స్త్రీ వాదపు రొడ్డ ప్రవచనలు కావు… ఆమె వేదన అనుదిన నిర్వచనాలు…

స్త్రీ పాత్రలన్నీ గొప్పగా ఉండే సినిమాలు చాలా తక్కువ. లాపతా లేడీస్ ఆ తక్కువలో ఒకటి. అమీర్ ఖాన్ నిర్మాత కిరణ్ రావ్ దర్శకురాలు కనుక కొంచెమైనా బాగుండకపోదులే అని చూసా... నా అంచనాలను మించింది.

మెట్టినింటికి భర్తతో కలిసి వెళుతూ చిన్న గందరగోళం వల్ల తప్పుడు గమ్యాలు చేరిన ఇద్దరు కొత్తపెళ్ళికూతుర్ల కథ... నటులందరూ దాదాపుగా కొత్తవాళ్ళే అయినా చాలా ముదిరిన పాతవాళ్ళలాగే నమ్మించారు. వీళ్ళ మధ్యలో పోలీస్ గా రవికిషన్ విలనేమో అనిపిస్తూ హృదయాలు కొట్టేస్తాడు. ఇంతకంటే కథ స్పాయిలర్ చెయ్యలేను.

కథదేముందిలేగానీ సంభాషణలు అద్భుతం. నెక్స్ట్ లెవెల్. విప్లవ్ ఘోష్ అనుకుంటా స్త్రీ పాత్రలు పలికే ప్రతి మాట గుండె లోతుల్లోంచి పలికించాడు. స్త్రీ వాదపు రొడ్డ ప్రవచనల్లా కాక ఆమె వేదన అనుదిన నిర్వచనాల్లా వాక్యాలను చెక్కాడు.

కథ మరీ నాటకీయంగా ఉందనిపించొచ్చు. వేగం కొంచెం మెల్లిగా ఉందనిపించొచ్చు. అక్కడక్కడా లాజిక్ మిస్సయిందనిపించొచ్చు. నాకైతే ఇవేవీ అనిపించలేదు కానీ సూచన చేసేపుడు కొంచెం ఒళ్ళు దగ్గర పెట్టుకోవాలి కనుక ఇవన్నీ  చెపుతున్నా.. ఏమనిపించినా అనిపించకపోయినా సంభాషణలు జాగ్రత్తగా వినండి. మనసు పెట్టి వినండి.

 ఆడపాత్రలు మాట్లాడే ప్రతి మాట సినిమా మీద గౌరవాన్ని పెంచుతుంది. అయినా నచ్చలేదనుకోండి నన్ను తిట్టుకోండి. మీకు హిందీ రాకపోతే నేనేం చెయ్యలేను మరి. కొన్ని అవార్డులు తప్పకుండా ఖతార్ మె హై. అస్సలు మిస్సవద్దు. నెట్ ఫ్లిక్స్ లో ఉంది...