Subramanyam Dogiparthi …… ఈ సినిమా అనగానే గుర్తుకొచ్చే పాట సినారె వ్రాసిన ఎన్నాళ్ళో వేచిన ఉదయం, ఈనాడే ఎదురవుతుంటే, ఇన్ని నాళ్ళు దాచిన హృదయం, ఎగిసి ఎగిసి పడుతుంటే, ఇంకా తెలవారదేమి పాట . ఘంటసాల , బాల సుబ్రమణ్యం పాడిన పాట . బాగానే ఆడింది . 1967 లో AVM వారు పందియము అనే టైటిల్ తో నిర్మించిన సినిమాకు రీమేక్ మన తెలుగు సినిమా . తమిళంలో జెమినీ , A.M.రాజన్ , వెన్నిరాడై నిర్మల నటించారు .
తర్వాత హిందీలో కూడా సచ్చాయి అనే టైటిల్ తో , షమ్మీకపూర్ , సంజీవ్ కుమార్ , సాధన నటించారు . మళయాళంలో ఇన్యం కానాం అనే టైటిల్ తో ప్రేం నజీర్ , విన్సెంటులతో నిర్మించారు . ఇద్దరు మిత్రులు సైధ్ధాంతిక అభిప్రాయ బేధాలతో విడిపోయి , అయిదేళ్ళ తర్వాత తమ జీవన గతులను సమీక్షించుకుందామని సవాళ్లు విసురుకుంటారు .
ఒక మిత్రుడు గజదొంగ , మరొక మిత్రుడు పోలీసు ఆఫీసర్ అవుతారు . కధాంతంలో గజదొంగ గంగారాం మరణిస్తాడు . తాతినేని రామారావు దర్శకత్వంలో వచ్చిన ఈ సినిమా బాగుంటుంది .
గజదొంగ గంగారాంగా కృష్ణ , మంచి బాలుడు పోలీసుగా శోభన్ బాబు నటించారు . విశేషం ఏమిటంటే విజయనిర్మల కృష్ణ చెల్లెలుగా నటించటం . ఈ సినిమా తర్వాత వాళ్ళిద్దరు అన్నాచెల్లెళ్ళుగా ఏ సినిమాలోనూ నటించలేదు . ఈ 1969 లోనే వాళ్ళు పెళ్లి చేసుకున్నారు . వీరితోపాటు గీతాంజలి , చలం , జగ్గారావు , త్యాగరాజు , ప్రభృతులు నటించారు .
యస్ పి కోదండపాణి సంగీత దర్శకత్వంలో మిగిలిన పాటలు కూడా శ్రావ్యంగానే ఉంటాయి . అయితే బయట పాపులర్ కాలేదు . ఓరచూపులు చూడకముందే ఒళ్ళు ఎందుకే ఝల్లుమనే , అరె నిషా నిషా మజా మజా నీకు కావాలా క్లబ్బు పాట , ఎంతో ఉన్నది అంతు తెలియనిది పాటలు బాగుంటాయి . వాలీ బాల్ ఆడుతూ విజయనిర్మల తన స్నేహితురాళ్ళతో పాడే పాట నాలుగు వైపులు గిరి గీసి ఆపై సన్నని తెర వేసి ఎదురు ఎదురుగా అనే పాట వెరైటీగా ఉంటుంది .
ఈ సినిమాకు మా నరసరావుపేటకూ ఓ లింక్ ఉంది . మా ఊరి సత్యనారాయణ టాకీసులో ఫస్ట్ రిలీజ్ . అలా 1960s చివర నుండి కాస్త కాస్త ఫస్ట్ రిలీజులు మొదలయ్యాయి . మేము సైకిళ్ళు వేసుకుని చిలకలూరిపేట , రైళ్ళల్లో బస్సుల్లో గుంటూరుకు పోవటం , రావటం తప్పింది . ఈ సినిమా చాలాసార్లు టివిలో కూడా వచ్చింది . యూట్యూబులో ఉంది . చూడబులే . ముఖ్యంగా కృష్ణ అభిమానులు చూసి ఉండకపోతే , తప్పక చూడండి .
Share this Article
Ads