గాసిప్స్ పుట్టించడం అంటేనే… అది మీడియా ప్రాథమిక హక్కు మరి…!

మీడియా రాజకీయ నాయకులకు సంబంధించే కాదు, చివరకు తమ మీద తామే పుకార్లు లేవదీసుకుంటారు . పుకార్లు అంటే ఎవరికైన ఆసక్తిగానే ఉంటుంది . అందులోనూ మీడియాలో ఉన్నప్పుడు వీటిపై మరింత ఆసక్తి … పత్రికలో రాసిన దానికి , ప్రసారం చేసిన దానికి ఎంతో కొంత బాధ్యత వహించాలి . అది రికార్డ్ అయి ఉంటుంది కాబట్టి .. వాటి విషయంలోనే ఎలాంటి అడ్డు లేనప్పుడు , రికార్డ్ చేయాల్సిన అవసరం లేని పుకార్ల ప్రచారం ఏ స్థాయిలో ఉంటుందో .

*******

వైయస్ రాజశేఖర్ రెడ్డికి ఆత్మగా గుర్తింపు పొందిన కెవిపి రామచంద్రరావు ‘‘ఒక సాహసి ప్రయాణం’’ పేరుతో వైయస్ఆర్ గురించి , పోలవరం గురించి ఓ బుక్ రాశారు . అప్పుడు వైయస్ఆర్ కు పరిచయం ఉన్న నాయకులు , జర్నలిస్ట్ లను పిలిచారు . సీనియర్ జర్నలిస్ట్ లు భండారు శ్రీనివాసరావు , కొమ్మినేని శ్రీనివాసరావు , కెవియస్ సుబ్రహ్మణ్యం తదితరులు కూడా వెళ్లారు . ఈ ముగ్గురున్న ఫోటోను భండారు ఫేస్ బుక్ లో పోస్ట్ చేస్తే … ఆ ఫోటోను టీడీపీ వాళ్ళు తీసుకొని ముగ్గురిలో ఒకరికి వైయస్ఆర్ కమర్షియల్ కాంప్లెక్స్ , ఒకరికి త్రిబుల్ బెడ్ రూమ్ , ఇంకొకరికి విల్లా ఇచ్చారు అని టీడీపీ గ్రూప్ లో రాశారు . ఆ ముగ్గురిలో ఇద్దరి గురించి బాబుకు కూడా బాగా తెలుసు . టీడీపీ వారు ఈ పుకారును ప్రచారంలో పెట్టేప్పుడు పుకారులో నిజానిజాలు బాబును అడిగినా చెప్పేవారు .

మీడియా నాయకులపైనే కాదు , నాయకులు మీడియాపై కూడా పుకార్లు లేవదీసే అవకాశం సోషల్ మీడియా కల్పించింది . ఇది జరిగిన కొన్ని రోజులకు మాటల సందర్భంలో సుబ్రహ్మణ్యం 18 మంది జర్నలిస్టులకు విల్లాలు ఇప్పించారట కదా, బయట టాక్ అని చెప్పుకొచ్చారు . ఈ ప్రచారం అన్ని మీడియాల్లో ఉంది . జర్నలిస్ట్ లు అన్నప్పుడు పుకార్లు జన్మ హక్కు . .. నేను దానిని ఏమీ వ్యతిరేకించడం లేదు . కానీ మిగతా ఎవరైనా ఈ పుకారు నమ్మవచ్చు , ప్రచారం చేయవచ్చు కానీ .. మీకు ఆ హక్కు లేదు అన్నాను . వారం క్రితమే కదా ? మీ మీద పుకారు వచ్చింది మీకు వైయస్ఆర్ త్రిబుల్ బెడ్ రూమ్ విల్లా ఇప్పించారని టీడీపీ వాళ్ళు ప్రచారం చేశారు అని గుర్తు చేశాను . సచివాలయంలోకి రానివ్వడం లేదు , వార్తలు దొరకడం లేదు అని మీడియా వాళ్ళు ఏడుస్తుంటే ఇలాంటి పుకారు ఎలా ? పుకారులో కూడా కొంత నాణ్యత ఉండాలి అని జోకేశాను .