ఎన్టీవోడు ఎగరాలె, చక్రవర్తి కొట్టాలె, వేటూరి రాయాలె, బాలు పాడాలె... అదీ లెక్క..!

….. By…… Bharadwaja Rangavajhala………… పాటసారి… వేటూరి

కృష్ణాజిల్లా, పెదకళ్ళేపల్లి గ్రామంలో వేటూరి ప్రభాకరశాస్త్రుల తమ్ముడి కొడుకుగా 1936 జనవరి 29 వ తేదీన జన్మించిన వేటూరి సుందరరామ మూర్తి తెలుగు సినీ పాటలతోటలోకి విచిత్రంగా ప్రవేశించాడు.

తోటమాలిగా మారతాడని… అందమైన, అద్భుతమైన పాటల సేద్యం చేస్తాడని ఆనాడు ఎవరూ ఊహించి ఉండరు.

ఆయ‌నే ఓ పాట రాశారు … పాట‌ల తోట‌లో ఆమ‌ని పూట‌లో ఎక్క‌డికి వెడ‌తావూ ఏదీ కాని వేళ‌లో .. వ‌చ్చిపో మా ఇంటికీ ఉండిపో ఈ పూట‌కీ … అని

ఈ పాట వేటూరబ్బాయిని త‌ల్చుకుని చాలా మంది పాడుకుంటారు …

ఉండిపో ఈ పూట‌కీ అని …

నువ్వు సినిమాల్లోకి రా పాటలు రాయి అని ఎన్టీఆర్ కోరి మరీ ఇండస్ట్రీకి ఆహ్వానించారాయన్ను.

అయితే ఎంట్రీ మాత్రం విశ్వనాథ్ చిత్రం ద్వారా జరిగింది. నలభై మూడేళ్ల క్రితం విడుదలైన ఓ సీత కథ లో హరికథ తో ఆయన తెరప్రయాణం ప్రారంభమైంది.

విశ్వనాథ సత్యనారాయణ దగ్గర సాహిత్య శిష్యరికం… త‌ర్వాత ఆంధ్రప్రభ, ఆంధ్రపత్రికలలో జర్నలిస్ట్ గా జీవించిన‌ వేటూరికి కె.విశ్వనాథ్ గారి దర్శకత్వంలో వచ్చిన ”ఓ సీత కథ” చిత్రంలో హరికథ రాసే అవకాశం వచ్చింది.

అయితే సినీ గేయ రచయితగా తెలుగు ప్రేక్షకుల మనసుల్లో స్థిర నివాసం ఏర్పరచుకున్నది మాత్రం అడవి రాముడుతోనే.

మహదేవన్ స్వరసారధ్యంలో కోటిరూపాయల పాటగా ఇండస్ట్రీ పిలుచుకున్న ఆరేసుకోబోయి పారేసుకున్నానుతో ఆయన కమర్షియల్ రైటర్ గా జండా ఎగరేశారు.

మాస్ ఆడియన్స్ మనసులు దోచేసుకున్న పాట .. ఆరేసుకోబోయి పారేసుకున్నా ను ఆ రోజుల్లో కోటిరూపాయల పాటగా పిల్చేవారు.

ఆ తర్వాత మాస్ సాంగ్స్ అంటే…వేటూరి రాయాలి. చక్రవర్తి ట్యూన్ చేయాలి…సలీం స్టెప్పులేయించాలి…ఇదీ వరస…ఓ పదిహేనేళ్లపాటు ఈ ముగ్గురూ దుమ్ముదులిపేశారు.

ఆకుచాటు పిందె తడిసె, బంగినపల్లి మామిడి పండు రంగు మీదుంది… లాంటి అనేక సూపర్ డూపర్ హిట్ సాంగ్స్ ఈ కాంబినేషన్ లో వచ్చాయి.

అవావాస్యచంద్రుడు లో సుందరమో..సుమధురమో…పాటతో ఇళయరాజా వేటూరి కాంబినేషన్ మొదలైంది. నిజానికి ఆత్రేయను ఎక్స్ పెక్ట్ చేసిన ఇళయరాజాకు వేటూరిని చూడగానే నీరసం వచ్చిందట.

అయితే వేటూరి చెప్పిన సుందరమో సుమధురమో కవిత్వం విని మోకరిల్లాడట. అప్పట్నించీ మళ్లి మళ్ళి ఇది రానిరోజు లాంటి మెలోడీలూ….ఎప్పటికప్పుడు గుప్పెడు ముద్దుల చప్పుడు బుగ్గల్లో…లాంటి మాస్ మసాలాలూ…అబ్బనీ కమ్మనీ దెబ్బ లాంటి క్లాసిక్ మాస్ సాంగ్సు ఇలా బోల్డు వెరైటీలుగా ఈ కాంబినేషన్ వర్ధిల్లింది.

