ఆ సమైక్య ఎడిటర్ ఇంట్లో పెళ్లా..? పిచ్చ లైట్ తీసుకున్న సీఎం కేసీయార్…

**********

హమ్మయ్య గండం గడిచింది . ఎడిటర్ తో ఒకరోజు ఎలాంటి ప్రమాదం లేకుండా గడిచింది అని బయటకు వచ్చాక … రమణాచారి ఇక్కడే ఉన్నారు కదా ఫోన్ చెయ్ వెళదాం అని ఎడిటర్ అన్నారు… ఫోన్ చేసి, బుద్దా మురళి అని చెప్పాను. అప్పుడు ఆంధ్రభూమి ఆదివారంలో వారం వారం రాస్తున్న ధనం – మూలంలో ఎక్కెడెక్కడి వారి గురించో భలే రాస్తున్నావు అని మాట్లాడుతున్నారు ఆయన .. ఇక నా పని ఐపోయింది అనుకున్నాను . ఎడిటర్ తో పాటు వెళ్లి రమణాచారి ఛాంబర్ లో కూర్చున్నాక ధనం – మూలం కాలం గురించే అలానే మాట్లాడారు . ప్రమాదం తప్పదు అని నిర్ణయించుకున్నాను .

********

ఉదయం నుంచి సాయంత్రం వరకు తినక పోవడం ఒకటి . సంతోషాన్ని పంచుకోవడం ఒకటి. దారిలో సికింద్రాబద్ తాజ్ మహల్ హోటల్ లో తిన్నాం . సంతోషానికి కారణం ఏమంటే ఎడిటర్ తో సీఎంను కలిసినప్పుడు నాకూ , మిత్రుడు చంద్రశేఖర్ కు ఎక్కువ గౌరవం ఇచ్చి ఉంటే, తెల్లారి నుంచి ఎడిటర్ పైరవీ పనులు , అయన రాసిన పుస్తకాలు అమ్మించే పనులు అప్పగిస్తారని భయపడ్డాం .. సీఎం పెద్దగా ప్రాధాన్యత ఇవ్వకపోవడం , మూడు గంటలు వేచి ఉండాల్సి రావడంతో ఎడిటర్ మాపై ఆశలు వదులుకొని ఆంధ్రపై దృష్టి సారించాడు .

****

సికింద్రాబాద్ తాజ్ మహల్ హోటల్ కు మరో ఇద్దరు జర్నలిస్టులతో కలిసి వచ్చేసరికి, హోటల్ కౌంటర్ దగ్గర ఓ వ్యక్తి హోటల్ యజమానితో కెసిఆర్ ను నడిపించేది నేను , ఇప్పుడు ఇక్కడికి పిలిపించమంటావా ?అని ఏదో మాట్లాడుతున్నాడు . ఇప్పుడు రెన్నొవేషన్ చేశారు . అంతకు ముందు సికింద్రాబాద్ పాత తరానికి చెందిన వారు అక్కడ కబుర్లు చెప్పుకొంటూ ఉండేవారు .

బీడీ కట్టలకు కూడా ఇతరులపై ఆధారపడే వ్యక్తిలా ఉన్నాడు . మహా ఐతే హోటల్ యజమాని అతనికి ఓ ప్లేట్ ఇడ్లీ ఉచితంగా ఇస్తాడేమో , తెలంగాణ ఉద్యమాన్ని తానే నడిపినట్టు , కెసిఆర్ ను తానే నడుపుతున్నట్టు తెగ కబుర్లు చెబుతున్నాడు . ఎడిటర్ తో కలిసి వెళ్లి మూడు గంటలు నిలబడి, కష్టంగా కలిసిన మేం ఆ మాటలు వింటూ నవ్వుకున్నాం . అప్పుడు ఎవరైనా యూట్యూబ్ ఛానల్ వాళ్ళు ఉంటే అతన్ని ఇంటర్వ్యూ తీసుకునేవాళ్ళు . ఇప్పుడు ఇలాంటి వారి ఇంటర్వ్యూలు యూట్యూబ్ లో చాలా కనిపిస్తున్నాయి .

*****

ఆ రోజు ప్రమాదం ఏమీ ముంచుకు రాలేదు . మూడు నాలుగు రోజులు గడిచిన తరువాత ఎడిటర్ పిలిచి ధనం – మూలం కాలం చాలా రోజుల నుంచి రాస్తున్నావు కదా ? ఇక చాలు ఆపేయ్ అన్నారు . ఈ సంగతి నేను ఆ రోజే అనుకున్నాను అని మనసులోనే చెప్పుకున్నాను . అబ్దుల్ అని సినిమా రిపోర్టర్ సినిమా సమీక్షకు నంది అవార్డు వచ్చింది . జాగ్రత్త అని ముందే చెప్పాను . ఉత్సాహంగా ఎడిటర్ కు యెగిరి గంతేసి చెప్పాడు . ఆ మరుసటి రోజు నుంచి సినిమా రిపోర్టింగ్ నుంచి తొలగించి ఆదిలాబాద్ మఫిసిల్ డెస్క్ లో చేయమని చెప్పారు అట్లుంటుంది ఎడిటర్స్ తో … – బుద్దామురళి