.
Subramanyam Dogiparthi …. చిరంజీవి తండ్రి వెంకటరావు గారు కూడా నటించిన సినిమా ఈ మంత్రి గారి వియ్యంకుడు . అదీ మంత్రి గారి పాత్రలోనే . అయితే తండ్రీకొడుకులకు కలిసిన సీనేదీ లేదు . అల్లు రామలింగయ్యకు వెంకటరావు గారికి మాత్రమే ఉంటుంది ఆ సీన్ . విశేషం ఏమిటంటే నిజ జీవితంలోనూ వీరిద్దరూ వియ్యంకులు కావడం .
చిరంజీవి జైత్రయాత్రలో మరో మైలురాయి 1983 నవంబరులో వచ్చిన ఈ క్లాసిక్ మసాలా సినిమా . బాపుతో చిరంజీవికి ఇది రెండో సినిమా . ఆయన నటించిన 63 వ సినిమా . మళయాళంలో సక్సెస్ అయిన ఓ సినిమా రైట్స్ నలభై వేల రూపాయలకు కొని 22 లక్షల బడ్జెటుతో నలభై రోజుల్లో తీసారు .
Ads
తరచూ ఏదో ఒక చానల్లో వస్తూనే ఉండే ఈ బాపు- రమణల మార్క్ క్లాస్ మసాలా ఫస్ట్ రిలీజులో ఖైదీ సినిమా బాధిత.. . ఖైదీ విడుదలయిన వారం రోజులకే రావడం వలన వంద రోజులు ఆడలేకపోయింది . ఆరు కేంద్రాలలో యాభై రోజులు ఆడింది . డబ్బులు బాగానే వచ్చాయట .
ఒక సినిమా విజయానికి డబ్బులు కొలబద్ద అయినా ప్రేక్షకుల మనసుల్లో ఎలాంటి స్థానం పొందింది అనేదీ ముఖ్యమే . ఈరోజుకీ ప్రేక్షకులను అలరించే సినిమా ఇది . హీరోయిన్ మైనస్ పాయింటేమో అని అనిపిస్తుంది . తమిళ, మలయాళాల్లో పెద్ద హీరోయిన్ పూర్ణిమ భాగ్యరాజ్ . (భాగ్యరాజా భార్య)…
ఆమె నిర్మాత చాయిస్ అంటారు . తెలుగులో హీరోయినుగా ఆమె ఈ ఒక్క సినిమాలోనే నటించింది . (ఒకటీరెండు డబ్బింగ్ మూవీస్ తెలుగులో వచ్చినట్టున్నయ్)… ఈమధ్య 2019 లో తల్లి పాత్రలో నిను వీడని నీడను నేనే సినిమాలో నటించింది . Of course . హీరోయిన్ ఎవరయినా ఖైదీ దెబ్బకు నిలబడటం కొంచెం కష్టమే అనుకోండి .
చిరంజీవి ఉన్నాడు కాబట్టి ఆయన్నే హీరో అనక తప్పదు . వాస్తవానికి ఈ సినిమాలో హీరో అల్లు రామలింగయ్యే . అల్లు తల్లి లేని పిల్లలతో రావి కొండలరావు- నిర్మలమ్మల దగ్గర పనిచేస్తూ ఉంటాడు . కాలక్రమంలో అదృష్టం కలిసొచ్చి డబ్బు చేస్తుంది .
డబ్బుతో పాటు అహం , పటాటోపం , వగైరాలు వస్తాయి . ఇంట్లో ఓ సర్కిల్ , ఓ లాయరూ అల్లుళ్ళుగా ఉంటారు . పెళ్ళి కాని డాక్టర్ కొడుకు శుభలేఖ సుధాకర్ నర్సమ్మ తులసిని ప్రేమిస్తాడు .