పాట క్లాసా మాసా అనేది కాదు. కథేంటి..సందర్భమేమిటి? ఇదే క్రైటీరియా. ఆ సన్నివేశంలో పాట పెట్టడం ద్వారా దర్శకుడు ఏం చెప్పాలనుకుంటున్నాడు అనే మూడ్ ని బట్టి వేటూరి రచన సాగేది.

మ్యూజిక్ డైరక్టర్ కు ఏ రాగంలో ట్యూన్ చేస్తే బాగుంటుందో చెప్పగలిగేంత స్వరజ్నానం కూడా ఉన్న గీతకారుడు వేటూరి సుందరరామ్మూర్తి.

అందుకే ఆయన కవిత్వం మ్యూజికల్ గా ఉంటుంది. సన్నివేశం మనసుకు పడితే ఆయన గేయం కాదు…కావ్యమే రాసేయగలరు.ఉదాహ‌ర‌ణం భక్త కన్నప్పలో కిరాతార్జునీయం …

రాఘవేంద్రుడికి బీట్ సాంగ్స్ రాస్తూనే…విశ్వనాథ్ కు శంకరాభరణం రాయడం మామూలు ఫీట్ కాదు.

ఆత్రేయ బ‌య‌ట అనేకం రాస్తూ బాల‌చంద‌ర్ కు మంచి పాట‌లు రాసిన‌ట్టు …

వేటూరితో చక్కటి పాటలు రాయించుకున్న దర్శకులు దాసరి నారాయణరావు, జంధ్యాల.

దాసరి అయితే వేటూరి మాత్రమే రాయగలడు అనుకున్న పాటేదైనా వేటూరితోనే రాయించారు.

న‌వ‌మి నాటి వెన్నెల నేనూ ద‌శ‌మి నాటి జాబిలి నీవూ … లాంటి పాట‌లు చాలానే రాయించుకున్నారు దాస‌రి.

ఏడంతస్తుల మేడ ఇది..వడ్డించిన విస్తరిది..ఏవీ లేక ఉన్నదొక్కటే మీకు నేనూ..నాకు మీరూ…అంటూ ఏడంతస్తుల మేడలో ఓ జీవనగీతం రాయించుకున్నారు దాసరి.

తనే పాటలు రాసుకోవడం మొదలుపెట్టాక కూడా ప్రేమమందిరం సినిమాలో చంద్రోదయం పాట ప్రత్యేకంగా వేటూరే రాయాలని భావించి ఆయనతోనే రాయించారు. ఇక మేఘసందేశంలో అయితే నిన్నటిదాకా శిలనైనా పాట వేటూరి తప్ప మరెవరు రాయగలరు అంత సొగసుగా….

బాపు రమణలతో కూడా వేటూరికి గొప్ప అనుబంధం ఉంది.

రమణగారు ఆంధ్రపత్రికలో పనిచేస్తున్న సమయంలో ఆయన శిష్యరికం చేశారు వేటూరి.

వేటూరి బలాలేమిటో…బలహీనతలేమిటో ముళ్లపూడి వారికి క్షుణ్ణంగా తెల్సు. అందుకే ఆరుద్రతోనే పాటలు రాయించుకునే బాపు రమణలు…కోరి మరీ వేటూరితో రాయించుకున్నారు.

పాటంటూ రాయించుకుంటే… వేటూరితోనే రాయించుకోవాలి అని పట్టుపట్టుక్కూర్చున్న శేఖర్ కమ్ముల లాంటి కుర్ర డైరక్టర్లను సైతం అర్ధం చేసుకోకుండా తెలుగు సినిమా పాటను ఒంటరిని చేసి దిగిరాను దిగిరాను దివి నుంచి భువికి అని వెళ్లి పోయారు వేటూరి. ఈ సన్నివేశం జరిగి రెండు దశాబ్దాలు దాటింది.

ఏసేయ్ చాప జోర్సెయ్ నావ బార్సెయ్ వాలుగా…బతుకు తెరువు ఎదురీతేగా …అంటూ మల్లాది వారిలా అచ్చతెనుగు కవిత్వం చెప్పగలవారెవున్నారని వెతుక్కోవడమే మనకు మిగిల్చాడు వేటూరి.

డబ్బింగ్ పాటలు రాయడం చాలా తేలిక అని చాలా మంది అభిప్రాయం. అది వాస్తవం కాదు. డబ్బింగ్ పాటలు రాయాలంటే…అవతల భాష తెలిసి ఉండడంతో పాటు…అనువాదం చేస్తున్న భాష మీద అధికారం ఉండాలి.

ముఖ్యంగా వకాబలరీ తెలిసి ఉండాలి. ఎందుకంటే….లిప్ మూమెంట్ కు తగ్గట్టుగా ఉంటూనే…భావం చెడకుండా రచన సాగాల్సి ఉంటుంది.

