నక్సలైట్ల సురక్షిత స్థావరానికి నాడు ఇందిరమ్మ కట్టించిన నిచ్చెన..!

.

John Kora ……… కర్రెగుట్టల నిచ్చెన.. ఇందిరమ్మ నిచ్చెన

రెండు, మూడు వారాల కిందట ‘జర్నలిస్ట్ పేజ్’ అనే యూట్యూబ్ ఛానల్ నిర్వహించే విలేఖరి కర్రెగట్టలు ఎక్కాడు. అక్కడి ఒక స్థానిక వ్యక్తి అతడిని గుట్టలపైకి తీసుకెళ్లాడు. పేరుకు గుట్టలే అయినా.. నిటారుగా ఎంతో ఎత్తున్న కొండల సమూహం అది.

అందులో నిటారుగా ఉన్న ఒక గుట్టపై ఒకప్పుడు నాలుగైదు గ్రామాలు ఉండేవట. ఒడిషా వైపు నుంచి వచ్చిన గొత్తికోయలు ఆ గ్రామాల్లో నివసిస్తూ బుట్టలు నేయడం, అడవిలో దొరికే మూలికలు, ఇతర పండ్లు.. సేకరించి.. వారానికి ఒకసారి వాటన్నింటినీ మోసుకొని కొండ దిగి.. సంతల్లో అమ్ముకొని.. మళ్లీ వాళ్లకు కావల్సిన సరుకులు కొనుక్కొని తిరిగి కొండ ఎక్కి వాళ్లు తమ గూడేలకు పోయేవారట.

అయితే ఇలా కొండ ఎక్కి దిగడం వాళ్లకు చాలా కష్టమయ్యేదట.. కిందకు వచ్చి మైదాన ప్రాంతాల్లో ఉండమని అడిగినా.. వాళ్లు మాత్రం ఒప్పుకునే వాళ్లు కాదట. అయితే వీళ్ల కష్టాన్ని తెలుసుకున్న అప్పటి ప్రధాని ఈ పెద్ద ఇనుప నిచ్చెనను ఏర్పాటు చేశారని ఆ స్థానికుడు చెప్పాడు.

• “ఇందిరా గాంధీ” ఈ నిచ్చెన కట్టించిందని ఆ జర్నలిస్టు వీడియోలో చెప్తుంటే.. ‘ఇందిరమ్మ’ అని ఆ స్థానికుడు అనడం నన్ను ఆకర్షించింది. దాదాపు నాలుగు దశాబ్దాలుగా ఆ నిచ్చెన చెక్కుచెదరకుండా ఉంది.

ఇక ఎన్టీఆర్ సీఎం అయ్యాక మరోసారి ఆ కొండ మీది ప్రజలను కిందకు తీసుకొని రావాలని ప్రయత్నించినా.. కొంత మందే వచ్చారట. ఈ ఆదివాసీలకు వెంకటాపురం చుట్టుపక్కల భూములు ఇచ్చినా.. ప్రస్తుతం అవన్నీ గిరిజనేతరుల చేతికి వెళ్లిపోయాయని ఆ స్థానికుడు చెప్పాడు.

ఆదివాసీల భూములను వారి అమాయత్వాన్ని అడ్డుగా పెట్టుకొని ఎంతో మంది దోచేశారు. ఇక ఇటీవల కాలం వరకు ఈ గుట్టలపైనే మావోయిస్టులు ఉన్నారు. ఈ గుట్టలపై ఏం జరుగుతుందో డ్రోన్లు, శాటిలైట్ల ద్వారా తెలుసుకున్నారు తప్ప ఎవరూ ఎక్కే సాహసం చేయలేదు.

సరే.. ఇప్పుడు ఆ ప్రాంతం మావోయిస్టుల నుంచి దూరం చేయబడింది. ఆ కొండపై నుంచి ఆదివాసీలు కూడా వెళ్లిపోయారు. నాలుగైదు కుటుంబాలు మాత్రం కొండపై పశువులను మేపుతూ జీవిస్తున్నారు.

కొంత మంది అప్పుడప్పుడు పైకి ఎక్కి వెదురు బొంగులను కొట్టి కిందకు తీసుకొస్తున్నారు. ఆ కొండపై నుంచి చూస్తే మాత్రం సెలయేర్లు, పచ్చదనం అద్భుతం. మొత్తానికి ఆ గుట్టలను చూపించిన జర్నలిస్టుకు అభినందనలు…..,. #భాయ్‌జాన్

.

ఉపసంహారం... జనవరి 1న మొత్తం లొంగిపోతాం, కాల్పులు విరమించండి అని అభ్యర్థించిన ఎంసీసీ కమిటీ అనంత్ సహా 15 మంది ఆయుధాలతో సహా నిన్న లొంగిపోయారు... ఇక రిట్రీట్ ఆగదు... అర్బన్ నక్సల్స్ ఎంత ఏడ్చినా సరే..!!