . జయసుధ అభిమానులు చూడవచ్చు . పాటల వీడియోలు కూడా ఉన్నాయి …. (దోగిపర్తి సుబ్రహ్మణ్యం)
Share this Article