Ads

ఈ ఫీట్ చేస్తూనే…కవితాసొగసులు చెదరకుండా చూసుకున్న కవి వేటూరి.

అయితే వేటూరి రాసిన డ‌బ్బింగ్ గీతాలు హిట్ అయి ఉండ‌వ‌చ్చుగానీ … గ‌జిబిజి కాస్త ఎక్కువ‌నే విమ‌ర్శ కూడా ఉంది ..

గీతాంజలి తర్వాత మణిరత్నం సినిమాలకు మాత్రమే రాశారనుకుంటారు. కానీ ఆత్రేయ, ఆరుద్ర, రాజశ్రీ అంత విస్తృతంగా కాదుగానీ…తనతో రాయించుకోడానికి వచ్చిన నిర్మాతల్ని మాత్రం నిరాశపరచలేదు.

veturi1

సఖి చిత్రంలో అలైపొంగెరా…పాటలో కాదలి వేణుగానం కానడ పలికే అని ప్రయోగిస్తారు. కాదలి తమిళ పదం మాత్రమే కాదంటారాయన. పోతన సరస్వతీదేవి గురించి రాసిన తెలుగు పద్యంలో కాదలి కోడలా అనే ప్రయోగం ఉందని సాక్షం చూపిస్తారు.

అంటే ప్రియమైన కోడలా అనే అర్ధంలో వాడారనేది వేటూరి వివరణ. తమిళం, తెలుగు రెండూ ద్రవిడ భాషలే కాబట్టి సారూప్యం సహజమనేది ఆయన అభిప్రాయం.

ఎన్నో ఏళ్లుగా హీరోపై ప్రేమని పెంచుకుని, అతని సంతోషాల్నీ, వేదనల్నీ అన్నిటినీ ప్రేమిస్తూ..అతని ప్రేమ కోసం మౌనంగా సాగించిన సుధీర్ఘ నిరీక్షణ అనంతరం..అతని ప్రేమని పొందిన పరవశంలో… తన్మయత్వంతో హీరోయిన్ పాడే పాట సూర్య సన్నాఫ్ కృష్ణన్ లో వినిపిస్తుంది. వేటూరి రాసిన డబ్బింగ్ పాటల్లో హంటింగ్ మెలోడీ ఈ గీతం. నిదురే కల అయిన‌దీ వేటూరి రాసిన డ‌బ్బింగ్ పాటే.

గ‌జనీలో కూడా ఆయ‌న రాశారు. కానీ వేటూరి రాసిన డబ్బింగ్ పాట‌లు ముఖ్యంగా యువ సినిమాలో వ‌చ్చిందా మేఘం లాంటి పాట‌లూ ఇద్ద‌రులో పాట‌లూ కాస్త కంగారు పెట్టేస్తాయి.

స్ట్రెయిట్ గీతాల్లోనే ఆయ‌న హాయిగా ఉంటారు …

వేటూరి జ‌ర్నలిస్టిక్ పోయిట్ …ఎక్కువ టైమ్ తీసుకోకుండా వేగంగా రాసివ్వ‌డం ఆయ‌న స్పెషాలిటీ …

మ‌ల్లాది పింగ‌ళి ఆత్రేయ‌ల ప్రేర‌ణ త‌న‌పై ఉంద‌ని చెప్పుకున్న వేటూరి సినిమా మాస్ పాట‌ల్లోకి అందంగా జాన‌ప‌ద సొగ‌సు ప్ర‌వేశ‌పెట్టేవాడు.

కొండ‌మీన సంద‌మామా లాంటి అనేక పాట‌లు ఇందుకు ఉదాహ‌ర‌ణ‌గా చెప్పుకోవ‌చ్చు. నిజానికి వేటూరి బావా అని పిల్చుకున్న సంగీత ద‌ర్శ‌కుడు చెక్కుర‌వ‌ర్తి కూడా త‌న మాస్ బాణీల‌కు జాన‌ప‌దాల్నే ఊతంగా తీసుకుని క‌థ న‌డిపించేశాడు …

వీరి రూట్స్ … అక్క‌డున్నాయ్ … ప‌ల్లెపాట‌ల్లో ఉన్నాయి … అందుకే ఎంతో కొంత మ‌ట్టి వాస‌న కొడ‌తాయ్ … ఆ మ‌ట్టి వాస‌న కొట్టే పాట‌లేవైనా బ‌తికే ఉంటాయ్ …

కొండ మీన సంద‌మామా అయినా … పుట్టింటోళ్లు త‌రిమేశారు అయినా స‌ర‌దాగా ఎప్ప‌టికీ వింటారు … జ‌నం …

నేను మాత్రం పీపుల్స్ ఎన్కౌంటర్ పాటలకు వేటూరిని క్షమించలేను.

అయినా ఏం చేస్తాం….

Share this Article