కూతురు పూర్ణిమను కాలేజీలో కొబ్బరి పదార్ధాలతో టీజ్ చేసే హీరో చిరంజీవితో ఫైటింగులు చేసీ చేసీ అలిసి లవ్వులో పడిపోతుంది . అల్లు కూతురు కొడుకు రావి కొండలరావు- నిర్మలమ్మల కొడుకు కూతుళ్ళను ప్రేమిస్తారు . సంబంధం మాట్లాడుకోవటానికి రమ్మని అవమానిస్తాడు అల్లు .
అన్నపూర్ణమ్మ పాత్రలో నిర్మలమ్మకు , కుటుంబ సభ్యులకు తిక్క రేగుతుంది . ఇంతలో ఎన్నికలు వస్తాయి . నిర్మలమ్మ MLA గా గెలిచి క్లైమాక్సులో ధనామని మంత్రి అయిపోతుంది . అల్లు మంత్రి గారి వియ్యంకుడు అయిపోయి తన జీవిత కాల కోరికయిన మంత్రి గారి వియ్యంకుడు కోరికను తీర్చుకుంటాడు .
చిరంజీవి కాలేజి కుర్రోడిగా చాలా హుషారుగా , చలాకీగా , అల్లరిగా , రొమాంటిగ్గా బాగా నటించాడు . ఈ సినిమాలో ప్రధానంగా మెచ్చుకోవలసింది అల్లు రామలింగయ్య , నిర్మలమ్మలనే . పోటాపోటీగా నటించారు . సత్యనారాయణ రాజకీయ విలనాసురుడిగా బాగా నటించాడు .
స్క్రీన్ ప్లేని బిర్రుగా తయారు చేసుకున్న ముళ్ళపూడి ప్రతీ పాత్రకు ప్రాధాన్యతను కల్పించారు . రాళ్ళపల్లి , నూతన్ ప్రసాద్ , రావి కొండలరావు , తులసి , శ్రీలక్ష్మి ఇతర ప్రధాన పాత్రల్లో కనిపిస్తారు . సినిమాలో క్లైమాక్స్ సీన్ చాలా ఆర్ద్రంగా , ఇంటెన్సివుగా ఉంటుంది . అల్లు రామలింగయ్య , నిర్మలమ్మలు తినేసారు .
ఇళయరాజా సంగీత దర్శకత్వంలో వేటూరి వారి పాటలన్నీ శ్రావ్యంగా ఉంటాయి . టీజింగ్ పాటలు , డ్యూయెట్లు కుర్రకారుకు బాగా నచ్చాయి . ఛీ ఛీ పో పాపా ఒప్పుల కుప్పా , ఏమని నీ చెలి పాడెదనూ , సలసలా నను కవ్వించనేల , కోకోనట్ మనకు దోస్తీ , మనసా శిరసా నీ నామమే పాడెద ఈ వేళ పాటలు బాగుంటాయి .
అమ్మ కాదె బుజ్జి కాదె నాపై కోపమా దానికదే దీనికదే అంటే నేరమా అంటూ చిరంజీవిని పూర్ణిమ టీజ్ చేసే పాట చాలా బాగుంటుంది . చిరంజీవి బుంగ మూతితో అందంగా కనిపిస్తాడు . ఎలక్షన్ల సమయంలో కొలువైనాడే ఊరికి కొలువైనాడే మా కొబ్బరికాయల సుబ్బారాయుడు పాట కాలేజి కుర్రాళ్ళతో హుషారుగా ఉంటుంది .
ఎక్కడా బోరించకుండా సాగే ఈ సినిమా చిరంజీవికి మంచి పేరే తీసుకొని వచ్చింది . యూట్యూబులో ఉంది . చిరంజీవి అభిమానులు కానివారు కూడా చూడతగ్గ సినిమా . A feel good , romantic , classic , masala movie .
#తెలుగుసినిమాలసింహావలోకనం #తెలుగుసినిమాలు #సినిమాకబుర్లు
Share this Article